សេដ្ឋកិច្ច​ពិភពលោក​ ចាប់ផ្ដើម​អន់​ថយ

140

ទីក្រុង​វ៉ា​ស៊ី​ន​តោន ៖ មូលនិធិ​រូបិយ​វត្ថុ​អន្តរជាតិ (IMF) ព្យាករណ៍​ថា សេដ្ឋកិច្ច​ពិភពលោក នឹង​លូតលាស់​បាន​៣,៧% នៅ​ឆ្នាំ​ក្រោយ ប៉ុន្តែ​ការ​លូតលាស់​សេដ្ឋកិច្ច​អា​មេ​រិ​ក និង​ចិន​ចាប់ផ្តើម​រអិល​ធ្លាក់​ចុះ​បន្តិច​ម្តង​ៗ​ហើយ ។

Loading...

លោក Todd Fagley នាយក​ប្រតិបត្តិ​របស់ ក្រុមហ៊ុន MedSource Labs ដែល​មាន​មូលដ្ឋាន​នៅ​សហរដ្ឋអាមេរិក បាន​ប្រាប់​ដល់​សារព័ត៌មាន​ថា ភាព​មិន​ប្រាកដប្រជា និង​ផល​ប៉ះពាល់​ក្នុង​ប្រទេស​ចិន​កំពុង​តែ​ចាប់ផ្តើម​កើត​មាន​ឡើង​ហើយ ។

លោក​បាន​បន្ត​ថា ៖« ក្រុមហ៊ុន​ផលិត​ក្នុង​ប្រទេស​ចិន​មួយ​ចំនួន​បាន​ប្រាប់​មក​យើង​ថា​ពួក​គេ​មាន​អារម្មណ៍​ថា​កំពុង​តែ​ជួប​ប្រទះ​នឹង​ភាព​អន់​ថយ ខណៈ​ដែល​ពួក​គេ​បាន​ទទួល​រង​ផល​ប៉ះពាល់​រួច​ទៅ​ហើយ ព្រោះតែ​កំណើន​ការ​ចំណាយ​លើ​ការ​នាំ​ចេញ​ជាដើម »​។

គ្រោះថ្នាក់​ធំ​ជាងគេ​នៃ​ទស្សនវិស័យ​សេដ្ឋកិច្ច​ពិភពលោក គឺ​ជម្លោះ​ពាណិជ្ជកម្ម​រវាង​សហរដ្ឋអាមេរិក និង​ប្រទេស​ចិន ព្រោះ​វា​អាច​បង្ក​ការ​ប៉ះពាល់​ដល់​ប្រទេស​ដទៃ​ជុំវិញ​ពិភពលោក​។ ជម្លោះ​នេះ​អាច​បញ្ចប់ ផ្អាក ឬ​ផ្លាស់​ប្តូរ​ការ​ធ្វើ​ពាណិជ្ជកម្ម​ជុំវិញ​ពិភពលោក​រាប់​ប៊ី​លាន​ដុល្លារ ប៉ុន្តែ​លោក​ប្រធានាធិបតី​ដូ​ណា​ល់ ត្រាំ (Donald Trump) កំពុង​តែ​គំរាមកំហែង​ថា ដាក់​ពន្ធ​លើ​ការ​នាំ​ចូល​យានយន្ត​បន្ថែម​ទៀត ។

IMF ព្យាករណ៍​ថា ការ​ធ្ងន់ធ្ងរ​ឡើង​នៃ​ការ​គំរាមកំហែង​ដាក់​ពន្ធ​ទៅ​វិញ​ទៅ​មកនេះ​អាច​កាត់​បន្ថយ​ការ​លូតលាស់​សេដ្ឋកិច្ច​ជុំវិញ​ពិភពលោក​ប្រមាណ​០,៨%​។

លោកស្រី Christine Lagarde ប្រធាន​គ្រប់គ្រង IMF បាន​និយាយ​ថា ៖« វា​សំខាន់​ណាស់ ព្រោះ​ការ​ធ្វើ​ពាណិជ្ជកម្ម គឺជា​ក្បាលម៉ាស៊ីន​សម្រាប់​ជំរុញ​ការ​លូតលាស់​សេដ្ឋកិច្ច »​។

លោកស្រី​Lagarde និយាយ​ថា លោកស្រី​មិន​គិត​ថា​សហរដ្ឋអាមេរិក​នឹង​ជួប​វិបត្តិ​សេដ្ឋកិច្ច​ក្នុង​ពេល​ខ្លី​ខាង​មុខ​ទេ ប៉ុន្តែ​ការ​លូតលាស់​សេដ្ឋកិច្ច​អា​មេ​រិ​ក អាច​នឹង​ធ្លាក់​ចុះ​ពី​២,៩%​មក​ស្មើ ២,៥%​ប៉ុណ្ណោះ​នៅ​ឆ្នាំ​ក្រោយ​នេះ ។

យោង​តាម​ការ​ស្ទង់​មតិ​ក្រុម​សេដ្ឋវិទូ បាន​ឲ្យ​ដឹង​ថា ទស្សនវិស័យ​ការ​លូតលាស់​ជុំវិញ​ពិភពលោក​សម្រាប់​ឆ្នាំ ២០១៩ បាន​ធ្លាក់​ចុះ​ជា​លើក​ដំបូង ព្រោះតែ​សង្គ្រាម​ពាណិជ្ជកម្ម​រវាង​សហរដ្ឋអាមេរិក​និង​ប្រទេស​ចិន រួម​ទាំង​ការ​រឹត​បន្តឹង​ស្ថានការណ៍​ហិរញ្ញវត្ថុ ។

សេដ្ឋវិទូ​ភាគច្រើន​ក្នុង​ចំណោម​១៥០​នាក់​គិត​ថា កត្តា​ដែល​បង្ក​ឲ្យ​សេដ្ឋកិច្ច​ពិភពលោក​ធ្លាក់​ចុះ​រួម​មានការ​ធ្ងន់ធ្ងរ​ឡើង​នៃ​ជម្លោះ​ពាណិជ្ជកម្ម​រវាង​សហរដ្ឋអាមេរិក​និង​ប្រទេស​ចិន និង​ការ​រឹត​បន្តឹង​ស្ថាន​ការ​ហិរញ្ញវត្ថុ ។

លោក Nei Shearing ប្រធាន​សេដ្ឋវិទូ​នៅ Capital Economics បាន​ឲ្យ​ដឹង​ដែរ​ថា មិន​មាន​អ្នក​ឈ្នះ​ក្នុង​សង្គ្រាម​ពាណិជ្ជកម្ម​ពិភពលោក​ទេ ទោះជា​ការ​ខាតបង់​នៅ​មាន​កម្រិត និង​អាច​ជំរុញ​ឲ្យ​សេដ្ឋកិច្ច​បើក​ទូលាយ​ជាង​មុន​ពិតមែន​ក្តី តែ​ប្រទេស​ទាំងអស់​នឹង​ស្ថិត​ក្នុង​ស្ថានការណ៍​អាក្រក់​ជាង​មុន ៕ ប្រែ​សម្រួល​ដោយ ៖ ណៃ ដា​លី​ន