តម្លៃ​ប្រេង​អន្តរជាតិ​បន្ដ​ធ្លាក់​ចុះ ព្រោះ​ការ​ផ្គត់ផ្គង់​លើស​តម្រូវការ

155

ទីក្រុង​វ៉ា​ស៊ី​ន​តោន ៖ តម្លៃ​ប្រេង​បាន​បន្ដ​រអិល​ធ្លាក់​ចុះ​ជាង ៥%​មក​ហើយ​កាលពី​ថ្ងៃ​អង្គារ ព្រោះតែ​កង្វល់​ពី​ការ​ផ្គត់ផ្គង់​លើសលប់ និង​ការ​ធ្លាក់​ចុះ​នៃ​តម្រូវការ ។

Loading...

តម្លៃ​ប្រេង​អា​មេ​រិ​ក (WTI) និង​តម្លៃ​ប្រេង​អង់​គ្គេ​ស​(Brent)​បាន​បន្ត​ធ្លាក់​ចុះ បន្ទាប់​ពី​ក្រុម​ពាណិជ្ជករ The American Petroleum Institute បាន​និយាយ​ថា ចំនួន​ប្រេង​ក្នុង​ស្តុក​របស់​អា​មេ​រិ​កបាន​កើនឡើង​ដោយ​នឹង​ស្មាន​មិន​ដល់ ។ ចំនួន​ប្រេង​ឆៅ​ក្នុង​ស្តុក​របស់​សហរដ្ឋអាមេរិក​បាន​កើនឡើង​៣,៥​លាន​ធុង​កាលពី​ស​ប្តា​ហ៍​មុន មក​ស្មើ​៤៤១,៣​លាន​ធុង ដែល​ខ្ពស់​ជាង​ការ​គិត​ទុក​ថា នឹង​ធ្លាក់​ចុះ​២,៤​លាន​ធុង ។

កិច្ចសន្យា​ទិញ​លក់​ប្រមាណ​៩០​ម៉ឺន​កិច្ចសន្យា​ត្រូវ​បាន​សម្រេច​ឡើង​កាលពី​ថ្ងៃ​អង្គារ ដែល​ច្រើន​ជាង​ចំនួន​មធ្យម​ប្រមាណ​៥៩,១​ម៉ឺន​កិច្ចសន្យា​។

ការ​ស្ទង់​មតិ​របស់​ធនាគារ Bank of America Merrill Lynch ប្រចាំ​ខែធ្នូ បាន​ឲ្យ​ដឹង​ថា ជំនឿ​ចិត្ត​របស់​វិនិយោគិន​កំពុង​តែ​ធ្លាក់​ចុះ​ហើយ ដោយ​អ្នកគ្រប់គ្រង​មូលនិធិ​កាន់តែ​ច្រើន​គិត​ថា ការ​លូតលាស់​សេដ្ឋកិច្ច​ជុំវិញ​ពិភពលោក នឹង​អន់​ថយ​ក្នុងអំឡុងពេល​១២​ខែ​ខាង​មុខ​ទៀត ។

លោក Bob Yawger ប្រធាន​មួយ​រូប​នៅ Mizuho បាន​ឲ្យ​ដឹង​ថា ៖« ការ​ផ្គត់ផ្គង់​បាន​កើនឡើង​កាលពី​ម្សិលមិញ ហើយ​ស្រប​ជាមួយនឹង​ការ​ធ្លាក់​ចុះ​នៃ​តម្រូវការ​ទៀត​នោះ ធ្វើ​ឲ្យ​តម្លៃ​ប្រេង​អា​មេ​រិ​ក​ធ្លាក់​ចុះ​មក​ត្រឹម​ក្រោម​៥០​ដុល្លារ​ក្នុង​មួយ​ធុង ហើយ​វា​ជំរុញ​ឲ្យ​ពួក​យើង​ប្រញាប់​លក់ »​។

អង្គការ​នៃ​ប្រទេស​ផលិត​ប្រេង (OPEC) និង​ប្រទេស​ផលិត​ប្រេង​ដទៃ​បាន​ព្រមព្រៀង​គ្នា​កាលពី​ខែ​នេះ​ថា នឹង​កាត់​បន្ថយ​ផលិតកម្ម​ប្រមាណ​១,២​លាន​ធុង​ក្នុង​មួយ​ថ្ងៃ ដែល​ស្មើ​ច្រើន​ជាង​១%​នៃ​តម្រូវការ​ជុំវិញ​ពិភពលោក ។ ប៉ុន្តែ​ការ​កាត់​បន្ថយ​នេះ នឹង​មិនកើត​មាន​ឡើង​ឡើយ​រហូត​ដល់​ខែ​ក្រោយ ហើយ​ផលិតកម្ម​ប្រេង​បាន​ស្ថិត​ក្នុង​កម្រិត​ខ្ពស់​នៅ​សហរដ្ឋអាមេរិក រុ​ស្ស៊ី និង​អា​រ៉ា​ប៊ី​សា​អូឌីត ។ ទិន្នផល​ប្រេង​រុ​ស្ស៊ី​បាន​កើន​ដល់​១១,៤២​លាន​ធុង​ក្នុង​មួយ​ថ្ងៃ​នៅ​ខែធ្នូ​នេះ ៕ ប្រែ​សម្រួល​ដោយ ៖ ណៃ ដា​លី​ន