ម្ចាស់​កី​តម្បាញ​ក្រមា​ជាង​១០០​គ្រឿង ប្រឈម​នឹង​កង្វះ​អគ្គិសនី​ប្រើប្រាស់

167

ខេត្តស្វាយរៀង ៖ ប្រជាពលរដ្ឋ​ចំនួន​១០០​គ្រួសារ នៅ​ភូមិ​ដំណាក់​កន្ទួត ឃុំ​ស្វាយ​យា ស្រុក​ស្វាយ​ជ្រំ បាន​ដំឡើង​កី​តម្បាញ​ក្រមា​ជា​លក្ខណៈ​គ្រួសារ​ជាង​១០០​គ្រឿង កំពុង​ជួប​បញ្ហា​ប្រឈម​កង្វះ​ភ្លើងអគ្គិសនី ប្រើប្រាស់​បាន​អំពាវនាវ​សុំ​ឲ្យ​អាជ្ញាធរ​ថ្នាក់​ខេត្ត​ជួយ​អន្តរាគមន៍​។ បើ​តាម​តំណាង​ប្រជាពលរដ្ឋ​ម្ចាស់​កី បាន​មាន​ប្រសាសន៍​ថា ទោះជា​បច្ចេកវិទ្យា​បាន​ដើរ​លឿន​ទៅ​មុខ​បន្តិច​មែន តែ​ការ​កែ​ច្នៃ​ឧបករណ៍​កី​តម្បាញ សម្រាប់​ត្បាញ​ក្រមា ដែល​ជា​មុខរបរ និង​ជា​ផលិតផល​បន្ទាប់បន្សំ​នៅ​តែ​មាន​តួនាទី ក្នុង​ការ​ផលិត សម្រាប់​បម្រើ​ការ​ប្រើប្រាស់​ជា​ប្រពៃណី​ខ្មែរ​យ៉ាង​សំខាន់ ហើយ​ក៏​មិន​អាច​ខ្វះ​បាន​ដែរ​។

Loading...

ជាក់ស្តែង​កី​តម្បាញ ជាង​១០០​គ្រឿង នៅ​ក្នុងភូមិ​ដំណាក់​កន្ទួត ឃុំ​ស្វាយ​យា ស្រុក​ស្វាយ​ជ្រំ ខេត្តស្វាយរៀង បាន​កំពុង​ដំណើរការ​ផលិត​ក្រមា បាន​ជោគ​ជ​យ័​ជា​បណ្តើរ​ៗ​ហើយ បន្ទាប់​ពី​តម្លើង​ដាក់​ឲ្យ​ដំណើរការ​នៅ​តាម​គ្រួសារ​មួយ​ចំនួន​ពី​កី​តម្បាញ​ដៃ​តាម​បែប​បុរាណ​មក​ដំឡើង​ជា​បែប​ស្វ័យប្រវត្តិ​ទាញ​ដោយ​ភ្លើងអគ្គិសនី​។ លោកស្រី ឈាង ដា​នី បាន​ប្រាប់​អ្នក​ព័ត៌មាន​យើង​នៅ​ថ្ងៃ​ទី​២៤ ខែធ្នូ ឆ្នាំ​២០១៨​នេះ​ថា​៖ រូប​លោកស្រី និង​អ្នក​ភូមិ​ដំណាក់​កន្ទួត ឃុំ​ស្វាយ​យា កាលពីដើម​ឡើយ​រូប​លោកស្រី និង​អ្នក​ភូមិ​មិន​ចេះ​ការងារ​តម្បាញ​អី្វ​បន្តិច​ទាល់តែ​សោះ ក៏​ប៉ុន្តែ​ក្រោយមក លោកស្រី និង​អ្នក​ភូមិ​បាន​ទៅ​ស៊ីឈ្នួល​តម្បាញ​ក្រមា​ឲ្យ​អ្នក​ទន្លេ មាន​រយៈពេល​យូរ​ខែ​ឆ្នាំ គួប​ផ្សំ​នឹង​ការ​បង្ហាត់ បង្ហាញ​ពី​ម្ចាស់​កី​តម្បាញ​ញឹកញាប់ ពិសេស​ពួក​គាត់​បាន​សិក្សា​បន្ថែម​ផង​នោះ ពួក​គាត់​បាន​សុំ​ម្ចាស់​កី​តម្បាញ​ឈប់​ពី​ការងារ ហើយ​បាន​មក​បើក​ធ្វើ​អាជីវកម្ម​ដោយ​ខ្លួនឯង រហូត​ទទួល​បាន​ជោគជ័យ​ជា​បណ្តើ​រហើយ ដោយ​ស្រូប​បាន​កម្រៃ​ពលកម្ម​ល្អ​ប្រសើរ​ផង​ដែរ បើ​ប្រៀបធៀប​ទៅ​នឹង​ចំណាកស្រុក​កន្លង​មក​។

អ្នកស្រី​បន្ត​ទៀត​ថា ជុំវិញ​នៃ​ការ​ផលិត ផលិតផល​ក្រមា នៅ​ពេល​បច្ចុប្បន្ន​នេះ​ពលរដ្ឋ​នៅ​ក្នុងភូមិ មាន​ចំណាប់អារម្មណ៍​ច្រើន​ដោយ​ធ្វើការ​នៅ​ជុំ​គ្រួសារ ឯ​ចំណូល​សមរម្យ និង​អាច​ទទួលយក​បាន ក៏​ប៉ុន្តែ​នៅ​តំបន់​នេះ​ជួប​បញ្ហា​កង្វះ​ភ្លើងអគ្គិសនី​ប្រើប្រាស់ ជួប​ការ​លំបាក ក្នុង​ដំណើរការ​ផលិត​។ ដូចនេះ​ទើប​អ្នកស្រី​ដែល​ជា​តំណាង​ឲ្យ​ពលរដ្ឋ​ម្ចាស់​កី​តម្បាញ ទាំងអស់ ស្នើ​សុំ​ឲ្យ​អាជ្ញាធរ​ជួយ​អន្តរាគមន៍​ទៅ​លោក​ប្រធាន​អគ្គិសនី​កម្ពុជា ខេត្តស្វាយរៀង ដាក់​បង្គោល​ត​បណ្តាញ​អគ្គិសនី​ចូល​មក​ភូមិ​ដំណាក់​កន្ទួត​បាន​ប្រើប្រាស់​ដើម្បី​ឲ្យ​ប្រជាពលរដ្ឋ​មាន​លទ្ធភាព​បន្ត​ពង្រីក​អាជីវកម្ម​តម្បាញ​ក្រមា​ឲ្យ​បាន​និរន្តរភាព​។

ជុំវិញ​នៃ​ការ​ស្នើ​សុំ​អគ្គិសនី​របស់​ប្រជាពលរដ្ឋ ដើម្បី​ប្រើប្រាស់​ត្បាញ​ក្រមារ​នេះ លោក សុខ សំ​អន មេឃុំ​ស្វាយ​យា បាន​ប្រាប់​អ្នក​សារព័ត៌មាន​ថា ការងារ​នេះ​ក្រុមប្រឹក្សា​ឃុំ បាន​ទទួល​សំណើរ​របស់​ប្រជាពលរដ្ឋ​នៅ​ក្នុងភូមិ​ដំណាក់​កន្ទួត​រួច​ហើយ និង​បាន​លើក​សំណើសុំ​តាម​រយៈ​វេទិការ​សាធារណៈ ម្តង​ជា​ពីរ​ដង​ហើយ តែ​មិន​ទាន់​បាន​ចម្លើយ​ពី មន្ត្រី​ជំនាញ​អគ្គិសនី​កម្ពុជា​នៅឡើយ​ទេ​។ តែ​ទោះជា​យ៉ាងណា បញ្ហា​អគ្គិសនី នឹង​មាន​ប្រើប្រាស់​នៅ​ពេល ខាង​មុខ​ដែរ ដោយ​តំបន់​នេះ​ខាង​អគ្គិសនី​បាន​ចុះ​មក​ត​បណ្តាញ​ខ្សែ​ដើម្បី​ចែកចាយ​អគ្គិសនី​ហើយ​។ លោក​មេឃុំ​ក៏​បាន​មាន​ប្រសាសន៍​ថា នេះ​គឺជា​មោទនភាព​សម្រាប់​អ្នក​ខេត្តស្វាយរៀង ដែល​ប្រជាពលរដ្ឋ អាច​តម្លើង​កី​តម្បាញ​ក្រមា​ស្វ​យ័​ប្រវត្តិ​ដើរ​ដោយ​អគ្គិសនី​នេះ​។ ទាក់ទិន​ករណី​ប្រជាពលរដ្ឋ​ស្នើ សុំ​ភ្លើងអគ្គិសនី​ប្រើប្រាស់​ទាញ​កី​តម្បាញ​ក្រមារ​នេះ​មិន​អាច​សុំ​ការ​បំភ្លឺ​ពី​លោក​ប្រធាន​អគ្គិសនី​កម្ពុជា​ស្វាយ​រៀង​បាន​ទេ​ថ្ងៃនេះ​៕ ដោយ ៖ វ៉ា​ន់​ប៊ុ​ន​ធឿ​ន