មី​យ៉ា​ន់​ម៉ា​ចាំបាច់​ត្រូវ​អភិវឌ្ឍន៍​វិស័យ​នេសាទ និង​ជំរុញ​នាំ​ចេញ

130

ទីក្រុង​យ៉ាំ​ង​ហ្គោ​ន ៖ រដ្ឋមន្ដ្រី​ជនជាតិភាគតិច​Rakhine ក្នុង​រដ្ឋាភិបាល​ទីក្រុង​យ៉ាំ​ង​ហ្គោ​ន លោក Zaw Aye Maung បាន​ប្រកាស​ថា វិស័យ​បសុសត្វ​និង​ជលផល​មី​យ៉ា​ន់​ម៉ា មិន​ទាន់​មាន​សក្តានុពល​នៅឡើយ និង​ត្រូវការ​ក្រសួង​ផ្សេង​ៗ​មក​ចូលរួម ដើម្បី​ពង្រីក និង​អភិវឌ្ឍន៍​ឲ្យ​បាន​ពេញលេញ ។ នេះ​បើ​យោង​តាម​ការ​ចេញផ្សាយ​ពី​មី​យ៉ា​ន់​ម៉ា ថែម​ស៍ កាលពី​ថ្ងៃ​ទី​២៩ ធ្នូ កន្លង​មក ។
លោក Zaw Aye Maung បាន​ថ្លែង​ថា ៖« ប្រសិនបើ​យើង​ចង់​អភិវឌ្ឍ​វិស័យ​ជលផល យើង​ត្រូវ​ដាក់​វា​នៅ​ក្រោម​ក្រសួង​ផ្សេង​គ្នា ជាមួយ​អ្នក​ធ្វើ​សេចក្តី​សម្រេចចិត្ត​ទាំង​នៅ​ក្នុង​សហភាព និង​ថ្នាក់​តំបន់ »​។ លោក​បាន​បន្ថែម​ថា ច្បាប់​ថ្មី​ពិតជា​ត្រូវការ​ណាស់ ដើម្បី​ជំនួស​ច្បាប់​ចាស់ និង​បទបញ្ជា​ដែល​ហួស​សម័យ​សម្រាប់​វិស័យ​ជលផល ។

Loading...

ការ​អំពាវនាវ​ឱ្យ​មាន​ភាព​ជា​អ្នកដឹកនាំ និង​ការ​ផ្តោត​ទៅ​លើ​វិស័យ​ជលផល ត្រូវ​បាន​ធ្វើ​ឡើង ខណៈ​ដែល​វិស័យ​នេះ​កំពុង​ប្រឈម​នឹង​បញ្ហា​ដូច​ជា កង្វះខាត​ហិរញ្ញវត្ថុ ហេដ្ឋារចនាសម្ព័ន្ធ​ដឹក​ជញ្ជូន ទិន្នន័យ និង​ទំនាក់ទំនង និង​សូ​ម្បី​តែ​ដី​សម្រាប់​ការ​ចិញ្ចឹម​ត្រី ។ សំខាន់​បំផុត វិស័យ​ចិញ្ចឹមសត្វ និង​ជលផល មាន​សក្តានុពល​នាំ​ចេញ​យ៉ាង​ខ្លាំង ។ នៅ​ឆ្នាំ ២០១៧-២០១៨ មី​យ៉ា​ន់​ម៉ា​បាន​នាំ​ចេញ​ត្រី​ចំនួន​ជាង​៥៧​ម៉ឺន​តោន​ដែល​មាន​តម្លៃ​៧១២​លាន​ដុល្លារ​ដែល​ជា​ចំនួន​ខ្ពស់​បំផុត​នៅ​ក្នុង​ប្រវត្តិសាស្ត្រ ។

កាលពី​ថ្ងៃ​អង្គា​រស​ប្ដា​ហ៍​មុ​នេះ កិច្ច​ពិគ្រោះ​យោបល់​ថ្នាក់​រដ្ឋ និង​ថ្នាក់​តំបន់​សម្រាប់ NADP ត្រូវ​បាន​ធ្វើ​ឡើង​នៅ​ទីក្រុង​យ៉ាំ​ង​ហ្គោ​ន​។ គោលបំណង​នៃ​ការពិគ្រោះ​យោបល់​នេះ គឺ​ដើម្បី​ប្រមូលផ្តុំ​មតិ​រិះគន់​សំខាន់​ៗ​ពី​អ្នក​ពាក់ព័ន្ធ​សំខាន់​ៗ​មក​ពី​រដ្ឋ និង​តំបន់​ផ្សេង​ៗ​គ្នា ដើម្បី​ធានា​ថា សមាសភាព​ជា​ច្រើន ដែល​អាច​ធ្វើ​ទៅ​បាន​ត្រូវ​បាន​គេ​ស្តាប់​នៅ​ក្នុង​ដំណាក់កាល​អភិវឌ្ឍន៍ NADP ។

NADP នឹង​ផ្តោត​លើ​ការ​ធ្វើ​ឱ្យ​ប្រសើរ​ឡើង​នូវ​ខ្សែ​សង្វា​ក់​តម្លៃ​ទាំងមូល និង​ភ្ជាប់​វិស័យ​ជលផល​មី​យ៉ា​ន់​ម៉ា​ជាមួយ​ទីផ្សារ​សកល ។ ដំណើរការ​ធ្វើ​សេចក្តី​ព្រាង​នេះ​ត្រូវ​បាន​គេ​រំពឹង​ថា នឹង​បញ្ចប់​នៅ​ខែកុម្ភៈ​ឆ្នាំ​ក្រោយ បន្ទាប់​មក វា​នឹង​ត្រូវ​ដាក់​ជូន​ទៅ​រដ្ឋាភិបាល ហើយ​ភ្ជាប់​ទៅ​នឹង​ច្បាប់​ដែល​មាន​ស្រាប់ ។

លោក Zaw Oo នាយក​ប្រតិបត្តិ​នៃ​មជ្ឈមណ្ឌល​អភិវឌ្ឍន៍​សេដ្ឋកិច្ច និង​សង្គម បាន​មាន​ប្រសាសន៍​ថា ក្រោយ​ច្បាប់​ថ្មី​ចូល​ជា​ធរមាន ប្រទេស​មី​យ៉ា​ន់​ម៉ា​នឹង​បង្កើត​ជា​កម្មវិធី​សម្រាប់​ថ្នាក់​ជាតិ និង​ថ្នាក់​តំបន់ ដើម្បី​លើកកម្ពស់​វិស័យ​នេះ​ឡើង​វិញ ៕ ប្រែ​សម្រួល​ដោយ ៖ គង់ រិ​ទ្ធ​រី​ណា