ពីរ​នាក់​ប្តី​ប្រពន្ធ​ថ្លើមធំ​ណាស់ ! ហ៊ាន​យកឈ្មោះ​ថ្នាក់ដឹកនាំ​លក់​ដី​ខ្យល់​រាប់​ពាន់​ហិ​កតា

1273

រាជធានី​ភ្នំពេញ ៖ ប្តី​ប្រពន្ធ​ពីរ​នាក់​យកឈ្មោះ​ថ្នាក់ដឹកនាំ បិទ​បាំង​អំពើ​ទុច្ចរិត ដើម្បី​ឆបោក​អ្នក​ដទៃ ត្រូវ​បាន​កម្លាំង សមត្ថកិច្ច​នគរបាល​នាយកដ្ឋាន​ព្រហ្មទណ្ឌ​ក្រសួងមហាផ្ទៃ​ចាប់ខ្លួន និង បញ្ជូន​ទៅ​កាន់​សាលាដំបូង រាជធានី​ភ្នំពេញ នា​រសៀល​ថ្ងៃ​ទី​១៦ មក​រា ពាក់ព័ន្ធ​ពី​បទ​ក្លែង​ឯកសារ​សាធារណៈ ប្រើប្រាស់​លិខិត​សាធារណៈ​ក្លែង និង​ឆបោក​ប្រាក់​ជិត​១​លាន​ដុល្លារ​អា​មេ​រិ​ក ក្នុង​អំពើ​លក់​ដី​ខ្យល់​រាប់​ពាន់​ហិ​កតា​។ ជនសង្ស័យ​ម្នាក់​ឈ្មោះ អ៊ូច សៀ​ក​វ៉ា​ន់ ភេទ​ប្រុស អាយុ​៥៦​ឆ្នាំ (​ប្តី​) និង​ម្នាក់​ឈ្មោះ ជៀម ចាន់​បូ​រី ភេទ​ស្រី អាយុ​៤៩​ឆ្នាំ មាន​ទីលំនៅ​ភូមិ បឹង​សាឡា​ង សង្កាត់​ឫស្សី​កែវ ខណ្ឌឫស្សីកែវ រាជធានី​ភ្នំពេញ​។

Loading...

ទាក់ទិន​នឹង​ការ​ចាប់ខ្លួន​ប្តី​ប្រពន្ធ​២​នាក់ ខាងលើ​នេះ បញ្ជូន​ទៅ​កាន់​សាលាដំបូង​រាជធានី​ភ្នំពេញ​នោះ ត្រូវ​បាន​សមត្ថកិច្ច​បង្ហើប​ឲ្យ​ដឹង​ថា សំណុំរឿង​នេះ មាន​ពាក្យបណ្តឹង​ពី​ជន​រង​គ្រោះ​ចំនួន​១២​នាក់ ក្នុង​នោះ​មាន​ព្រះសង្ឃ​១​អង្គ​ផង​ដែរ​។ ដើមចម​នៃ​ពាក្យបណ្តឹង បាន​ឲ្យ​ដឹង​ថា កាលពី​អំឡុង​ឆ្នាំ​២០១៥​ឈ្មោះ ជៀម ចាន់​បូ​រី និង​ឈ្មោះ អ៊ូច សៀ​ក​វ៉ា​ន់ បាន​យក​ឯកសារ លិខិត​ផ្ទេរសិទ្ធិ​កាន់កាប់​ដីធ្លី ទៅ​បង្ហាញ​ជន​រង​គ្រោះ​ទាំងអស់​ដោយ​អះអាង​ថា ខ្លួន​(​ប្តី​.​ប្រពន្ធ​)​មាន​ដី​រាប់​ពាន់​ហិ​កតា ស្ថិត​នៅ​ភូមិ​គ្រួ​ស ឃុំ​ថ្លា​ត ស្រុក​អន្លង់​វែង ខេត្តឧត្តរមានជ័យ ហើយ​ត្រូវការ​លក់​ឲ្យ​ទៅ​ក្រុមហ៊ុន​ចិន និង​ម៉ា​ឡេ​ស៊ី ដូច្នោះ​គេ​បាន​តម្រូវ​ឲ្យ​ជន​រង​គ្រោះ ដាក់​ប្រាក់​ចូល​ហ៊ុន​ដើម្បី​រៀបចំ​ដី​នោះ និង​បាន​ផល​ចំណេញ​ចែក​គ្នា​។

ជន​រង​គ្រោះ​១២​នាក់​មាន ៖ ១.​ឈ្មោះ អ៊ូច ប៉ោ ភេទ​ស្រី អាយុ​៥៦​ឆ្នាំ ២.​ឈ្មោះ ដាម សុ​ផុ​ន ភេទ​ស្រី អាយុ​៤៩​ឆ្នាំ ៣.​ឈ្មោះ ទួន ស្រង ភេទ​ស្រី អាយុ​៥២​ឆ្នាំ ៤.​ឈ្មោះ ទួន ស្រី​ពៅ ភេទ​ស្រី អាយុ​៥៦​ឆ្នាំ ៥.​ឈ្មោះ លី ពុ​ទ្ធី ភេទ​ប្រុស អាយុ​៣៨​ឆ្នាំ ៦.​ឈ្មោះ សុខ ស៊ីវ​អេ​ង ភេទ​ស្រី អាយុ​៥៦​ឆ្នាំ ៧.​ឈ្មោះ ប៉ាវ ឡ​ន ភេ​ប្រុស អាយុ​៦៦​ឆ្នាំ ៨.​ឈ្មោះ គិ​ន ណោ ភេទ​ស្រី អាយុ​៥៥​ឆ្នាំ ៩.​ឈ្មោះ ឃុន ខេ​ង ភេទ​ស្រី អាយុ​៦៣​ឆ្នាំ ១០.​ឈ្មោះ ប៉េង ម៉េ​ង​ហ៊ា​ង ភេទ​ប្រុស អាយុ​៥២​ឆ្នាំ ១១.​ឈ្មោះ លឹ​ម សុវណ្ណ​ចំប៉ា ភេទ​ស្រី អាយុ​៥៤​ឆ្នាំ និង​១២.​ព្រះ​តេជគុណ​នាម​.​ពុំ សុ​ឃឿ​ន ជន្មាយុ​៦៤​វស្សា​។ មន្ត្រី​នគរបាល​បន្ត​ថា ក្នុង​ម្នាក់​ៗ​បាន​ចំណាយ​ប្រាក់​មិន​តិច​ពីក្រោម​៥​ម៉ឺន​ដុល្លារ​នោះ​ទេ ឲ្យ​ទៅ​ពីរ​នាក់​ប្តី​ប្រពន្ធ​(​ជៀម ចាន់​បូ​រី​.​និង​អ៊ូច សៀ​ក​វ៉ា​ន់​) ដើម្បី​ចង់បាន​ប្រាក់​ចំណេញ​កប់​ក្តោង​មក​វិញ​នោះ បើ​តាម​សរុប​ជិត​១​លាន​ដុល្លារ​អា​មេ​រិ​ក​ឯណោះ​។

បានជា​ជន​រង​គ្រោះ​នាំ​គ្នា​សម្រុក​ដាក់​លុយ​ចូល​ហ៊ុន​នោះ ដោយសារ​ពួក​គេ​បាន​មើលឃើញ​ទ​ង្វើ​ពីរ​នាក់​ប្តី​ប្រពន្ធ​មួយ​ម៉ាត់​ណា​ក៏​ថ្នាក់ដឹកនាំ​ៗ​។ មិនតែប៉ុណ្ណោះ​ប្តី​ប្រពន្ធ ២​នាក់​នោះ បាន​ប្រើ​ល្បិច​នាំ​ជន​រង​គ្រោះ​ចេញ​ទៅ​ក្រៅប្រទេស​ដូច​ជា​ម៉ា​ឡេ​ស៊ី ដែល​ប្រាប់​គេ​ថា ទៅ​ទូទាត់​ប្រាក់​ដើម្បី​យក​មក​ចែក​គ្នា ទីបំផុត​ដូច​នាំ​ទៅ​មើលមេឃមើលផ្កាយ​នៅ​ស្រុក​គេ បាន​ត្រឹម​អស់​លុយហោប៉ៅ​រៀងខ្លួន​ទៀត​។ រឿងរ៉ាវ​បាន​បែកធ្លាយ និង​ដឹង​ច្បាស់​ថា ប្តី​ប្រពន្ធ​២​នាក់ ជា​ជន​ឆបោក​នោះ តាម​រយៈ​នៃ​ការ​ស៊ើបសួរ​ពី​សំណាក់​អាជ្ញាធរ​មូលដ្ឋាន គ្មាន​ដី​រាប់​ពាន់​ហិ​កតា​ណា​ជា​កម្មសិទ្ធិ របស់​ឈ្មោះ ជៀម ចាន់​បូ​រី និង​ឈ្មោះ អ៊ូច សៀ​ក​វ៉ា​ន់ នោះ​ទេ មាន​តែ​ដី​ខ្យល់ ដូច្នោះ​បានជា​ជន​រង​គ្រោះ​នាំ​គ្នា​ដាក់ ពាក្យបណ្តឹង​ទៅ​សមត្ថកិច្ច ដើម្បី​ចាត់​ឲ្យ​ជួយ​ចាត់ការ​ចំពោះ​ប្តី​ប្រពន្ធ​២​នាក់​នេះ​។

កាន់តែ​ច្បាស់​ទៀត​នោះ នៅ​ពេល​សមត្ថកិច្ច​បញ្ជូន​ពួក​គាត់​(​ប្តី​ប្រពន្ធ​)​ទៅ​តុលាការ ពួក​គាត់​បាន​ត្រៀម​រួច​ហើយ​នូវ​បដា​តូច​មួយ​កាន់​នៅ​ដៃ មាន​សរសេរ​ឈ្មោះ​ថ្នាក់ដឹកនាំ​បង្ហាញ​ពី​មោទនភាព នៅ​ចំពោះ​មុខ​ដើមបណ្តឹង​ទាំងអស់ ដែល​តាម​ទៅ​ឃ្លាំមើល​ដល់ សាលាដំបូង​នោះ​ផង​ដែរ​៕ ដោយ ៖ ឃឹម ប៊ុ​ន​ណា​ក់