បុរស​វ័យ​ចំណាស់​ពិការ​ភ្នែក​ទាំង​២​ហើយ នៅ​ឡើងត្នោត​បាន​ដូច​មនុស្ស​ភ្នែក​ភ្លឺ

505

ខេត្តកំពង់ស្ពឺ ៖ មានកូន​ក៏​ដូច​អត់​កូន​នេះ​ជា​ពាក្យ​របស់​លោកតា​ពិការ​ភ្នែក​ទាំង​សងខាង​ដែល​តស៊ូ​ឡើងត្នោត ត្រង​យក​ទឹកត្នោត ដើម្បី​លក់​យក​កម្រៃ​យក​មក​ចិញ្ចឹមជីវិត​។ ការ​លក់​ទឹកត្នោត​ជ្រក់​២​បំពង់​មិន​បាន​កម្រៃ​ច្រើន នោះ​ទេ សម្រាប់​លោកតា​គឺ​ត្រឹម​២,០០០​ទៅ​៣,០០០​រៀល​ប៉ុណ្ណោះ ក្នុង​ការ​ដោះស្រាយ​ជីវភាព​ប្រចាំ​ថ្ងៃ​។ ជួប​ជាមួយ​អ្នក​យក​ព័ត៌មាន​យើង លោកតា​បាន​រៀបរាប់​ពី​ដំណើរ​ជីវិត​របស់​គាត់​ថា​៖ គាត់​ឈ្មោះ ទួន សូត អាយុ​៦៧​ឆ្នាំ រស់នៅ​ភូមិ​ស្លែង ឃុំ​ស្វាយ​រំពា ស្រុក​ប​សេដ្ឋ ខេត្តកំពង់ស្ពឺ​។

Loading...

មាន​ប្រពន្ធ​ឈ្មោះ វ៉ែន យឺន អាយុ​៦៧​ឆ្នាំ កូន​៧​ស្រី​៥​នាក់ ប្រុស​២​នាក់ បច្ចុប្បន្ន​បាន​បែក​ផ្ទះ​ទៅ​ធ្វើការ​រកស៊ី​រៀង​ៗ​ខ្លួន​អស់ហើយ គាត់ និង​ប្រពន្ធ​រស់​តែ​០២​នាក់ ដោយ​ប្រពន្ធ​ដើរ​ស៊ីឈ្នួល​គេ ចំណែក​គាត់​ឡើងត្នោត​យក​ទឹក​មក​ធ្វើ​ជ្រក់​លក់​គ្រាន់ បាន​លុយ​ទិញ​ម្ហូបអាហារ​ប្រចាំ​ថ្ងៃ អស់​រយៈពេល​៥៤​ឆ្នាំ​មក​ហើយ ដែល​គាត់​មិន​បាន​មើលឃើញ​ពិភពលោក មួយ​នេះ​។ ព្រោះតែ​ឪពុក​ម្តាយ​ជា​គ្រួសារ​កសិករ លោកតា​មិន​ដែល​បាន​ហូប​ឆ្ងាញ់​នោះ​ទេ​។ លោកតា​បាន​រំលឹក​ថា​៖ នៅ​ពេល​គាត់​ចាប់ផ្តើម​អាយុ​១៣​ឆ្នាំ ភ្នែក​របស់​គាត់​ចាប់ផ្តើម​ស្រវាំង​គឺ​ក្រោយ​ពេល​ដែល​គាត់​កើត​ជំងឺ​កញ្ជ្រឹល​។

លុះ​ធំ​ពេញវ័យ​ឪពុក​ម្តាយ​បាន​រៀបចំ​ឲ្យ​មានគូស្រករ​ដូច​ក​ម្លោះ​ដទៃ​ក្នុងភូមិ​ដែរ ក្រោយ​រៀប​ការ​គឺ​គាត់​ប្រកប របរ​ធ្វើស្រែ​ដូច​អ្នក​ភូមិ​ផ្សេង​ទៀត​ហើយ​ភ្នែក​ក៏​ចាប់ផ្តើម​ងងឹត​មើល​លែង​ឃើញ​តែ​ម្តង​។ តែ​ទោះជា​ភ្នែក​ងងឹត ក៏​គាត់​ខិតខំ​ធ្វើស្រែ​ចម្ការ​ចិញ្ចឹម​ប្រពន្ធ​កូន​ដោយ​គ្មាន​រា​ថយ​ឡើយ​រហូត​ដល់​កូន​ធំ​ពេញវ័យ​មាន​ប្តី​ប្រពន្ធ​បែក​ទៅ​រស់នៅ​រៀង​ៗ​ខ្លួន​អស់​ទៅ​។ រាល់ថ្ងៃ​ទោះបីជា​ពិការ​ក៏​គាត់​មិន​ដើរ​សុំទាន​គេ​នោះ​ទេ គឺ​បាន​ប្រកប​របរ​ឡើងត្នោត យក​ទឹកត្នោត​មក​ជ្រក់​ដើម្បី​លក់​យក​កម្រៃ​ច​ញ្ចឹ​ម​ជីវិត​ចុង​ក្រាយ​របស់​គាត់​។

ចុង​ក្រោយ​លោកតា​បាន​សំណូមពរ ដល់​អស់លោក​អ្នក​សប្បុរស​បើ​អាណិត​ដល់​គាត់​សូម​មេត្តា​ផ្តល់​ម្ហូបអាហារ​ណា​ដែល​ឆ្ងាញ់​ឲ្យ​គាត់​បាន​ស្គាល់​រសជាតិ​នា​ជីវិត​ចុង​ក្រោយ​មួយ​នេះ​ផង ព្រោះថា​អស់​រយៈពេល​៥៤​ឆ្នាំ​មក​ហើយ​ចាប់តាំងពី​ងងឹតភ្នែក​មក មិន​ដែល​ស្គាល់​អ្វី​ដែល​ជា​ម្ហូ​ឆ្ងាញ់​នោះ​ទេ​៕ ដោយ ៖ វង្ស សន