ពលរដ្ឋ​ក្នុង​តំបន់​អង្គរ នាំ​គ្នា​បន្តវេន​ពី​ដូនតា​ក្នុង​ការ​រ​ធ្វើ​ធូប​លក់

232

ខេត្តសៀមរាប ៖ តំបន់​អង្គរ​ជា​បេតិកភណ្ឌ​វប្បធម៌ និង​ឃ្លាំង​ផ្ទុក​នូវ​ទំនៀមទម្លាប់​ប្រពៃណី​ខ្មែរ យ៉ាង​សម្បូរ​បែប ដែល​នេះ​ក៏​ជា​ផ្នែក​មួយ​នៃ​ការ​លើក​តម្លៃ​ជា​សាកល​នៃ​រមណីយដ្ឋាន​អង្គរ​។ ឯការ​ប្រកប​របរ​ផលិត​ធូប​ក៏​ជា​ផ្នែក​មួយ​ដែល​អ្នកស្រុក​អង្គរ​បាន​ប្រកប​តាំងពី​យូរយារ​ណាស់​មក​ហើយ និង​នៅ​បន្ត​ធ្វើ​រហូត​ដល់​សព្វថ្ងៃ ដោយ​ចំណេះ​ជំនាញ​នេះ​ក៏​ជា​ការ​ផ្ទេរមរតក​ពី​ជំនាន់​មួយ​ទៅ​ជំនាន់​មួយ​។

Loading...

សូម​បញ្ជាក់​ថា ធូប​គឺជា​គ្រឿងក្រអូប​ធ្វើ​ដោយ​លម្អិត​សំបកឈើ ស្លឹកឈើ ខ្លឹមឈើ ឬ​ជ័រ​ឈើ ប្រទាល​មាន​ក្លិនក្រអូប​ប្រហើរ សម្រាប់​អុជ​បង្ហុយផ្សែង​ជា​គ្រឿង​បូជា​។ មុខរបរ​នេះ​នៅ​មាន​បន្ត​ធ្វើ​រហូត​ដល់ សព្វថ្ងៃ​ក្នុង​ចំនួន​តិចតួច​គ្រួសារ​ប៉ុណ្ណោះ មាន​របៀប​ផលិត និង​វត្ថុធាតុដើម​ធ្វើ​ធូប មិន​ខុស​គ្នា​ប៉ុន្មាន​ទេ ដ្បិត​របៀប​ធ្វើ​ធូប​ចេះ​ត​ៗ​គ្នា ពី​ភូមិ​មួយ​ទៅ​ភូមិ​មួយ ហើយ​បន្សល់​សម្រាប់​ផលិត​ប្រើ​ក្នុង​គ្រួសារ​ផង និង​ជា​មុខរបរ​សម្រាប់​ចិញ្ចឹមជីវិត​ផង​។ ពួក​គាត់​អាច​រក​ទិញ និង​លក់ដូរ​បាន​យ៉ាង​ងាយស្រួល​នៅ​តាម ទីផ្សារ​វត្ត​អារាម និង​បុណ្យ​ទាន​នៅ​តាម​ភូមិ​ជាដើម​។

អ្នកស្រី ហុំ មឿ​ន រស់នៅ​ភូមិ​ស្គន់ ឃុំ​ត្បែង ស្រុក​បន្ទាយស្រី ខេត្តសៀមរាប បាន​រៀបរាប់​ប្រាប់​ថា ជីវិត និង​ការ​ធ្វើ​ធូប​លក់ របស់​ពួក​គាត់ គឺ​បន្តវេន មក​ពី​ម្តាយ​របស់​គាត់​រហូត​ដល់​សព្វថ្ងៃ ក្រោយ​ពី​ម្តាយ​របស់​គាត់​ដួល​បាក់ដៃ ពុំ​អាច​បន្តរ​ការងារ​នេះ​កើត​។ អ្នកស្រី មឿ​ន បាន​រៀបរាប់​ឱ្យ​ដឹង​ទៀត​ថា «​ចំពោះ​ធូប​ដែល​ខ្ញុំ​ធ្វើ​លក់ ថ្វី​ត្បិត​មិន​មាន​រូបរាង​តូចឆ្មារ ស្អាត​ល្អ​ដូច​ធូប​ដែល​នាំ​ចូល​ពី​ក្រៅប្រទេស ប៉ុន្តែ​អ្នក​ភូមិ​ជិត​ឆ្ងាយ​តែង​មក​ទិញ​យក​ទុក​អុជ ជា​ប្រចាំ ព្រោះ​គេ​ដឹង​ថា​ធូប​ខ្ញុំ​ធ្វើ​ជា​ប្រភេទ​ធូប​ធម្មជាតិ គ្មាន​លាយឡំ​ជាតិ​គីមី ប្រើ​តែ​រុក្ខជាតិ ប្រទាល ឬ​ថ្នាំ​រុក្ខជាតិ​ដែល​ធ្វើ​ឱ្យ​មាន​ក្លិនក្រអូប អុជ​ឆេះ​ល្អ​»​។

អ្នកស្រី ក៏​រៀបរាប់​ពី​វត្ថុធាតុដើម​ដែល​យក​មក​ផលិត ធូប​ឱ្យ​ប្រ​អូ​ប មាន​ខ្លះ​ដាំ​ទុក​នៅ​នឹង​ផ្ទះ​ស្រាប់ រីឯ​ខ្លះ​ទៀត​ទាល់តែ​ទៅ​រក​នៅ​ឯ​ភ្នំ ឬ​ព្រៃ ដែល​សុទ្ធ​សឹង​ជា រុក្ខជាតិ​ថ្នាំបុរាណ ប្រទាល​ក្រអូប ពូកែ​ស័ក្តិសិទ្ធិ ដូច​ជាដើម​ប្រាក់ ដើម​ពោល្យំ ពុំសែន មើម​ប្រោះ​តា​សេ វ​ល្លិ៍​ឆ្នូត សំបោ​បាយ និង​ស្លឹក​កំ​ប៉ោ​ជាដើម​។ ហេតុនេះ​ពេល​អុជ​ធូប ក្លិនក្រអូប​ជួយ​ឱ្យ​ស្មារតី​ធូរស្រាល កាត់​បន្ថយ​នឿយហត់ មិន​ប៉ះពាល់​ដល់​សុខភាព​។ ចំពោះ​វិធី​ធ្វើ​វិញ គឺ​យក​វត្ថុ​ធាតុ​ទាំង​អស់នេះ​ដាក់​ហាល ថ្ងៃ​ឱ្យ​ស្ងួត បន្ទាប់​មក​យក​ទៅ​បុក​ឱ្យ​ម៉ដ្ឋ ហើយ​រែង​យក​តែ​ម្សៅ រួច​យក​ទៅ​លាយ​ជាមួយ​ទឹក​ដើម្បី​ឱ្យ​ម្សៅ សើម​ស្អិត អាច​លញ់​ជាមួយ​ទ្រនុង​ធាងដូង ហើយ​រូត​ជាមួយ​ម្សៅ​ស្ងួត រួច​ដាក់​ហាលថ្ងៃ​ឱ្យ​ស្ងួត​ជា​ការ ស្រេច​។

នេះ​ជា​រូបមន្ត​ដែល​ឪពុក​ម្តាយ​បន្សល់​ទុក​មក​សម្រាប់​គ្រួសារ​អ្នកស្រី ហើយ​ត្រូវធ្វើ​យ៉ាងម៉េច ដើម្បី​ឱ្យ​ថ្នាំបុរាណ​នីមួយ​ៗ​សម​ស្របគ្នា ទើប​ធូប​មានគុណ​ភាព​ខ្ពស់ ក្លិនក្រអូប​»​។ នេះ​គឺជា​ការ​ផ្ទេរ​ចំណេះដឹង និង​ជំនាញ​ក្នុង​ការ​ប្រកប​របរ ចិញ្ចឹមជីវិត ដល់​កូនចៅ​ជំនាន់​ក្រោយ​ដែល​មនុស្ស ក្នុង​តំបន់​អង្គរ​តែងតែ​ចែករំលែក​ដើម្បី​កុំឱ្យ​បាត់បង់ ទើប​នៅ​តំបន់​អង្គរ នៅ​មាន​វប្បធម៌​សម្បូរ​បែប នៅ​រស់​ក្នុង​ជីវភាព​ប្រចាំ​ថ្ងៃ​របស់​ប្រជាជន​ក្នុងភូមិ​ស្រុក ចៀសវាង ទៅ​ចំណាកស្រុក ហើយ​ធូប​របស់​ពួក​គាត់ គឺ​ផលិត​ចេញពី​ឱសថ​បុរាណ​ខ្មែរ​ពិត​ៗ ១០០% មិន​ចាញ់​ធូប​នាំ​ចូល ពី​ប្រទេស​ជិតខាង​ឡើយ​។

ចំណែក​ក្រុមការងារ ស្រាវជ្រាវ នៃ​អាជ្ញាធរ​ជាតិ​អប្សរា តែងតែ​ខិតខំ​ចងក្រង​ប្រមូល​នូវ​ទំនៀមទម្លាប់ ប្រពៃណី​ក្នុង​តំបន់​អង្គរ​មក​ផ្សព្វផ្សាយ និង​សូម​គាំទ្រ​ចំពោះ​ការ ថែរក្សា​មរតក​វប្បធម៌​ទាំងនេះ​ឱ្យ​មាន​ភាព​រស់​រវើក និង​សូម​ឱ្យ​ប្រជាជន​ខ្មែរ ងាក​មក​គាំទ្រ ផលិតផល​ខ្មែរ ដើម្បី​លើក​ស្ទួយ​ជីវភាព​ប្រជាជន​ផង និង​ការ​អភិរក្ស​ផង​៕ ដោយ ៖ ច័ន្ទ រស្មី