រ៉ឺ​ម៉ក​ដឹក​ទឹក​សុទ្ធ​មួយ​គ្រឿង​បើក​ឡើង​ចំណោត​មិន​រួច រអិល​ទៅ​បុក​រថយន្ត​មួយ​គ្រឿង​ក្រពឹត​មុខ

336

រាជធានី​ភ្នំពេញ ៖ រថយន្ត​ម៉ាក​ហា​យ​ឡែ​ន​ឌ័​រ​មួយ​គ្រឿង​បាន​ក្រពឹត​ផ្នែក​ខាង​មុខ​រង​ការ​ខូចខាត​យ៉ាងដំណំ ខណៈ​ពេល​ដែល​ស្ត្រី​ម្នាក់​បើក​ដឹក​កូន​ចេញ​មក​ពី​សាលារៀន ហើយ​ត្រូវ​បាន​រ៉ឺ​ម៉ក​ដឹក​ទឹក​សុទ្ធ​មួយ​គ្រឿង ទំនងជា​ដឹក​ធ្ងន់​ពេក​បើក​ឡើង​ចំណោត​ផ្លូវ​២៧១​មិន​រួច​ក៏​បះជើង​ច្រងាង និង​រអិល​ថយក្រោយ​មក​បុក​នោះ រួច​ហើយ​បុរស​អ្នកបើកបរ​រ៉ឺ​ម៉ក​ម៉ូតូ​ចុះ​រត់គេច​ខ្លួន​បាត់​ស្រមោល​។ ករណី​គ្រោះថ្នាក់​ចរាចរណ៍​នេះ​ដែរ បាន​កើតឡើង​កាលពី​វេលា​ម៉ោង​១១ និង​៣០​នាទី​ព្រឹក ថ្ងៃ​ទី​២៥ ខែមីនា ឆ្នាំ​២០១៩ នៅ​ចំណុច​ផ្លូវ​លេខ​៥០៦ កែង​ផ្លូវ​លេខ​២៧១ ក្នុង​សង្កាត់​ផ្សារ​ដើម​ថ្កូវ ខណ្ឌចម្ការមន រាជធានី​ភ្នំពេញ​។

Loading...

តាម​ប្រភព​ព័ត៌មាន​ពី​នគរបាល បាន​ប្រាប់​ឱ្យ​ដឹង​ថា មុន​ពេល​កើតហេតុ គេ​បានឃើញ​ម៉ូតូ​រ៉ឺ​ម៉ក​ដឹក​ទឹកបរិសុទ្ធ​មួយ​គ្រឿង ដែល​បើកបរ​ដោយ បុរស​ម្នាក់ តាម​បណ្តោយ​ផ្លូវ​លេខ​៥០៦ ក្នុង​ទិស​ដៅ​ពី​កើត​ទៅ​លិច ដោយ​មាន​ដឹក​ទឹក​សុទ្ធ​ជា​ច្រើន​ធុង ពេញ​ខាងក្រោយ​។ លុះ​មក​ដល់​ចំណុច​កើតហេតុ​ខាងលើ​ដែល​ជា​ផ្លូវ​ចំណោត​ខ្លាំង​នោះ បុរស​ជា​អ្នកបើកបរ​ក៏​បាន​រោ​ត​ទិ៍​ហ្គា​ម៉ូតូ​យ៉ាង​ខ្លាំង ដើម្បី​បើក​ឡើង​លើ​ផ្លូវ​លេខ​២៧១ តែ​ឡើង​មិន​រួច ក៏​ស្រាប់តែ​ប៉ះ​ជើង​ច្រងាង​ឡើង​លើ និង​រអិល​ថយក្រោយ​ទៅ​បុក​នឹង​រថយន្ត​ម៉ាក​ហា​យ​ឡែ​ន​ឌ័​រ ពណ៌​ស ពាក់​ស្លាក​លេខ ភ្នំពេញ ២AD-៤១៣៩ មួយ​គ្រឿង​របស់​ស្ត្រី​ម្នាក់​ដែល​ទើបតែ បើក​មក​ពី​យក​កូន​ចេញពី​សាលារៀន​តែ​ម្តង​។

តាម​ប្រភព​ដដែល​បាន​ប្រ​បា់​ឱ្យ​ដឹង​ថា ពាក់ព័ន្ធ​ទៅ​នឹង​ករណី​នេះ ដែរ កើតឡើង​ដោយសារ​តែ​រ៉ឺ​ម៉ក​ម៉ូតូ​បាន​ដឹក​ទឹក​សុទ្ធ​ធ្ងន់​ពេក ណាមួយ​ម៉ូតូ​ស​ណ្តើ​ង​រ៉ឺ​ម៉ក​ក៏​ចាស់​ណាស់​ដែរ​ទើប​ធ្វើ​ឲ្យ បើក​ឡើង​ចំណោត​ផ្លូវ​លេខ​២៧១​មិន​រួច និង​រអិល​ថយក្រោយ​មក​បុក​រថយន្ត​ម៉ាក​ហា​យ​ឡែ​ន​ឌ័​រ​មួយ​គ្រឿង ដែល​បើក​ពីក្រោយ​បណ្តាល​ឲ្យ​ក្រពឹត​ផ្នែក​ខាង​មុខ​រង​ការ​ខូចខាត​យ៉ាងដំណំ​បែប​នេះ ក្រោយ​ពេល​កើតហេតុ បុរស​អ្នក​បើក​រ៉ឺ​ម៉ក​ដឹក​ទឹក​សុទ្ធ​បង្ក​បាន​ចុះ​រត់គេច​ខ្លួន​បាត់​ស្រមោល​ផង​ដែរ​។

ក្រោយ​ពេល​កើតហេតុ កម្លាំង​មាន​សមត្ថកិច្ច​មូលដ្ឋាន ក៏​បាន​ចុះ​មក​ដល់​កន្លែង​កើតហេតុ ធ្វើការ​វាស់វែង​រក​ខុស​ត្រូវ និង​អូស យក​ទាំង​រ៉ឺ​ម៉ក​ដឹក​ទឹក​សុទ្ធ​បង្ក និង​រថយន្ត​ម៉ាក​ហា​យ​ឡែ​ន​ឌ័​រ​រង​គ្រោះ​ទៅ​ដាក់​លើ​ចិញ្ចើម​ផ្លូវ ដើម្បី​ធ្វើការ​ដោះស្រាយ​គ្នា​ភ្លាម​នោះ​ក៏​មាន​អ្នកតំណាង​ខាង​រ៉ឺ​ម៉ក​ដឹក​ទឹក​សុទ្ធ​ម្នាក់​ចេញ​មុខ​មក​ធ្វើការ​ដោះស្រាយ​ផង​ដែរ​។

ក្នុង​ពេល​នោះ​ដែរ​ភាគី​ខាង​រថយន្ត​ម៉ាក​ហា​យ​ឡែ​ន​ឌ័​រ​រង​គ្រោះ បាន​ទាមទារ​សំណង​ថ្លៃ​ជួសជុល​រថយន្ត ដែល​រង​ការ​ខូចខាត​ចំនួន​៣០០​ដុល្លារ ហើយ​ភាគី​ខាង​រ៉ឺ​ម៉ក​ដឹក​ទឹក​សុទ្ធ​សុំ​សង​ត្រឹមតែ​លុយ​ចំនួន ២០០​ដុល្លារ​ប៉ុណ្ណោះ ក៏​យល់ព្រម​ទទួលយក និង​បញ្ចប់រឿង​នៅ​នឹង​កន្លែង​កើតហេតុ​ភ្លាម​ៗ​តែ​ម្តង​៕ ដោយ ៖ ភី ផល