ដំរី​ដឹក​អ្នកទេសចរ​នៅ​តំបន់​រមណីយដ្ឋាន​អង្គរ​នឹង​ចាកចេញ​ទៅ​រស់នៅ​កន្លែង​ថ្មី​​

ខេត្តសៀមរាប ៖ អាជ្ញាធរ​ជាតិ​អប្សរា​កាលពី​ថ្ងៃ​ទី​១៣ វិច្ឆិកា បាន​ចេញ​សេចក្តីជូនដំណឹង​ស្តី​ពី​ការ​ដឹក​ជញ្ជូន​សត្វ​ដំរី​មួយ​ចំនួន​ចេញពីរមណីយដ្ឋាន​អង្គរ ។ សេចក្តីជូនដំណឹង​បានឱ្យ​ដឹង​ថា អស់​រយៈពេល​ច្រើន​ឆ្នាំ​មក​ហើយ ដែល​សត្វ​ដំរី​បាន​ចូលរួមចំណែក​យ៉ាង​សកម្ម​ក្នុង​ការ​បម្រើ​វិស័យ​ទេសចរណ៍​នៅ​រមណីយដ្ឋាន​អង្គរ

Loading...

សត្វ​ដំរី​ទាំងនោះ​មិន​ត្រឹមតែ​ផ្តល់​នូវ​ភាព​ទាក់ទាញ​ដ៏​អស្ចារ្យ​ក្នុង​ការ​ផ្តល់​សេវាកម្ម​សម្បូរ​បែប​ក្នុងរមណីយ ដ្ឋាន​អង្គរ​ ប៉ុណ្ណោះ​ទេ ថែម​ទាំង​បាន​បន្សល់​ទុក​នូវ​អនុស្សាវរីយ៍​ជា​ច្រើន​ដល់​ភ្ញៀវ​ជាតិ​និង​អន្តរជាតិ​ ។ ក្នុង​បរិបទ​ថ្មី​នៃ​ការ​អភិវឌ្ឍ​វិស័យ​ទេសចរណ៍ ក៏​ដូច​ជា​ដើម្បី​លើកកម្ពស់​ជីវិត​នៃ​ការ​រស់នៅ​បែប​ធម្មជាតិ​របស់​សត្វ​ដំរី សមាគម​គ្រប់គ្រង​សត្វ​ដំរី​សហការ​ជាមួយ​អាជ្ញាធរ​ជាតិ​អប្សរា នឹង​ធ្វើការ​ដឹក​ជញ្ជូន​សត្វ​ដំរី​ជា​បណ្តើរ​ៗ​ចេញពី​រមណីយដ្ឋាន​អង្គរ សំដៅ​ទៅ​រក​ការ​បញ្ឈប់​សកម្មភាព​អាជីវកម្ម​ក្នុង​ការ​យក​សត្វ​ដំរី មក​ផ្តល់​ជា​សេវា​ដឹក​ជញ្ជូន​ភ្ញៀវ​ទេសចរ​កម្សាន្ត​ក្នុង​រមណីយដ្ឋាន​អង្គរ នៅ​ដើមឆ្នាំ​២០២០​តទៅ ។

នៅ​ថ្ងៃ​ទី​១៤ ខែវិច្ឆិកា ឆ្នាំ​២០១៩ សមាគម​គ្រប់គ្រង​សត្វ​ដំរី ធ្វើការ​ដឹក​ជញ្ជូន​សត្វ​ដំរី​មួយ​ចំនួន​ចេញពី​រម ណីយដ្ឋាន​អង្គរ​ទៅ​កាន់​ព្រៃ​សហគម​ន៍​បុស្ស​ធំ ស្ថិត​ក្នុង​ឃុំ​ខ្នារ​ពោធិ៍ ស្រុក​សូទ្រនិគម ខេត្តសៀមរាប ដើម្បី​ឱ្យ​សត្វ​ដំរី​រស់នៅ​តាម​លក្ខណៈ​ធម្មជាតិ​និង​ក្រោម​ការ​មើលថែ​ទាំ​របស់​សមាគម​គ្រប់គ្រង​សត្វ​ដំរី ។ ដោយ ឡែក​សត្វ​ដំរី​ដែល​នៅ​សល់ នឹង​ដឹក​ជញ្ជូន​ចេញពី​រមណីយ​ដ្ឋា​ន​អង្គរ​ជា​បន្តបន្ទាប់​នា​ពេល​ក្រោយ ។