បទ​ «​ផ្ការំដួល​» ចម្រៀង​រំលេច​ផ្កា​និមិត្ត​រូប​​ជាតិ

រាជធានី​ភ្នំពេញ ៖ «​ផ្ការំដួល​» លេចធ្លោ​ឡើង​ដោយ​ប្រណីតភាព​នៃ​សម្រស់ និង​ក្លិន ហើយ​ត្រូវ​បាន​លើកតម្កើង​ជា ​«​ផ្កា​និមិត្តរូប​ជាតិ​» ។ ផ្ការំដួល​ក៏​រំលេច​ឡើង​ដែរ​ តាម​រយៈ​បទ​ចម្រៀង​ថ្មី​មួយ​ចេញផ្សាយ​នៅ​ថ្ងៃ​ទី​១៦ ខែវិច្ឆិកា ឆ្នាំ​២០១៩​នេះ​ហើយ ។ តាមរយៈ​ផេ​ក​ហ្វេ​ស​ប៊ុ​ក​ Ma Chanpanha-​ ម៉ា ច័ន្ទ​បញ្ញា សូម​ស្ដាប់​បទ​«​ផ្ការំដួល​»​ពីរោះ​គាប់​ត្រចៀក​ទេ ?

Loading...

បទ​ «​ផ្ការំដួល​» និពន្ធ​ទំនុកច្រៀង និង​បទ​ភ្លេង​ដោយ​លោក​សំ សុភា​រិ​ន្ទ និង​ច្រៀង​ដោយ​លោក​ម៉ា ច័ន្ទ​បញ្ញា ។ បទ​«​ផ្ការំដួល​» ជា​និមិត្តរូបារម្មណ៍​មួយ​នាំ​អារម្មណ៍​អ្នក​ស្ដាប់​ឲ្យ​ហាក់​ឃើញ​សម្រស់ ពណ៌ និង​ក្លិន​នៃ​ផ្ការំដួល តាម​រយៈ​ទឹម​ដម​សំនៀង​របស់​ម៉ា ច័ន្ទ​បញ្ញា​។ បទ​ចម្រៀង​ដែល​តម្កល់​តម្កើង​ផ្កា​និមិត្តរូប​ជាតិ​មួយ​នេះ ហើយ​ក៏​ជា​បទ​ដែល​ទាំង​អ្នកនិពន្ធ និង​អ្នក​ច្រៀង ត្របាញ់​វេញ​ទេព​កោសល្យ​ចង់​បំពេញចិត្ត​អ្នក​ស្ដាប់ ។ វ័យ​ណា ឋានៈ​ណា បទ​ផ្ការំដួល មិន​បែងចែក​សម្រាប់​ការ​ស្ដាប់​កម្សាន្ត​នោះ​ទេ ។

រំដួល​ផ្កា​ដែល​សក្ដិ​សម​ចាត់ទុកជា​ផ្កា​និមិត្តរូប​ជាតិ ហើយ​ក៏​សក្ដិ​សម​ដែល​តម្កើង​តាម​រយៈ​ចម្រៀង គឺ​បទ​«​ផ្ការំដួល​» ។

លោក​សំ សុភា​រិ​ន្ទ «​ប្រលោមលោក កំណាព្យ​… វា​ហាក់​ថ្នឹក​ដៃ​សម្រាប់​ខ្ញុំ តែ​ជា​លើក​ដំបូង​ហើយ​ដែល​សាកល្បង​រាវរក​បទ​ភ្លេង​ថ្មី​មួយ​នេះ វា​ជា​ការ​លំបាក​ខ្លាំង ហើយ​ព្យាយាម​ប្រមាណ​៣​រាត្រី ។ តន្ត្រីករ ​គឺជា​អ្នក​ជួយ​សម្រួល​ឲ្យ​ចេញ​ជា​សាច់​បទ​ភ្លេង​មួយ​នេះ​ឡើង ។ ម៉ា ច័ន្ទ​បញ្ញា ជា​អ្នក​ច្រៀង​ផ្ទាល់​ក៏​ជួយ​សម្រួល​របៀប​ច្រៀង បន្ថែម​ភាព​ពីរោះ​ចំពោះ​បទ​នេះ ។ស្ថិត​ក្នុង​កម្រិត​ណា ក៏​វា​ជា​មោទនភាព​មួយ​ចំពោះ​ស្នាដៃ​ដំបូង​បង្អស់​របស់ខ្ញុំ​នេះ​» ។

ជា​ទូទៅ​អ្នកនិពន្ធ​បទ​ភ្លេង​ប្រើប្រាស់​ឧបករណ៍​តន្ត្រី​ដើម្បី​រាវរក​បទ និង​ភាព​ពីរោះ​របស់​វា ចំណែក​លោក​សំ សុភា​រិ​ន្ទ ប្រើប្រាស់​មាត់​របស់​លោក​ច្រៀង ចុះឡើង​ៗ​ទៅ​តាម​ទំនុក​ដែល​លោក​តែង​រួច ហើយ​ថត​ទុក​តាម​ទូរស័ព្ទ ។ លុប​ចោល​ច្រើន​លើក ច្រើន​សា ទម្រាំ​បាន​លំនាំ​ច្រៀង​មួយ​សម​ល្មម​​ចិត្ត​ហើយ ទើប​រក្សា​វា​ទុក​។ លោក​យក​លំនាំ​ច្រៀង​នេះ​ឲ្យ​អ្នកជំនាញ​ខាង​តន្ត្រី​ជួយ​សម្រួល​ឲ្យ​ចេញ​ជា​សាច់​បទ​ភ្លេង​មួយ​ឡើង ។

ម៉ា ច័ន្ទ​បញ្ញា ទាំង​និពន្ធ ទាំង​ច្រៀង គឺជា​ជំនាញ​របស់​លោក ហើយ​លោ​កថា ​បន្ទាប់​ពី​បាន​ស្ដាប់​របៀប​​ច្រៀង​ដើម​នៃ​បទ​ «​ផ្ការំដួល​» លោក​ជួយ​កែ​ច្នៃ ខ្លះ​ៗ​ប្រាថ្នា​ចង់​ឲ្យ​វា​កាន់តែ​ពីរោះ​ឡើង​។ អ្នកនិពន្ធ​ផ្ទាល់​ពេញចិត្ត​ចំពោះ​ការ​ជួយ​បន្ថែម​ភាព​ពីរោះ​ទៅ​លើ​បទ​នេះ ។

តន្ត្រីករ​ដែល​ជួយ​សម្រួល និង​ដំឡើង​សាច់ភ្លេង សម្ដែង​ក្ដី​រីករាយ​ដែល​បាន​ជួយ​ឲ្យ​ចេញ​ជា​បទ​ភ្លេង​អាច​ច្រៀង​ចេញ​​ជា​បទ​ចម្រៀង​មួយ​បទ​ឡើង ។ ទម្រាំ​ឲ្យ​ចេញ​ជា​សាច់​បទ​ភ្លេង គឺ​លោក​បាន​ជួយ​សម្រួល​ពី​ទម្រង់​ដើម​របស់​អ្នកនិពន្ធ ពី​លក្ខណៈ ឡើង​ចុះ​ៗ​តាម​អារម្មណ៍​របស់​អ្នកនិពន្ធ ឲ្យ​វារ​លូន​ទៅ​តាម​លក្ខណៈ​បទ​តន្ត្រី ។

ចំណែក​មួយ​នៃ​បទ​ «​ផ្ការំដួល​» ដែល​តែង​នៅ​រាត្រី​ថ្ងៃ​ព្រហស្បតិ៍ ទី​៣០ ខែវិច្ឆិកា ឆ្នាំ​២០១៧ នេះ អ្នកនិពន្ធ​សំ សុភា​រិ​ន្ទ ចង់​ឲ្យ​មហាជន​ខ្មែរ ក៏​ដូច​ជា​ជនបរទេស ស្គាល់​ច្បាស់​ថា​ ផ្ការំដួល​ជា​និមិត្ត​រូប​ជាតិ​កម្ពុជា ហើយ​ក៏​ដូច​ជា​រួមចំណែក​ជួយ​ផ្សាយ​ជាមួយ​ក្រសួងទេសចរណ៍ និង​ក្រសួង​វប្បធម៌ ផង​ដែរ ។ ប្រទេស​កម្ពុជា​បាន​កំណត់​យក ​«​ផ្ការំដួល​» ​ជា​ផ្កា​តំណាង​អត្តសញ្ញាណ​របស់​ជាតិ តាម​ព្រះរាជក្រឹត្យ​ចុះ​ថ្ងៃ​ទី​២១ ខែមីនា ឆ្នាំ​២០០៥ ។

ទាំង​អ្នកនិពន្ធ និង​អ្នក​ច្រៀង ផ្ដល់​ជូន​ប្រិ​យ​មិត្ត​អ្នក​ស្ដាប់​នូវ​បទ​«​ផ្ការំដួល​» ហើយ​ប្រាថ្នា​ឲ្យ​ទទួល​យក​គ្រាន់​ជា​គ្រឿង​កម្សាន្ត​អារម្មណ៍​ដោយ​រីករាយ ឬ​ស្ដាប់​គ្រាន់​ជា​ការ​លើកទឹកចិត្ត​ចំពោះ​ការ​ខំប្រឹង​ប្រែង​បង្កើត​ស្នាដៃ​សិល្បៈ​មួយ​នេះ ៕ (​កែសម្រួល​ដោយ ៖ បុប្ផា​)

ផ្ការំដួល – Romdoul Flower by MCP ft. សំ សុភារិន្ទ

បទថ្មី របស់ខ្ញុំ!!! «ផ្ការំដួល» ពីអ្នកនិពន្ធ សំ សុភារិន្ទ។ ចុចស្ដាប់ទាំងអស់គ្នា។

បាន​បង្ហោះ​ដោយ Ma Chanpanha ម៉ា ច័ន្ទបញ្ញា នៅ សុក្រ 15 វិច្ឆិកា 2019