អាដុលហ្វ៍ ហ៊ីត្លែរ មេដឹកនាំ​ដ៏​មហា​វិនាសកម្ម​ក្នុង​ពិភពលោក

មាន​អ្នកខ្លះ​មាន​មតិ​ថា ត្រូវ​បិទ​បាំង​មិន​ឲ្យ​ក្មេង​ៗ​ដឹង​រឿងរ៉ាវ​អំពី​មនុស្ស​បិសាច​ឃោរឃៅ​ដូច​អា​ដុល​ហ្វ៍ ហ៊ី​ត្លែរ ទេ ។ ពេល​ខ្លះ​គេ​និយាយ​ថាបើ​សរសេរ​អំពី​មនុស្ស​បែប​នេះ​គឺជា​ការលើកតម្កើង​មនុស្ស​បិសាច​ហើយ​នាំ​អោយ​គេ​ចង់​យកតម្រាប់​តាម ក៏​ប៉ុន្តែ​អា​ដុល​ហ្វ៍ ហ៊ី​ត្លែរជា​មនុស្ស​ធ្លាប់​បាន​រស់នៅ​ជាក់ស្តែង​ប្រាកដ​ណាស់ ។ យើង​មិន​អាច​កែប្រែ​ប្រវត្តិសាស្ត្រ​បាន​ទេ ។ បើ​យើង​បិទ​ភ្នែក​ហើយ​មិន​ព្រម​មើល​អំពើ​ប្រព្រឹត្ត​ជាក់ស្តែង​របស់​ហ៊ី​ត្លែរ ក៏​មិន​មានន័យ​ថា​យើង​លុប​បំបាត់​អំពើ​នោះ​បាន​ដែរ ។

Loading...

ផ្ទុយ​ទៅ​វិញ វា​ជា​ការ​ប្រសើរ​ដែល​យើង​ត្រូវ​យល់​ដឹង​អំពី​ប្រវត្តិ​របស់​ហ៊ី​ត្លែរ ទោះជា​រឿង​នោះ​វា​ជា​រន្ធត់​យ៉ាងណា​ក៏​ដោយ ។ ការ​យល់​ដឹង​ពី​អតីតកាល​អាច​ជួយ​ធ្វើ​អោយ​យើងភ្ញាក់ខ្លួន ។ ពេល​ណា​ដែល​មាន​មនុស្ស​បែប​នេះ ចង់​ឡើង​ធ្វើ​ជា​អ្នកដឹកនាំ​របស់​យើង យើងអាច​នឹង​ស្គាល់​បាន​ភ្លាម​នូវ​ហេតុ ភេទ​ដែល​បញ្ជាក់​អោយ​ដឹង​ពី​មហិច្ឆតា​លោភលន់​អំណាច​ផុត​លេខ​របស់​មនុស្ស​នោះ​បាន ។ ស្គាល់​មុខ​ស្គាល់​មាត់​របស់​មនុស្ស​កំណាច ស្គាល់ “​មុខបិសាច​” អាច​អោយ​យើង​ត្រៀមខ្លួន​ជា​មុន​ការពារ​មនុស្សលោក​ប្រឆាំង​នឹង​អំពើ​ព្រៃផ្សៃ​របស់​វា ។ ពេល​កាន់​អំណាច​ឡើង​ដល់​កំពូល ហ៊ី​ត្លែរ​បាន​ប្រកាស​ដោយ​មោទនភាព​ថា​ខ្លួន​នឹង​កសាង​អាណាចក្រ​ថ្មី​មួយ​សំរាប់​ប្រទេស​អា​ល្លឺ​ម៉​ង់​ដែល​អាច​មាន​អាយុ​១០០០​ឆ្នាំ ។

ហ៊ី​ត្លែរធ្លាប់​អួត​ថា ប្រជាជន​អា​ល្លឺ​ម៉​ង់​ដែល​ជា​ពូជសាសន៍ “​មហា​មនុស្ស​” ។ ពួក​គេ​មុខជា​កាន់កាប់
ត្រួតត្រា​ពិភពលោក​តែ​ម្តង ។ ពួក​គេ​មុខជា​មាន​ដី​ដាំ​ដំណាំ មានផ្ទះ​សម្បែង​ល្អ​ប្រណីត ហើយ
មាន​លុយ​ច្រើន ។ នេះ​បើ​តាម​សំដី​របស់​ហ៊ី​ត្លែរ ។ បើ​មាន​ប្រជាជន​ណា​ហ៊ាន​រារាំង​ដំណើរ​ឈាន​ទៅ​រក​ភាព​សម្បូរ​សប្បាយ​ដូចដែលគាត់​យល់​ឃើញ ប្រជាជន​នោះ​មុខជា​ត្រូវ​ផ្តន្ទាទោស ។ ប្រជាជន​ទាំងនោះ​ភាគច្រើន​ត្រូវ​កំទេច ហើយ​អ្នក​ដែល​នៅរ​ស់នឹង​ក្លាយ​ខ្លួន​ទៅ​ជា​ទាសករ​របស់​ជនជាតិ​អា​ល្លឺ​ម៉​ង់​ណា​ដែល​ស្មោះត្រង់ និង​គោរព​ដើរ​តាម​អ្នកដឹកនាំ​របស់​ប្រទេស​ជាតិ គឺ​អា​ដុល​ហ្វ៍ ហ៊ី​ត្លែរ ។ ហ៊ី​ត្លែរ​សឹងតែ​ធ្វើ​បាន​ដូច​ពាក្យ​សន្យា​របស់​គាត់ ។ ហ៊ី​ត្លែរ​សឹងតែ​ត្រួតត្រា កាន់កាប់​ពិភព
លោក​បាន​មែន ។ មាន​ពេល​មួយ​នោះ​ហ៊ី​ត្លែរ​ស្ទើរតែ​សំរេច​ជោគជ័យ​ក្នុង​ការ​ប្រយុទ្ធ​រវាង​អំពើ​បិសាច​នឹង​អំពើ​ល្អ ។ ប្រសិនជា​ហ៊ី​ត្លែរ​ឈ្នះ​មែន​នោះ ពិភពលោក​យើង​នេះ​មុខជា​នឹង​ក្លាយទៅជា​ឋាននរក​ជាក់ស្តែង​តែ​ម្តង ។

ហ៊ី​ត្លែរ​ជា​មនុស្ស​ដែល​ពិភពលោក​ស្អប់​តែ​ជា​កូន​សំណព្វ​របស់​ម្តាយ​គាត់

ហ៊ី​ត្លែរ​កើត​នៅ​អូ​ទ្រី​ស​ជិត​ព្រំប្រទល់​ប្រទេស​អា​ល្លឺ​ម៉​ង់ ។ ពេល​កើត​ឪពុក​ឈ្មោះ​អាឡ​យស៍ មាន​អាយុ​៥២​ឆ្នាំ ប្រពន្ធ​គាត់​ឈ្មោះ​ក្លា​រ៉ា ទើបតែ​បាន​អាយុ​២៩​ឆ្នាំ ដែល​មើលទៅ សមជា​កូនស្រី​ជា​ជាង​ប្រពន្ធ​របស់​អាឡ​យស៍ ។ តាម​ពិត​មុន​ពេល​រៀប​ការ​អាឡ​យស៍​ធ្លាប់បាន​ធ្វើ​ជា​ឪពុកចិញ្ចឹម​របស់​ក្លា​រ៉ា ។ គូស្រករ​នេះ​មានកូន​បី​នាក់​ដែល​ស្លាប់​តាំងពី​នៅ​ក្មេង​ៗ ឯ​ហ៊ី​ត្លែរ​ជា​កូន​ទី​៤ ។ ដោយ​ហ៊ី​ត្លែរ​នៅ​រស់​មានជីវិត​គាត់​ក៏​ត្រូវ​បាន​ទទួល​ការ​យកចិត្តទុកដាក់​ជា​ពិសេស​ពី​ឪពុក​ម្តាយ​ពិសេស​ជាងគេ​គឺ​ម្តាយ ។ ពេល​ណា​ឪពុក​ខឹង​ខ្លាំង​រករឿង​គំរាម​កុមារ​ហ៊ី​ត្លែរ នាង​ក្លា​រ៉ា​ជា​ម្តាយ​តែង​ចេញ​ការពារ​កូន​ជា​និច្ច ម្តាយ​បាន​ធ្វើ​អោយ​ហ៊ី​ត្លែរក្លាយទៅជា​កូន​ទំរើស កូន​ចង់បាន​អី​គឺ​ម្តាយ​រក​អោយ​ភ្លាម ម្ល៉ោះហើយ​អា​ដុល​ហ្វ៍ ហ៊ី​ត្លែរ​ដែល​ឪពុក​ម្តាយ​ហៅ​ខ្លី​ថា “​អា​ឌី​”​ក៏​ក្លាយទៅជា “​កូនប្រុស​សំណព្វ​របស់​ម្តាយ​” ។

នៅ​សាលារៀន គ្រូ​ៗ​របស់​ហ៊ី​ត្លែរ​សង្កេត​ឃើញ​ថា​ហ៊ី​ត្លែរ​ជា​សិស្ស​មាន​ប្រាជ្ញា​វាងវៃ​ហើយ​មាន​ចរិត​ត្រឹមត្រូវ ក៏​ប៉ុន្តែ​ដល់​ហ៊ី​ត្លែរ​អាយុ​បាន​១១​ឆ្នាំ ប្អូនប្រុស​ឈ្មោះ​អេ​ត​ម៉ុ​ន ក៏ស្លាប់​ដោយ​កើត​ជំងឺ​កញ្ជ្រឹល តាំងពី​ពេល​នោះ​មក​អត្ត​ចរិត​របស់​ហ៊ី​ត្លែរ​ក៏​បាន​ប្រែប្រួល ។ហ៊ី​ត្លែរ​ប្រហែលជា​បន់​អោយ​ប្អូន​ស្លាប់ ដល់​ប្អូន​ស្លាប់​មែន​ក៏​ស្តីបន្ទោស​ខ្លួនឯង តែ​ទោះជា​យ៉ាងណា​ក៏​ដោយ ហ៊ី​ត្លែរ​ក៏​ក្លាយទៅជា​មនុស្ស​ស្រពាប់​ស្រពោន​ហើយ​មាន​ចរិត​ឆាប់​ខឹង​ច្រលោត គាត់​ឧស្សាហ៍​គំហក​អោយ​មិត្តភក្តិ និង​គ្រូ​ៗ​ថែម​ទៀត ។ រឿងនេះនឹងមានផ្សាយជូននៅវគ្គបន្តទៀត ៕ កែសម្រួលដោយ ៖សុឃាក់