គ្រួសារ​រាជវង្ស​របស់​ប្រទេស​អង់គ្លេស​មានទ្រព្យ​សម្បត្តិ​ស្តុកស្តម្ភ​កម្រិត​ណា

កាលពី​ខែឧសភា ឆ្នាំ​នេះ ក្រុម​គ្រួសារ​រាជវង្ស​របស់​ចក្រភព​អង់គ្លេស​បាន​ស្វាគមន៍​សមាជិក​ថ្មី​ដែល​ជា​កូន​ទី​មួយ​របស់​ព្រះរាជបុត្រ ហារី (Harry) ។ ការ​ស្វាគមន៍​សមាជិក​ថ្មី​នេះ​ប្រៀប​បានជា​រំឭក​ដល់​មនុស្ស​គ្រប់​គ្នា​ពី​ការ​បន្ត​ជំនាន់​របស់​គ្រួសារ​រាជវង្ស​ខាងលើ​ដែល​កើត​មាន​ឡើង​អស់​រយៈពេល​ជា​យូរណាស់​មក​ហើយ ។

Loading...

ជាមួយ​គ្នា​នេះ​ផង​ដែរ វា​ក៏​បាន​រំឭក​ដល់​មនុស្ស​ពី​ទ្រព្យសម្បត្តិ​ដ៏​ស្តុកស្តម្ភ​ដែល​ត្រូវ​បាន​បន្ត​ពី​មួយ​ជំនាន់​ទៅ​មួយ​ជំនាន់​ដែរ ។ យោង​ទៅ​តាម​ទស្សនាវដ្តី Forbes បាន​ឲ្យ​ដឹង​ថា​ម្ចាស់​ក្ស​ត្រី អេ​លី​ហ្សា​បេ​ត ទី​ពីរ (Elizabeth II) មានទ្រព្យ​សម្បត្តិ​សរុប​ប្រមាណ ៥៣០ លាន​ដុល្លារ​នៅ​ឆ្នាំ ២០១៦ ។ ទស្សនាវដ្តី​នេះ​បាន​ឲ្យ​ដឹង​ទៀត​ថា គ្រួសារ​រាជវង្ស​អង់គ្លេស​ចូលរួម​ប្រមាណ ២.៣២ ប៊ី​លាន​ដុល្លារ​ឯណោះ​ទៅ​សេដ្ឋកិច្ច​របស់​ប្រទេស ។

ប្រមាណ ១០៤.៨ លាន​ដុល្លារ​ដែល​បាន​ពី​ការ​បង់ពន្ធ​របស់​ប្រជាជន​ត្រូវ​បាន​ទុក​សម្រាប់​ផ្គត់ផ្គង់​ឲ្យ​ម្ចាស់​ក្ស​ត្រី​សម្រាប់​បំពេញ​តួនាទី​ដូច​ជា​ធ្វើ​ដំណើរ ការ​កម្សាន្ត និង​ការ​មើលថែ​អចលនទ្រព្យ​ជាដើម ។ ប្រាក់​នេះ​ស្មើ ១៥% នៃ​ប្រាក់​ចំណូល​ប្រចាំឆ្នាំ​របស់​ក្រុម​គ្រួសារ​រាជវង្ស ។

ម្ចាស់​ក្ស​ត្រី អេ​លី​ហ្សា​បេ​ត ក៏​មាន​ប្រាក់​ចំណូល​ផ្ទាល់ខ្លួន​ដែរ ហើយ​ថែម​ទាំង​បង់ពន្ធ​ដល់​រដ្ឋាភិបាល​ទៀត​ផង ។ ប៉ុន្តែ​ម្ចាស់​ក្ស​ត្រី​មិនមែន​ជា​ម្ចាស់​កម្មសិទ្ធិ​របស់​វត្ថុ​មាន​តម្លៃ​ផ្សេង​ៗ​ដូច​ជា​ម្កុដ​ឡើយ ។ វត្ថុ​មាន​តម្លៃ​ទាំងនេះ​ស្ថិត​ក្រោម​ការ​គ្រប់គ្រង​របស់​ក្រុម​គ្រួសារ​ទាំងមូល​ហើយ​វា​រួម​មាន​រូបគំនូរ គ្រឿង​សង្ហា​រឹម រូបថត និង​វត្ថុ​មាន​តម្លៃ​រាប់​ពាន់​ទៀត​នៅ​បរមរាជវាំង ។

ប៉ុន្តែ​ម្ចាស់​ក្ស​ត្រី និង​ព្រះរាជបុត្រ ឆាល (Charles) បាន​ទទួល​រង​ការ​រិះគន់​យ៉ាង​ខ្លាំង​ទាក់ទិន​នឹង​ការ​វិនិយោគ​នៅ Bermuda និង​កោះ Cayman ។ យោង​ទៅ​តាម BBC បាន​ឲ្យ​ដឹង​ថា ថវិកា​មួយ​ចំនួន​ក៏​ត្រូវ​បាន​វិនិយោគ​លើ​ក្រុមហ៊ុន BrightHouse ដែល​ត្រូវ​បាន​ចោទប្រកាន់​ថា​ផ្តល់​ប្រាក់​កម្ចី​ដោយ​មិន​មាន​ទំនួល​ខុស​ត្រូវ និង​ក្រុមហ៊ុន Threshers ដែល​មិន​បង់ពន្ធ​រដ្ឋាភិបាល​ចក្រភព​អង់គ្លេស​ជាដើម ៕ កែសម្រួល​ដោយ ៖ សុ​ឃា​ក់