រន្ធត់! មនុស្ស​​៣៥​នាក់​កំពុង​ជួប​ជុំ​គ្នា​ក្នុង​ផ្ទះ ស្រាប់តែ​បាញ់​​ស្លាប់​ របួស​ជា​ច្រើន

សហរដ្ឋអាមេរិក ៖ ប៉ូលិស​ថ្លែង​ថា ​មនុស្ស​វ័យក្មេង​៤​នាក់​បាន​ត្រូវ​ស្លាប់​កាលពី​យប់​ថ្ងៃ​ទី​១៧​វិច្ឆិកា ក្នុង​ការ​បាញ់ប្រហារ​មួយ​លើ​បណ្ដា​មនុស្ស​ដែល​កំពុង​ជួបជុំ​គ្នា ក្នុងផ្ទះ​មួយ​នៃ​ទីក្រុង​FRESNO​រដ្ឋ​កាលី​ហ្វ័​រ​នី​ញ៉ា​។ ក្រៅពី​អ្នក​ស្លាប់​ មាន​មនុស្ស​៦​នាក់​ទៀត​រង​របួស​។

Loading...

យោង​តាម​លទ្ធផល​ដំបូង​ៗ​នៃ​ការ​ស៊ើ​ប​អង្កេត​ថា ជនសង្ស័យ​ម្នាក់​ឬ​ច្រើន​នាក់​បាន​លុក​ចូល​ក្នុង​ផ្ទះ​មួយ ដែល​មានការ​ជួបជុំ​គ្នា​របស់​មនុស្ស​ប្រមាណ​ជា​៣៥​នាក់ ក្នុង​នោះ​មាន​កុមារ​ច្រើន​នាក់​ផង​ដែរ ដើម្បី​តាមដាន​ការ​ប្រកួត​បាល់ទាត់​មួយ ពេល​មានការ​ជួបជុំ​សាច់ញាតិ​គ្រួសារ​។

ជន​វាយប្រហារ​បន្ទាប់​មក​បាន​បាញ់​ក្នុង​សួនច្បារ​ជា​កន្លែង​មាន​មនុស្ស​ច្រើន ក្នុង​ចំណោម​មនុស្ស​ទាំងនេះ​បណ្ដាល​ឲ្យ​១០​នាក់​ត្រូវ​គ្រាប់​។ មនុស្ស​៣​នាក់​ស្លាប់​នៅ​នឹង​កន្លែង​ដែល​ពួក​គេ​សុទ្ធតែ​ជា​បុរស ហាក់​មាន​ដើម​កំណើត​ពី​អា​ស៊ី​មាន​អាយុ​ពី​២៥​ទៅ​៣០​ឆ្នាំ ហើយ​មនុស្ស​ទី​៤​បាន​ស្លាប់​នៅ​មន្ទីរពេទ្យ​។

ចំណែក​មនុស្ស​៦​នាក់​ទៀត​រង​របួសស្រាល​។ ជន​វាយប្រហារ​នៅ​ពុំ​ទាន់​ស្គាល់​អត្តសញ្ញាណ​នៅឡើយ ដោយ​បាន​រត់គេច​ខ្លួន​ហើយ​ពួក​អ្នក​ស៊ើ​ប​អង្កេត​ប៉ុនប៉ង​ស្វែងរក​ដាន ដោយ​ពិនិត្យ​បណ្ដា​វី​ដេ​អូ​ត្រួតពិនិត្យ​និង​ដោយ​សាកសួរ​អ្នក​ជិតខាង​ច្រើន​នាក់​។

ការ​បាញ់ប្រហារ​ថ្មី​នោះ​កើត​មាន​តែ​ប៉ុន្មាន​ថ្ងៃ​ប៉ុណ្ណោះ បន្ទាប់​ពី​ការ​បាញ់ប្រហារ​ក្នុង​វិទ្យាល័យ​មួយ​នៃ​ទីក្រុង​សាន់​តា​ក្លា​រី​តា​ជិត​ក្រុង​ឡូ​ស​អេ​ន​ចឺ​ឡេ​ស​បណ្ដាល​ឲ្យ​សិស្ស​វិទ្យាល័យ​២​នាក់​ស្លាប់​និង​របួស​ច្រើន​នាក់​មក​៕ (​កែសម្រួល​ដោយ ៖ បុប្ផា​)