សំណុំរឿង​លោក កឹ​ម សុខា អាច​បើក​សវនាការ​​…

រាជធា​នីភ្នំពេញ​ ៖ ​លោក ​កឹ​ម សុខា អតីត​ប្រធាន​គណបក្ស​សង្គ្រោះ​ជាតិ​ អាច​នឹងត្រូវ​បាន​ស្នើ​សុំ​លើក​លែងទោស​ពាក់ព័ន្ធ​នឹង​សំណុំរឿង​របស់​លោក នៅ​ពេល​តុលាការ​ដំណើ​រការ​នីតិវិធី​បាន​បញ្ចប់​ជា​ស្ថា​​ពរ​ ។ ​នេះ​បើ​តាម​លោក​ សុខ ​ឥ​សាន ​ អ្នកនាំពាក្យ​គណបក្ស​ប្រជាជន​កម្ពុជា​ ។

Loading...

លោក សុខ ឥ​សាន​ បាន​ឲ្យ​ដឹង​នៅ​ថ្ងៃ​ទី​១៧ ខែវិច្ឆិកា ​ឆ្នាំ​២០១៩ថា​ ៖ «​ករណី​លោក​ កឹ​ម​ សុខា​ គឺ​ស្ថិត​នៅ​ក្នុង​ដៃ​តុលាការ​ ​ទោះបីជា​តុលាការ​បាន​បញ្ចប់​ការ​ស៊ើបសួរ​ក្តី​ ។ ​ប៉ុន្តែ​យ៉ាងណា​ក្តី​ក្រោយ​ពេល​តុលាការ​បញ្ចប់​ការស៊ើបសួរ​ហើយ​មានរបាយការណ៍​ច្បាស់លាស់​ហើយ មាន​ន័យ​ថា​រឿង​នោះ​បាន​បញ្ចប់​ហើយ ហើយនឹង​ឈាន ទៅ​បើក​សវនាការនៅ​ពេល​ខាង​មុខ ដែល​ជា​សិទ្ធិ​របស់​តុលាការ ដែល​យើង​មិន​អាច​ប៉ាន់ស្មាន​បាន​ទេ តែ​ចុង​ក្រោយ​គឺ​ស្ថិត​ក្នុង​ការ​កាត់សេចក្តី​ហ្នឹងឯង​»​ ។

ទាក់ទិន​នឹង​សំណួរ​ថា​ តើ​អាច​នឹង​មានការ​ចរចា​ផ្នែក​នយោបាយ​ណាមួយ​ ចំពោះ​ករណី​​​លោក​ កឹ​ម សុខា ដើម្បី​ឲ្យ​មាន​សិទ្ធិ​ធ្វើ​នយោ​បាយ​ឡើង​វិញ​ដែរឬទេ ?​ លោក សុខ ឥ​សាន​ ​​បញ្ជាក់​ថា​ ​រឿង​លោក កឹ​ម សុខា​ គឺ​ឲ្យ​ចប់​ផ្លូវ​ច្បាប់​សិន ហើយ​បញ្ហា​បន្ត​ទៀត​គឺ​យើង​មានគោល​នយោបាយ​បង្រួបបង្រួម​ជាតិ​ជាមួយ​កម្លាំង​​​នយោបាយ​ទាំងអស់​ដែល​មាន​អាទិភាព​នៅ​កម្ពុជា ដោយ​មិន​រើសអើង​នោះ​ទេ ។

លោក សុខ ឥ​សាន​ ​បាន​គូសបញ្ជាក់​ថា​៖ «​យើង​ផ្សះផ្សា​គឺ​ផ្អែក​លើក​គោលការណ៍​លទ្ធិ​ប្រជាធិប​​តេយ្យ និង​គោលការណ៍​ច្បាប់ ។ ឧទាហរណ៍​ បើ​លោក កឹ​ម សុខា​ បាន​កាត់​សេចក្តីរួច​ហើយ ជាប់គុក​ប៉ុន្មាន​ឆ្នាំ​ៗ អា​ហ្នឹង​យើង​​អនុវត្ត​តាម​ច្បាប់ ពេល​អនុវត្ត​ហើយ សម្តេច​​​តេ​ជោ​ ហ៊ុន សែន​ ក្នុង​នាម​ជា​នាយក​រដ្ឋ​មន្ត្រី​​ មាន​ឆន្ទា​នុ​សិទ្ធិ​ក្នុង​ការ​ធ្វើ​លិខិត​ដើម្បី​ថ្វាយ​ព្រះ​មហាក្សត្រ ដើម្បី​ស្នើ​សុំ​លើកលែងទោស​»​។ លោក​បន្ថែម​ថា​ នៅ​ពេល​ដែល​លោក ​កឹម សុខា​ ត្រូវ​បាន​តុលាការ​កាត់ទោស​ហើយ​ត្រូវ​បាន​ស្នើ​សុំ​នោះ​ គឺ​គោរព​តាម​ច្បាប់​រដ្ឋធម្មនុញ្ញ​ដែល​មាន​ចែង​ ។

លោក​ សុខ ឥ​សាន ថ្លែងថា​ ៖ «​ចំណុច​ទាំងនេះ​ហើយ​គឺ​យើង​ចង់​ផ្សះផ្សា​ជាតិ​ ។ ពេល​លើកលែង​ទោស​ហើយ​ កឹម សុខា​ មាន​សិទ្ធិ​សេរីភាព​ពេញលេញ​ក្នុង​ការ​ធ្វើ​សកម្មភាព​នយោបាយ ។ នេះ​ជា​គោល​ការណ៍​លទ្ធិប្រជាធិបតេយ្យ និង​គោលការណ៍​ច្បាប់​ គឺ​គ្មាន​ខុស​នោះ​ទេ​»​ ។ចំពោះ​សំណួរ​ថា​ តើ​សម្តេច​អាច​នឹង​លើក​លែងទោស​ដែរ​ឬទេ ?​ លោក​ សុខ ឥ​សាន ​បញ្ជាក់​ថា​ ត្រង់​ចំណុច​នេះ​ខ្ញុំ​មិន​អាច​បញ្ជាក់​បាន​ទេ មាន​តែ​សម្តេច​បានដឹង ។ តែខ្ញុំ​យល់​ថា​ មនោសញ្ចេតនា ចិត្ត​សន្តោស​ប្រ​ណី​របស់​សម្តេច តែងតែមាន​ជា​ប្រចាំក្នុង​នាមជា​អ្នកដឹកនាំប្រទេស ចំពោះ​អ្នកនយោបាយ និង​គ្រប់​គណបក្ស​នយោបាយ ​។

អុី​ចឹង​​ទេ​ យើង​មាន​​សង្ឃឹម ​តែ​យើង​មិន​អាច​អារ​កាត់​ជំនួស​សម្តេច​​ទេ​ ។ យើង​ឃើញ​ហើយ​ថា​ ទោះបី​ទណ្ឌិត​ សម រ​ង្ស៊ី មានការ​ប្រ​ទូស​្ត​រ៉ាយ​មួយ​គ្នា ក៏​សម្តេចបាន​លើកលែងទោស ដែរ តែ​នៅ​​រយៈ​ពេល​ចុង​ក្រោយ​គឺ​មិន​អាច​លើក លែងទោស​បាន​ទៀត​ទេ ។ លោក​ សុខ ឥ​សាន បញ្ជាក់​ថា​ ៖ «​ចំពោះ​ កឹ​ម សុខា ខ្ញុំ​យល់​ថា​អាច​មាន​លទ្ធភាព​ច្រើន​ជាង ទណ្ឌិត​ សម រ​ង្ស៊ី​ ត្រូវ​បាន​សម្តេច​តេ​ជោ ហ៊ុន​ សែន ស្នើ​ថ្វាយ​លើកលែងទោស​ច្រើន​ជា​ សម រង្ស៊ី​» ​។

សូម​ជម្រាប​ថា​ លោក គី ឫ​ទ្ធី ចៅក្រម​ស៊ើបសួរ​សាលា​ដំបូ​ង​រាជធានី​ភ្នំពេញ កាលពី​ថ្ងៃ​១៥ ខែវិច្ឆិកា ឆ្នាំ​២០១៩ បាន​បិទ​បញ្ចប់​ការ​ស៊ើបសួរ​លើ​សំណុំ​រឿង​ព្រហ្មទណ្ឌ​ចុះ​ថ្ងៃ​ទី​៣ ខែកញ្ញា ឆ្នាំ​២០១៧ ដែល​មាន
​ជន​ត្រូវ​ចោទ​ឈ្មោះ កឹម សុខា ត្រូវ​បាន​ដាក់ឲ្យ​ស្ថិត​នៅ​ក្រោមការ​ពិនិត្យ​ ពី​បទស​ន្ទិ​ដ្ឋិ​ភាពជាមួយ​បរទេស ប្រព្រឹត្ត​នៅ​កម្ពុជានិង​ទីកន្លែង​ផ្សេង​ទៀត កាលពី​អំឡុង​ឆ្នាំ​១៩៩៣ ដល់​ថ្ងៃ​ទី៣ ខែកញ្ញា ឆ្នាំ​២០១៧ បទ
ល្មើស​ព្រហ្មទណ្ឌ​ដែល​មាន​ចែងនិង​ឲ្យ​ផ្តន្ទា​ទោស​តាម​បញ្ញត្តិ​មាត្រា​៤៤៣នៃក្រមព្រហ្មទណ្ឌនៃ​ព្រះរាជា​ណាចក្រ​កម្ពុជា នោះយើង​បានសម្រេច​បិទ​ការ​ស៊ើបសួរ​ចាប់ពី​ពេល​នេះ​តទៅ​ ។

លោក កឹ​ម សុខា ​បាន​​ជាប់​​ពន្ធនាគារ​ត្រពាំង​ផ្លុ​ង​ ក្នុង​ខេត្ត​ត្បូងឃ្មុំ កាលពី​ចុងឆ្នាំ​២០១៧ បន្ទាប់​ពី​អាជ្ញាធរ​កម្ពុជា​ចោទ​ប្រកាន់​ក្នុង​អំពើ​ក្បត់​ជាតិ​ដែល​ប​រទេស​នៅ​ពី​​ក្រោយ​​ខ្នង ។ បន្ទាប់​ម​ក​លោក​ត្រូវ​បាន​សមត្ថកិច្ច​ដឹក​​យក​​មក​បន្តឃុំខ្លួន​នៅក្នុងផ្ទះ​អស់​ប្រមា​ណ​​១​ឆ្នាំទៀត​ ហើយ​ទើប​បន្ធូរ​បន្ថយលក្ខខណ្ឌ​ច្បាប់​កាលពី​ថ្ងៃ​១០ ខែវិច្ឆិកា ឆ្នាំ​២០១៩​កន្លង​មកនេះ​ ។ ក្រោយ​ពី​តុលាការ​សម្រេច​ឲ្យ​នៅ​ក្រៅ​ឃុំ​ជា​បណ្តោះ​​អាសន្ន​ កាលពី​ថ្ងៃ​១០ ​ខែវិច្ឆិកា​កន្លង​មកនេះ​ភ្លាម លោក ​កឹ​ម សុខា​ ត្រូវ​បាន​តំណាង​ស្ថាន​ទូត​​មួយ​ចំនួន​​ចូល​ជួប​សួរ​សុ​ខ​ទុក្ខ​​ជា​បន្ត​បន្ទាប់ ។

ថ្លែង​ក្នុង​ពិធី​​ប្រគល់​សញ្ញា​បត្រ​​បញ្ចប់​​​ការ​​​សិក្សា​​នៅ​​សាកល​វិទ្យា​ល័យ​​ធនធាន​មនុស្ស​ កាលពី​ព្រឹក​ថ្ងៃ​​ទី១៨ ខែវិច្ឆិកា​​ នៅ​វិទ្យា​ស្ថាន​ជាតិ​អប់​រំ​​សម្តេច​តេជោ​​បាន​គូស​បញ្ជាក់​ទាក់​ទិន​​​នឹង​ករណី​​លោក​ កឹ​ម ​សុខា​ ថា​ នោះ​គ្រាន់តែ​ជា​ការ​បន្ធូរ​បន្ថយ​ចំពោះ​មនុស្ស​ម្នាក់​ ដោយ​តុលាការ​បាន​បិទ​ការ​ស៊ើបសួរ​ ។ ក្រោយមក​ មានការ​លើក​ឡើង​និង​មាន​និយាយ​ថា ​នឹង​ត្រូវ​បាន​ដោះ​លែង​អ​ុីចេះ​អ​ុីចុះ​ ប៉ុន្តែ​សូម​ចាំ​ថា​ ដំណើរការ​រឿង​ក្តី​មួយ​នេះ​មិន​អាច​ធ្វើការ​មួយ​ថ្ងៃ​ឬ​ពីរ​ថ្ងៃ មួយ​ខែ​ឬ​ពី​ខែ​ចប់​​ទេ គឺ​​ត្រូវ​ប្រើ​រយៈពេល​វែង​ ។

សម្ដេច​តេជោ​​បញ្ជាក់​ថា​ មាន​អ្នកមួយ​ចំនួន​​លើក​ឡើង​ថា ​បន្តិចទៀត​លោក​ កឹ​ម​ សុខា​ នឹង​ត្រូវ​បាន​ព្រះ​មហាក្សត្រ​លើកលែងទោស​ ។ សូម​បញ្ជាក់​ថា បើ​គ្មាន​ទោស​ផង​តើ​ព្រះមហាក្សត្រ​មាន​អ្វី​ទៅ​លើកលែង​ទោស​ឱ្យ​នោះ​ ។​ សូម​ពន្យល់​ មិន​ទាន់​កាត់ទោស​ផង ​តើ​មានទោស​ឯណា​សម្រាប់​ការ​លើកលែង ?​ លើក លែង​​ការ​ចោទប្រកាន់​ក៏​គ្មាន​ ​យើង​មិនដឹង​ថា​ដំណើរការ​តុលាការ​ពេល​ណា​ ប៉ុន្តែ​តុលាការ​គ្រាន់តែ​បាន​បញ្ចប់​បិទ​សំណុំរឿង​​ស៊ើបអង្កេត​ ដើម្បី​បញ្ជូន​ទៅ​ជំនុំជម្រះ​ ប៉ុន្តែ​ជំនុំ​ជម្រះ​ហើយ​ធ្វើ​ពេល​ណា​ជា​រឿង​របស់​តុលាការ យើង​គ្មាន​សិទ្ធិ​ទៅ​ជ្រៀត​ជ្រែ​ក​ទេ​ ៕ ​