កសិផល​ដំណាំ​តា​ង៉ែ​ន ហៅ​មៀន​ប៉ៃលិន​មានការ​ធ្លាក់​ថ្លៃ​ធ្វើ​ឲ្យ​កសិករ​បារម្ភ​ពី​ជីវភាព​(​មាន​វី​ដេ​អូ​)

ខេត្ត​ប៉ៃលិន ៖ រហូត​មក​ដល់​ពេល​នេះ​គេ​សង្កេត​ឃើញ​តម្លៃ​ទីផ្សារ​កសិផល​ដំណាំ​តា​ង៉ែ​ន ហៅ​មៀន​ប៉ៃលិន​មានការ​ធ្លាក់​ថ្លៃ​គួរ​ឲ្យ​កត់សម្គាល់ ជា​ហេតុ​ធ្វើ​ឱ្យ​ឈ្មួញកណ្តាល​មួយ​ចំនួន ដែល​បាន​កក់​ប្រាក់​ម្ចាស់​ចម្ការ​រួច​ហើយ​ក្នុង​តម្លៃ​ខ្ពស់​បន្តិច​បែរជា​ទម្លាក់​តម្លៃ​ចុះ​វិញ​ធ្វើ​ឱ្យ​ម្ចាស់​ចម្ការ​មិន​អាច​ទទួលយក​បាន​ក៏​បង្ខំចិត្ត​លក់​ឲ្យ​ឈ្មួញ​ដទៃ​ទៀត​ចូល​ទៅ​ប្រមូល​ផល​ទាំង​ចិត្ត​មិន​សប្បាយ​រីករាយ​នោះ​ឡើយ ខណ​:​ឈ្មួញ​ខ្លះ​លើក​ឡើង​ថា ថៃ​ផ្អាក​កា​រប​ញ្ជាំ​ទិញ​មួយ​រយ​:​ពេល​ពោល គឺ​ទិញ​ដែរ​តែ​ទិញ​ក្នុង​តម្លៃ​ទាប ។

Loading...

ជាក់ស្តែង​កាលពី​រសៀល​ថ្ងៃ​ទី​១៩ ខែវិច្ឆិកា​នេះ នៅ​ក្នុង​ចម្ការ​តា​ង៉ែ​ន​ហៅ​មៀន​ប៉ៃលិន​មួយ​កន្លែង ស្ថិត​ក្នុងភូមិ​ក្បាល​ព្រ​លាន សង្កាត់​អូរ​តា​វ៉ៅ ក្រុងប៉ៃលិន ខេត្ត​ប៉ៃលិន ជា​ចម្ការ​របស់​កសិករ​ម្នាក់​ឈ្មោះ ឡោ សុខ​បូ​ន ភេទ​ប្រុស អាយុ​៤៨​ឆ្នាំ រស់នៅ​ភូមិ​ប៉ា​ហ៊ី​ត្បូង សង្កាត់​ប៉ៃលិន ក្រុងប៉ៃលិន​បាន​ម៉ៅ​ឱ្យ​ឈ្មួញ​ជួល​ឱ្យ​កម្មករ​ចូល​ទៅ​ប្រមូល​ផល​នៅ​ចម្ការ​របស់​ខ្លួន ក្នុង​តម្លៃ​ទាប ដើម្បី​យក​ទៅ​លក់ដូរ​នៅ​ប្រទេស​ថៃ ។

បើ​តាម​ប្រភព​ព័ត៌មាន​ពី​លោក ឡោ សុខ​បូ​ន ជា​ម្ចាស់​ចម្ការ បាន​រៀបរាប់​ទាំង​ទឹកមុខ​ស្រពាប់​ស្រពោន​ឲ្យ​ដឹង​ថា គាត់​បាន​ដាំ​ដំណាំ​តា​ង៉ែ​ន​ហៅ​មៀន​ប៉ៃលិន​ជាង​១០០០​ដើម ដោយ​បាន​ដាក់​បញ្ជា​ឲ​យ​ផ្លែ​ជាង​១០០​ដើម​ហើយ ។ ហើយ​កាលពី​ប៉ុន្មាន​ខែ​មុន​មាន​ឈ្មួញ​ម្នាក់​បាន​យក​ប្រាក់​ចំនួន​៣​លាន​រៀល​ទៅ​កក់​ថ្លៃ​ផ្លែ​តា​ង៉ែ​ន​របស់​គាត់​ដោយ​សន្យា​ថា ពេល​ប្រមូល​ផល​គេ​នឹង​ទិញ​ក្នុង​តម្លៃ​១​គីឡូក្រាម​៣៦០០​រៀល ។ ប៉ុន្តែ​រហូត​មក​ដល់​ពេល​នេះ ស្រាប់តែ​ឈ្មួញ​នោះ​បាន​ប្រាប់​គាត់​ថា ខាង​ភាគី​ថៃ​គេ​ផ្អាក​ទិញ​ផ្លែ​តា​ង៉ែ​ន​មួយ​រយ​:​ពេល​សិន​ឲ្យ​រង់ចាំ​រហូត​ដល់​ថ្ងៃ​ទី​២២ ខែវិច្ឆិកា ឆ្នាំ​២០១៩​ខាង​មុខ​នេះ​ទើប​គេ​ទទួល​ទិញ​ក្នុង​តម្លៃ​ខ្ពស់​ដោយ​បច្ចុប្បន្ន​នេះ​គេ​ទិញ​ដែរ តែ​ក្នុង​តម្លៃ​ទាប​ប៉ុណ្ណោះ គឺ​១​គីឡូក្រាម​ត្រឹមតែ​ជាង​២០០០​រៀល​ប៉ុណ្ណោះ ។

លោក​បន្ត​ទៀត​ថា ដោយសារ​កសិផល​តា​ង៉ែ​ន​ផ្លែ​ទុំ​ពេញ​ដើម​អស់ហើយ មិន​អាច​បង្អង់​ចាំ​យូរ​បាន ព្រោះ​បើ​ហួសពេល​អាច​នឹង​ជ្រុះ ឬ​ប្រេះ​បែក​ខូច​ទើប​គាត់​ហៅ​ម៉ូយ​ដទៃ​ទៀត​ចូល​ទៅ​បេះ​ដោយ​ក្នុង​១​គីឡូក្រាម​លក់​បាន​ត្រឹមតែ​២៥០០​រៀល ។

លោក​បញ្ជាក់​ទៀត​ថា ពេល​នេះ​គេ​បាន​ម៉ៅ​ផ្លែ​តា​ង៉ែ​ន​របស់​គាត់​ដោយ​ជាង​១០០​ដើម តម្លៃ​៥​លាន​រៀល ហើយ​គាត់​ដាច់​ចិត្ត​លក់​ទាំង​តម្លៃ​ធ្លាក់​មិន​អាច​ទទួលយក​បាន​តែ​ម្តង ។ លោក​ក៏​សូម​អំពាវនាវ​ដល់​ថ្នាក់ដឹកនាំ​មន្ទីរ​កសិកម្ម​ក៏​ដូច​ជា មន្ទីរ​ពាណិជ្ជកម្ម​ខេត្ត​ប៉ៃលិន ជា​ពិសេស​លោក ផា​ន់ ចាន់​ធុ​ល អភិបាលខេត្ត​ប៉ៃលិន មេត្តា​ជួយ​រក​ទីផ្សារ​កសិផល​ជូន​ប្រជាពលរដ្ឋ​ក្នុង​ខេត្ត​ប៉ៃលិន ដែល​បាន​បង្កបង្កើន​ផល​រួច​តែ​បែរជា​តម្លៃ​មានការ​ធ្លាក់​ចុះ​ស្ទើរតែ​បោះបង់​មុខរបរ​ដំណាំ​កសិកម្ម​នេះ​ចោល​ទៅ​ហើយ ។

ចំណែក​ឈ្មួញកណ្តាល​ម្នាក់​ឈ្មោះ ឡាយ ស្រី​នាង ភេទ​ស្រី អាយុ​៣៥​ឆ្នាំ រស់នៅ​ភូមិ​ផ្សារ​ព្រំ ឃុំ​ស្ទឹង​កាច់ ស្រុក​សាលា​ក្រៅ បាន​រៀបរាប់​ទាំង​ទឹកមុខ​ភ័យ​បារម្ភ​ឲ្យ​ដឹង​ថា គាត់​បាន​ចូល​ទៅ​ម៉ៅ​ទិញ​ផ្លែ​តា​ង៉ែ​ន​នៅ​ក្នុង​ចម្ការ​ខាងលើ​ដោយ​១​គីឡូក្រាម​តម្លៃ​ត្រឹមតែ​២៥០០​រៀល តែ​គិត​ចុះ​គិត​ឡើង​ឃើញ​ថា មិន​អាច​ចំណេញ​បាន​ក៏​សុំ​អង្វរក​ម្ចាស់​ចម្ការ​ម៉ៅ​ផ្លែ​បេះ​វិញ​ម្តង ដោយ​ជាង​១០០​ដើម​នេះ​គាត់​ម៉ៅ​តែ​ចំនួន​៥​លាន​រៀល ហើយ​ក៏​ជួល​កម្មករ​ឲ្យ​ចូល​ទៅ​បេះ ដោយ​គិត​កម្រៃ​ពលកម្ម​ក្នុង​ម្នាក់​១​កញ្ឆេ ទម្ងន់​១០​គីឡូក្រាម​តម្លៃ​៥០០០​រៀល ។

គាត់​បន្ត​ទៀត​ថា ការ​រកស៊ី​ជួញដូរ​ផ្លែ​ឈើ​ពេល​នេះ​ពិតជា​មានការ​លំបាក​ខ្លាំង​ដោយសារ​តែ​ការ​នាំ​ចេញ​ទៅ​លក់​នៅ​ប្រទេស​ថៃ ត្រូវ​បង់ប្រាក់​ចំនួន​៦​កន្លែង រួម​ទាំង​ខ្មែរ និង​ខាង​ថៃ ហើយដោយ​សារ​ថៃ​ទម្លាក់​តម្លៃ​ទៀត​ធ្វើ​ឱ្យ​ការ​រកស៊ី​មុខរបរ​មួយ​នេះ ប្រឈម​នឹង​ការ​ខាតបង់​ច្រើន ប៉ុន្តែ​ដោយសារ​គ្មាន​ការងារ អ្វី​ក្រៅពី​នេះ គាត់​ក៏​ប្រថុយប្រថាន​ទាំង​មានចិត្ត​ព្រួយបារម្ភ​យ៉ាង​ខ្លាំង ។

តាម​ដែល​គាត់​ដឹង គឺ​ខាង​ភាគី​ថៃ​គេ​មិន​ងាយ​ទិញ​កសិផល​យើង​ដោយ​តម្លៃ​ខ្ពស់​នោះ​ទេ ព្រោះ​គេ​ចង់​ឲ្យ​កសិករ​គេ​ប្រមូល​ផល​លក់​បន្ត​ទៅ​ប្រទេស​ចិន​រួចរាល់​ទើប​គេ​ទទួល​ទិញ​កសិផល​ខាង​ខ្មែរ​យើង​ម្តង ដូច្នេះ​ហើយ​ទើប​ធ្វើ​ឱ្យ​កសិផល​របស់​យើង​មានការ​ធ្លាក់​ចុះ​ជា​រៀង​រាល់​ឆ្នាំ ៕ កែសម្រួល​ដោយ ៖ សុ​ឃា​ក់