Cadillac Escalade នឹង​មាន​ម៉ាស៊ីន​ប្រើ​អគ្គិសនី​ក្នុង​ពេល​ឆាប់​ៗ​នេះ

ក្រុមហ៊ុន General Motors គ្រោង​នឹង​ផលិត​រថយន្ត​អគ្គិសនី​ថ្មី ហើយ​មាន​ពាក្យ​ច​ចាម​អារាម​ដាច់​ដោយឡែក​ទាក់ទង​នឹង​រថយន្ត​ម៉ូ​ដែល​៣​ជា​ពិសេស​។ រថយន្ត​ម៉ូ​ដែល Cadillac Escalade ជំនាន់​ក្រោយ​ត្រូវ​បាន​លេចលឺ​ថា នឹង​មាន​ម៉ាស៊ីន​អគ្គិសនី ហើយ​ក្រុមហ៊ុន GM គ្រោង​នឹង​បញ្ចេញ​នូវ​រថយន្ត​ភី​ក​អាប់​អេ​ឡិច​ត្រូ​និ​ច ដែល​អាច​ជា​ម៉ូ​ដែល Chevrolet Silverado ឬ GMC Sierra ផង​ដែរ​។ យីហោ Hummer ក៏​ត្រូវ​បាន​គ្រោង​ធ្វើ​ឱ្យ​មានការ​វិល​ត្រឡប់ ជា​រថយន្ត​អគ្គិសនី ដែល​ជា​ផ្នែក​មួយ​នៃ​ការ​វិនិយោគ​ចំនួន ៣​ពាន់​លាន​ដុល្លារ របស់​ក្រុមហ៊ុន GM ចំពោះ​រថយន្ត​អគ្គិសនី​។

Loading...

សារព័ត៌មាន Detroit បាន​រាយការណ៍​ថា យានយន្ត​អគ្គិសនី​ថ្មី​ទាំង​បី​ប្រភេទ​នេះ គឺ Escalade, Sierra និង Hummer នឹង​ត្រូវ​ប្រមូលផ្តុំ​គ្នា​នៅ​ឯ​រោងចក្រ Detroit-Hamtramck បើ​យោង​តាម​ការ​ស៊ើបការណ៍​ដែល​ប្រមូល​ដោយ​ក្រុមហ៊ុន​ព្យាករណ៍​ឧស្សាហកម្ម LMC Automotive ។

លោក Jeff Schuster អ្នកវិភាគ​ឧស្សាហកម្ម​នៅ​ក្រុមហ៊ុន LMC ជឿ​ថា​រថយន្ត​ភី​ក​អាប់ Hummer នឹង​ចូល​ផលិតកម្ម​នៅ​ឆ្នាំ ២០២១ ដោយ​មាន​រថយន្ត​ពីរ​ប្រភេទ​ទៀត ដែល​ផលិត​នៅ​ក្នុង​ឆ្នាំ​តែ​មួយ​។ រថយន្ត Sierra នឹង​ចូល​ផលិតកម្ម​នៅ​ឆ្នាំ ២០២៣ ប៉ុន្តែ Silverado មិន​ត្រូវ​បាន​លើក​ឡើង​នៅ​ក្នុង​របាយការណ៍​នោះ​ទេ​។ ក្រុមហ៊ុន GM មិន​បាន​ប្រកាស​ជា​សាធារណៈ​អំពី​ផែនការ​របស់​ខ្លួន​សម្រាប់​រោងចក្រ​នេះ ដែល​ដើម​ឡើយ​គ្រោង​នឹង​ទុក​ចោល​រហូត​ដល់​ខែមករា​ឆ្នាំ ២០២០ ។

ជា​ផ្នែក​មួយ​នៃ​ការ​ចរចារ​ជាមួយ​សហជីព United Auto Workers រោងចក្រ​នេះ​គ្រោង​នឹង​បើក​ជា​ថ្មី​ជាមួយនឹង​ការ​វិនិយោគ ៣​ពាន់​លាន​ដុល្លារ​របស់​ក្រុមហ៊ុន GM ដែល​នឹង​បង្កើត​ការងារ​ថ្មី​ចំនួន ២២២៥​កន្លែង​។ លោក Schuster បាន​និយាយ​ថា​៖ “​វា​ពិតជា​ល្អ​សម្រាប់​ទីក្រុង Detroit ហើយ​រោងចក្រ​នេះ​នឹង​មិន​ត្រូវ​បាន​បិទទ្វារ​ទៅ​អនាគត​នោះ​ទេ​។​”

រោងចក្រ​ដំឡើងរថយន្ត Detroit-Hamtramck បច្ចុប្បន្ន​ផលិត​រថយន្ត Chevrolet Impala និង Cadillac CT6 ប៉ុន្តែ​គ្រោង​នឹង​បញ្ចប់​ការ​ផលិត​ម៉ូ​ឌែ​ល​ទាំង​ពីរ ដែល​ចាប់ផ្តើម​ពី​ខែកុម្ភៈ​ឆ្នាំ ២០២០​។ នៅ​ឆ្នាំ ២០២៣ ក្រុមហ៊ុន GM នឹង​ផលិត​រថយន្ត​អគ្គិសនី​សរុប​ចំនួន ២៣​ម៉ូ​ដែល​ដែល​ក្នុង​នោះ​មាន ៥ គ្រឿង នឹង​ត្រូវ​ផលិត​នៅ​រោងចក្រ Detroit-Hamtramck៕