ទីបំផុត អុឹម ជីវ៉ា និង ហេង ឡុ​ង ព្រម​ដោះស្រាយ​បញ្ចប់​ជម្លោះ​ក្រៅ​ប្រព័ន្ធ​តុលាការ

រាជធានី​ភ្នំពេញ ៖ នៅ​ទីបំផុត​តារា​សម្តែង​លោក អ៊ឹម ជីវ៉ា និង​លោក ហេង ឡុ​ង បាន​បញ្ចប់​ជម្លោះ​ក្រៅ​ប្រព័ន្ធ​តុលាការ​ហើយ បន្ទាប់​ពី​ការ​ផ្សះផ្សា​ដោយ​សន្តិវិធី ។ ជម្លោះ​របស់​អ្នក​ទាំង​ពីរ បាន​ឈាន​ទៅ​ដល់​ការ​ចាប់ដៃ​គ្នា​វិញ ដែល​ត្រូវ​បាន​គេ​ដឹង​ថា ដោយសារ​មានការ​ជួយ​ផ្សះផ្សា​ពី​លោក​ជំទាវ ហ៊ុន ស៊ី​ណាត ។

Loading...

បើ​យោង​តាម​ការ​បង្ហោះ​សារ​ពី​លោក អ៊ឹម ជីវ៉ា បានអោយ​ដឹង​ថា «​ខ្ញុំបាទ អ៊ឹម ជីវ៉ា សូម​ជម្រាប​ជូន​សាធារណជន និង​បងប្អូន​អ្នក​សារព័ត៌មាន​មេត្តា​ជ្រាប​ថា ៖ ក្រោយ​ពី​បាន​ជួប​ជជែក​គ្នា​រវាង​ខ្ញុំបាទ មេធាវី និង​ភាគី​លោក ហេង ឡុ​ង ក្នុង​ស្មារតី​ជា​គ្រួសារ​អ្នកសិល្បៈ ភាគី​ទាំងអស់​បាន​សម្រេច​បញ្ចប់​ការ​យល់​ច្រឡំ​គ្នា​នា​ពេល​កន្លង​មក ដោយ​សន្តិវិធី ។

ក្នុង​ន័យ​នេះ​ផង​ដែរ ខ្ញុំបាទ សូម​ធ្វើការ​បំភ្លឺ​ទាក់ទង​នឹង​ការ​យល់​ច្រឡំ​គ្នា​នា​ពេល​កន្លង​មក ដូច​ខាងក្រោម​៖

ទី​១- កាលពី​ថ្ងៃ​ទី 15/11/2019 ខ្ញុំបាទ​ប្រកាស​លាឈប់​ពី​សមាគម​សិល្បៈ ដោយ​ភ្ជាប់​ជាមួយ​ការ​ស្នើ​សុំ​ឲ្យ​មាន​បំភ្លឺ​ចំនួន​៩​ចំណុច ទាក់ទង​នឹង​ការងារ​របស់​សមាគម តាម​រយៈ​គណនី​ហ្វេ​ស​ប៊ុ​ក​របស់​ខ្ញុំបាទ ដែល​ខ្លឹមសារ​ដែល​ខ្ញុំបាទ​បាន Post ធ្វើ​ឲ្យ​មានការ​យល់​ច្រឡំ​ពី​សំណាក់​បង ហេង ឡុ​ង និង​អ្នក​បង ច​ន ច័ន្ទ​ល​ក្ខិ​ណា ថា ជា​ការ​បរិហា​កេរ្តិ៍ ការ​ប្រមាថ និង​ការ​គំរាមកំហែង​ហែកកេរ្តិ៍​ទៅ​វិញ ដែល​ធ្វើ​ឲ្យ​ប៉ះពាល់​អារម្មណ៍​របស់​ពួក​គាត់ ដែល​ជា​បុគ្គល​ស្អាតស្អំ និង​ខិតខំ​ដើម្បី​សិល្បៈ​នា​ពេល​កន្លង​មក ។

ទី​២- ខ្ញុំ​បាន​យល់​ច្បាស់​ថា សកម្មភាព​បណ្តឹងរ​បស់បង ហេង ឡុ​ង និង​អ្នក​បង ច​ន ច័ន្ទ​ល​ក្ខិ​ណា គឺជា​សកម្មភាព​ប្រកប​សីលធម៌ ដោយ​មិន​មាន​ចេតនា​អាក្រក់​ណាមួយ​មក​លើ​ខ្ញុំ​ឡើយ ផ្ទុយ​ទៅ​វិញ​វា​ជា​សិទ្ធិ​ស្របច្បាប់​របស់​ពួក​គាត់​ដែល​ត្រូវ​តែ​ធ្វើ​យ៉ាង​ចាំបាច់​ការពារ​ភាព​ស្អាតស្អំ ភាព​ចាស់​ទុំ និង​កិត្តិយស​របស់​សមាគម ហើយ​ខ្ញុំបាទ​ក៏​មិន​ការ​អាក់អន់ស្រពន់ចិត្ត​អ្វី ។

ទាក់ទង​នឹង​សកម្ម​ភាព​​របស់​ពួក​គាត់​ឡើយ ដោយ​ខ្ញុំបាទ​បាន​យល់​ច្បាស់​ពី​សិទ្ធិ​របស់​ពួក​គាត់​ក្នុង​នាម​ខ្ញុំបាទ​ជា​បញ្ញា​វ័​ន្ត​ម្នាក់​ដែល​បាន​បញ្ចប់​ការ​សិក្សា​បរិញ្ញាបត្រ​ច្បាប់ ផ្ទុយ​ទៅ​វិញ​ខ្ញុំបាទ​យល់​ឃើញ​ថា វា​គឺជា​សេ​ក្តី​ថ្លៃថ្នូរ​មួយ​ដែល​អ្នកសិល្បៈ​មិន​ឈ្លោះ​ហែកហួរ​គ្នា​តាម​បណ្តាញ​សង្គម Facebook ។

ទី​៣- បើ​ទោះបីជា​ខ្ញុំ​បាន​លាឈប់​ពី​សមាគម​សិល្បៈ​ហើយ​ក្តី ប៉ុន្តែ​ខ្ញុំ​នៅ​តែ​ស្រលាញ់​រាប់អាន​បង ហេង ឡុ​ង និង​អ្នក​បង ច​ន ច័ន្ទ​ល​ក្ខិ​ណា ដោយ​ស្មារតី​ជា​គ្រួសារ​អ្នកសិល្បៈ​តែ​មួយ ។

និង​ក៏​សូម​ថ្លែង​អំណរ​អរគុណ​ដល់​អ្នក​ម្តាយ ហ៊ុន ស៊ី​ណាត ដែល​ជា​អ្នក​ម្តាយ​ដែល​មាន​ព្រហ្ម​វិហារធម៌ ដែល​បានអោយ​កូន​សម្រុះសម្រួល​គ្នា ឈប់​តបត​គ្នា ត្រូវ​ចេះ​យោគយល់​គ្នា ចេះ​សាមគ្គី​គ្នា ចាប់ពី​ថ្ងៃនេះ​តទៅ រស់​ក្នុង​ដំបូល​សន្តិភាព​តែ​មួយ ៕ (​កែសម្រួល​ដោយ ៖ បុប្ផា​)