៤ ទម្លាប់​នៃ​ការ​ចាត់ចែង​លុយ​ផ្ទាល់ខ្លួន​របស់​អ្នកមាន

ម្ចាស់​អាជីវកម្ម​មួយ​ណា​ក៏​ចង់​មើលឃើញ​អាជីវកម្ម​ខ្លួន​រីក​ចម្រើន​កាន់តែ​ធំ​ទ​ៗ​ដែរ ប៉ុន្តែ​ផ្នែក​មួយទៀត​ដែល​ជួយ​ឲ្យ​ម្ចាស់​អាជីវកម្ម​មាន​អារម្មណ៍​ថា​ជោគជ័យ​គឺ​ការ​គ្រប់គ្រង​លុយ​ដោយ​មាន​ប្រសិទ្ធិ​ភាព និង​ច្បាស់លាស់ ។

Loading...

យុទ្ធសាស្ត្រ​ចាត់ចែង​លុយ​ដែល​ល្អ​បំផុត​ភាគច្រើន​កើត​ចេញពី​ទម្លាប់​ចាត់ចែង​លុយ​របស់​មនុស្ស ។ តើ​អ្នកមាន​ទ្រព្យសម្បត្តិ​ស្តុកស្តម្ភ​មាន​ទម្លាប់​ចាត់ចែង​លុយ​របស់​ខ្លួន​យ៉ាងដូចម្តេច? ហើយ​តើ​មនុស្ស​សាមញ្ញ​ដូច​យើង​អាច​រៀនសូត្រ​ពី​ពួក​គេ​បាន​យ៉ាងណា?

១. កំណត់​គោលដៅ​ដែល​ជួយ​ជំរុញ​ទឹកចិត្ត​៖
អ្នកមាន ឬ​អ្នក​ពូកែ​ទុកដាក់​លុយ​ភាគច្រើន​តែងតែមាន​ផែនការ​ចាយវាយ​ច្បាស់លាស់​ដោយ​មាន​កំណត់​គោលដៅ​ទាក់ទិន​នឹង​លុយ​សម្រាប់​ខ្លួនឯង ។ អ្នក​ក៏​គួរ​មាន​គោលដៅ​ច្បាស់លាស់​ដែរ និង​មើល​ជា​រៀងរាល់ថ្ងៃ​ថា​អ្នក​កំពុង​តែ​ដើរទៅ​តាម​ទិស​ដៅ​នៃ​គោលដៅ​របស់​អ្នក​ឬទេ? ឧទាហរណ៍​ដូច​ជា​អ្នកមាន​គោលដៅ​កាត់​បន្ថយ​ការ​ចាយវាយ​ក្នុង​ខែ​នេះ​ប្រមាណ ១០០​ដុល្លារ ឬ​បង្កើន​ប្រាក់​ចំណូល​ពី​អាជីវកម្ម​ប្រមាណ ៥០% ជាដើម ។

២. បែងចែក​ប្រាក់​ចំណាយ និង​ប្រាក់​សន្សំ​ឲ្យ​បាន​ច្បាស់លាស់​៖
ការ​មិន​មាន​ផែនការ​ច្បាស់លាស់​ទាក់ទិន​នឹង​ប្រាក់​ចំណាយ និង​ប្រាក់​សន្សំ គឺជា​កំហុសឆ្គង​ធំ​ជាងគេ​ដែល​រាំងស្ទះ​មិន​ឲ្យ​មនុស្ស​ក្លាយជា​អ្នក​មានបាន ។ បញ្ហា​ធំ​ជាងគេ គឺ​មនុស្ស​ភាគច្រើន​មិន​តាមដាន​មើល​ទម្លាប់​នៃ​ការ​ចាយវាយ​របស់​ពួក​គេ ។ ពេល​ដែល​អ្នកដឹង​ច្បាស់​ថា​អ្នក​ចាយវាយ​លើ​អ្វីខ្លះ​នោះ​អ្នក​នឹង​ដឹង​ថា​មាន​ផ្នែក​ណា​ដែល​អ្នក​ចាយវាយ​ខ្ជះខ្ជាយ​ដើម្បី​កែសម្រួល ។

៣. កាត់​បន្ថយ​ហានិភ័យ​ដោយ​បង្កើន​ប្រភព​ចំណូល​៖
យោង​ទៅ​តាម​សៀវភៅ Rich Habits: The Daily Habits of Successful People បាន​ឲ្យ​ដឹង​ថា ប្រមាណ ៦៥% នៃ​មហាសេដ្ឋី​មាន​ប្រភព​ចំណូល​យ៉ាងតិច​ក៏ ៣​ប្រភព​ដែរ និង ២៩ ទៀត​មាន​ដល់​ទៅ ៥ ឬ​ច្រើន​ជាង ៥ ប្រភព​ទៅ​ទៀត ។ ការ​មាន​ប្រភព​ចំណូល​ច្រើន​មាន​ន័យ​ថា អ្នក​អាច​រក​ចំណូល​បាន​ច្រើន ហើយ​ក៏​មាន​ន័យ​ថា​អ្នក​អាច​កាត់​បន្ថយ​ហានិភ័យ​ដែរ ។

៤. តាមដាន​ទីផ្សារ​ឲ្យ​បាន​ច្បាស់​៖
ការ​ស្រាវជ្រាវ​ជា​ច្រើន​បាន​បង្ហាញ​ថា ក្រុមហ៊ុន​ថ្មី​ៗ​ជា​ច្រើន​បាន​បរាជ័យ​ព្រោះតែ​ពួក​គេ​មិន​យល់​ច្បាស់​ពី​តម្រូវការ​ទីផ្សារ ។ ការ​ខ្វះខាត​ការ​យល់​ដឹង​ទាំងនេះ​អាច​ប៉ះពាល់​ទាំង​អាជីវកម្ម​អ្នក និង​ចំណូល​ផ្ទាល់ខ្លួន​របស់​អ្នក ។ អ្នក​ដែល​មានទ្រព្យ​សម្បត្តិ​ស្តុកស្តម្ភ​មិន​ដែល​មើល​រំលង​ទីផ្សារ​ទេ ដូច​ជា​អត្រា​ការ​ប្រាក់​ជាដើម​ព្រោះ​វា​នឹង​ប៉ះពាល់​ដល់​ប្រាក់​កម្ចី​សម្រាប់​បើក​អាជីវកម្ម ឬ​ទិញ​ផ្ទះ ៕ កែសម្រួល​ដោយ ៖ សុ​ឃា​ក់