ព្រឹត្តិការណ៍​ប្រណាំង​កង់​ពិភពលោក​តំបន់ឆ្នេរ​សមុទ្រ​កម្ពុជា​​ នឹង​បញ្ចប់​នៅ​​កែប

374

រាជធានី​ភ្នំពេញ ៖ ក្រសួងទេសចរណ៍​សហការ​ជាមួយ​ក្រសួង​ស្ថាប័ន​ពាក់ព័ន្ធ​និង​គណៈ​កម្មាធិ​ការ​ជាតិ​អូ​ឡាំ​ពិ​ក​កម្ពុជា បាន​បង្កើត​ឲ្យ​មាន​ព្រឹត្តិការណ៍​ប្រណាំង​កង់​ពិភពលោក​តំបន់ឆ្នេរ​សមុទ្រ​កម្ពុជា​លើក​ទី​១ ដែល​នឹង​ចាប់ផ្តើម​ពី​ថ្ងៃ​ទី​៤ ដល់​ថ្ងៃ​ទី​៦ ខែមករា ឆ្នាំ ២០២០ ។

Loading...

លោក វ៉ា​ត់ ចំរើន អគ្គលេខាធិការ​គណៈក​ម្មា​ធិ​ការ​ជាតិ​អូ​ឡាំ​ពិ​ក​កម្ពុជា​បាន​ថ្លែងប្រាប់​នៅ​ក្នុង​សន្និ​សីទ​សារព័ត៌មាន​កាលពី​ល្ងាច​ថ្ងៃ​ទី​២២ វិច្ឆិកា ថា នេះ​ជា​ព្រឹត្តិការណ៍​កីឡា​ទេសចរណ៍​កម្រិត​ខ្ពស់​និង​ជា​លើក​ទី​១​ដែល​កម្ពុជា​រៀបចំ​ដើម្បី​ទាក់ទាញ​អ្នកទេសចរ​ក៏​ដូច​ជា​ក្នុង​គោល បំណង​ផ្សព្វ​ផ្សាយ​ពី​សក្តានុពល​ទេសចរណ៍​របស់​ប្រទេស​កម្ពុជា​ផង​ដែរ ។ ព្រឹត្តិការណ៍​នេះ​នឹង​ក្លាយទៅជា​ព្រឹត្តិការណ៍​ប្រចាំឆ្នាំ ខណៈ​ការ​ប្រណាំង​ធ្វើ​ឡើង​នៅ​តាម​ខេត្ត​ជាប់​ឆ្នេរសមុទ្រ​ចំនួន​៤​គឺ​កោះកុង ព្រះ​សីហ​នុ កំពត និង​កែប ដែល​មាន​ចម្ងាយ​សរុប​ជាង​៤៦៧​គីឡូ ម៉ែត្រ​ដោយ​មាន​កីឡាករ​ជំនាញ​បរទេស​ប្រមាណ​១០០​នាក់​មក​ពី​ច្រើន​ប្រទេស​ចូលរួម​ជាមួយ​កីឡាករ​ជំនាញ​របស់​កម្ពុ​ជាមួយ​ក្រុម​ទៀត​ផង ។

លោក​ថា ប្រសិនបើ​យើង​បើក​ទូលាយ​នោះ​នឹង​មាន​បណ្តា​ប្រទេស​ជា​ច្រើន​មក​ចូលរួម​មិន​ខាន​ព្រោះ​នេះ​ជា​ព្រឹត្តិការណ៍​ប្រណាំង​លក្ខណៈ​អន្តរជាតិ​ប៉ុន្តែ​យើង​តម្រូវ​តែ​ប៉ុន្មាន​ប្រទេស​ប៉ុណ្ណោះ ដោយ​ផ្អែក​ទៅ​លើ​លក្ខណៈសម្បត្តិ​របស់​កម្ពុជា​ដែល​អាច​ទទួល​បាន ។ យ៉ាង​ហោច​ណាស់​ក៏​មាន​ប្រទេស​ប្រហែល​២០​ចូលរួម​ក្នុង​១​ប្រទេស​មាន​គ្នា​ប្រមាណ​១០​នាក់​រួម​ទាំង​កីឡាករ​៦​នាក់​ផង ដូច្នេះ​សរុប​២០​ក្រុម​ស្មើ​២០០​នាក់​បូក​រួម​អ្នកបច្ចេកទេស​និង​អ្នកបម្រើ​សេវា​ផ្សេង​ៗ សរុប​គឺ​មាន​ចំនួន​ប្រមាណ​ជាង​៣០០​នាក់ ។

លោក នី ផ​ល្លី អគ្គលេខាធិការ​គណៈ​ក​ម្មា​ធិ​ការ​ជាតិ​គ្រប់គ្រង​និង​អភិវឌ្ឍ​តំបន់ឆ្នេរ​សមុទ្រ​កម្ពុជា (​គ​.​អ​.​ឆ​.​ក​) បាន​បញ្ជាក់​ឲ្យ​ដឹង​ថា ការ​ប្រណាំង​កង់​ពិភពលោក​នៅ​តំបន់ឆ្នេរ​សមុទ្រ​កម្ពុជា​លើក​ទី​១ ឆ្នាំ​២០២០​នេះ នឹង​រៀបចំ​ធ្វើ​ជា​៣​ដំណាក់កាល ដែល​ដំណាក់កាល​ទី​១ ចាប់ពី​ថ្ងៃ​ទី​៤ ខែមករា ឆ្នាំ​២០២០ ដោយ​ផ្តើម​ចេញដំណើរ​ពី​រមណីយដ្ឋាន​តារា​សាគរ​នៅ​ខេត្តកោះកុង ឆ្លងកាត់​រង្វង់​មូល​វិ​ថី​សាយ​ភូ​ថង ឆ្ពោះទៅ​កាន់ ទីរួមខេត្ត​កោះកុង ដែល​មាន​ចម្ងាយ​ផ្លូវ​ជាង ១៥០​គីឡូម៉ែត្រ ។

ដំណាក់កាល​ទី​២​នឹង​ប្រព្រឹត្ត​ទៅ​នៅ​ថ្ងៃ​ទី​៥ ខែមករា ឆ្នាំ​២០២០ ដោយ​ចេញដំណើរ​ពី​រង្វង់​មូល​រមណីយដ្ឋាន​តារា​សាគរ​នៃ​ខេត្តកោះកុង (​នៅ​ត្រង់​រង្វង់​មូល​វិ​ថី​សាយ​ភូ​ថង​) ឆ្លងកាត់​មក​ផ្លូវបំបែក​ស្រែអំបិល ឆ្ពោះទៅ​រង្វង់​មូល​វាល​រេញ និង​បន្ត​ទៅ​កាន់​រមណីយដ្ឋាន​ឋានសួគ៌​បូកគោ​នៃ​ខេត្ត​កំពត​ដែល​មាន​ចម្ងាយ​ជាង​១៥០​គីឡូម៉ែត្រ ។ ដំណាក់កាល​ទី​៣​ប្រព្រឹត្ត​ទៅ​នៅ​ថ្ងៃ​ទី​៦ ខែមករា ឆ្នាំ​២០២០ ដោយ​ចេញដំណើរ​ពី​ជើងភ្នំ​បូកគោ​ឆ្លងកាត់​រង្វង់​មូល ទុរេន​ខេត្តកំពត​រួច​បន្ត​ទៅ​កាន់​រង្វង់​មូល​សេះស​និង​ប្រណាំង​៥​ជុំ​ក្នុង​ខេត្ត​កែប​ឆ្ពោះទៅ​កាន់​រង្វង់​មូល​វិញ​និង​បញ្ចប់​នៅ​មុខ​សាលា​ខេត្ត​កែប ដែល​មាន​ចម្ងាយ​សរុប​ប្រមាណ​ជាង​១៥០​គីឡូម៉ែត្រ​សរុប​ចម្ងាយ​ផ្លូវ​ទាំង​៣​ដំណាក់កាល​មាន​ប្រវែង​៤៦៧​គីឡូម៉ែត្រ​។

សូម​បញ្ជាក់​ថា តាម​គម្រោង​ផ្លូវ​រត់​ក្នុង​ដំណាក់កាល​ទី​៣​លើក​មុន គឺ​ត្រូវ​បញ្ចប់​នៅ​រង្វង់​មូល​តោ​ពីរ​ខេត្ត​ព្រ​សីហ​នុ តែ​ដោយសារ​បច្ចុប្បន្ន​ក្រុងព្រះសីហនុ​កំពុង​ជួសជុល​ផ្លូវ ក៏​បង្វែរ​មក​បញ្ចប់​នៅ​ខេត្ត​កែប​វិញ ។ លោក​វ៉ា​ត់ ចំរើន បញ្ជាក់​ទៀត​ថា ព្រឹត្តិការណ៍​ប្រណាំង​កង់​ពិភពលោក​ឆ្លងកាត់​ឆ្នេរ​សមុទ្រ​កម្ពុជា​លើក​ទី​១​នេះ​ត្រូវ​បាន​សហព័ន្ធ​អន្តរជាតិ​ចាត់ទុកជា​ផ្លូវការ​ថា ជា​ការ​ប្រកួត​ដែល​កីឡាករ​ទាំងអស់​លើ​ពិភព លោក​អាច​ចូលរួម​ដើម្បី​សន្សំ​ពិន្ទុ​សម្រាប់​ឡើង ចំណាត់ថ្នាក់ (Ranking) របស់​កីឡាករ​ម្នាក់​ៗ​ដែល​ចូលរួម ។

បើ​តាម​តំណាង​ប្រឹក្សា​យោបល់​នៃ​ព្រឹត្តិការណ៍​ប្រណាំង​កង់​ពិភពលោក​ឲ្យ​ដឹង​ថា ការ​ប្រណាំង​កង់​ពិភពលោក​តំបន់ឆ្នេរ​សមុទ្រ​កម្ពុជា​លើក​ទី​១​នេះ ដោយសារ​តែ​ទើប​ចាប់ ផ្តើម និង​មាន​រយ​:​ពេល​៣​ថ្ងៃ​បែប​នេះ គឺ​ស្ថិត​នៅ​ក្នុង​កម្រិត ២.២ ដែល​សហព័ន្ធ​អន្តរជាតិ UCI បាន​កំណត់ ។ លោក​បន្ត​ថា មក​ទល់​នឹង​ពេល​នេះ​យើង​បាន​រៀបចំ​ផ្លូវ​ក៏​ដូច​ជា​កន្លែង​ស្នាក់​នៅ​របស់​កីឡាករ​ដែល​ចូលរួម​គឺ​សម្រេច​បាន​៥០​ភាគរយ​ហើយ ។

មាន​ប្រទេស​ជាង​១០​ហើយ​ដែល​បាន​ចុះ​ឈ្មោះ​ចូលរួម​ក្នុង​នោះ​យើង​បាន​ទទួល​ជា​ផ្លូវការ​គឺ​មាន​ក្រុម​អាជីព​របស់​ប្រ ទេស​ម៉ា​ឡេ​ស៊ី​ដែល​ជា​ក្រុម​ជើងឯក​ប្រចាំ​ទ្វីបអាស៊ី​។​ចំណែក​ក្រុម​មួយ​ចំនួន​ទៀត​កំពុង​តែ​ធ្វើការ​ចុះ​ឈ្មោះ​ជា​បន្តបន្ទាប់​ដែល​មាន​ដូច​ជា​ឥណ្ឌូ​ណេ​ស៊ី ហ្វី​លី​ពី​ន អូស្ត្រាលី ប៉ូ​ឡូញ ហូ​ឡង់ អា​ល្លឺ​ម៉​ង់ ជប៉ុន ចិន ហុងកុង ថៃ អា​មេ​រិ​ក បារាំង និង​កូរ៉េ ក៏​បាន​មក​ចុះ​ឈ្មោះ​ដែរ ដោយ​រង់​ចាំតែ​ការ​បញ្ជាក់​ឯកភាព​របស់​គណៈកម្មការ​រៀបចំ​តែ​ប៉ុណ្ណោះ ៕ (​កែសម្រួល​ដោយ ៖ បុប្ផា​)