ខ្លាំង​ប៉ះ​ខ្លាំង តែ ចាន់ សំអាត និង​កីឡា​ករ​ថៃ មិន​ធ្វើ​ឱ្យ​អ្នកគាំទ្រ​ខកចិត្ត

143

រាជធានី​ភ្នំពេញ ៖ គ្មាន​អ្នក​ណា​មិនដឹង​នោះ ទេ​ថា កីឡាករ ចាន់ សំអាត ដែល​គេ​ស្គាល់​ភាគ ច្រើន​ថា​ជា​ជើង​ខ្លាំង និង​កីឡាករ​ថៃ Khum Sen អាច​ដណ្ដើម​ពិន្ទុ​ស្មើគ្នា ។ ការ​ឡើង​ប្រកួត​របស់​អ្នក​ទាំង​ពីរ ធ្វើ​ឡើង​កាលពី​ព្រឹក​ថ្ងៃ ទី​២៤ ខែវិច្ឆិកា ឆ្នាំ​២០១៩ នៅ​សង្វៀន​ស្ថានី​យ​ទូរទស្សន៍​អា​ស៊ី​អាគ្នេយ៍ ។

Loading...

ការ​ប្រកួត​ជា​មិត្តភាព​ដែល​មាន​អ្នកគាំទ្រ​យ៉ាងច្រើន​កុះករ នៅ​ក្នុង​ស្ទូ​ឌី​យោ​របស់​ស្ថានី​យ​​ទូរទស្សន៍​អា​ស៊ី​អាគ្នេយ៍​នេះ កីឡាករ​បង្គោល ក្រហម​កម្ពុជា ចាន់ សំអាត ត្រូវ​ប៉ះ​ជាមួយ បង្គោល​ខៀវ​ថៃ ដែល​ជា​កីឡាករ​វ័យក្មេង និង​មាន​ថ្វីដៃ​មិនធម្មតា​ម្នាក់ ។ ការ​ប្រកួត​នេះ​ម្នាក់​ៗ មិន​រំពឹង​ថា កីឡាករ​ទាំង​ពីរ​នឹង​ស្មើគ្នា​នោះ​ទេ ដោយសារ​តែ​ម្ខាង​ៗ​គឺជា​ជើង​ខ្លាំង ហើយ ត្រូវ​គេ​ឃើញ​វាយ​ទៅ​វាយ​មក ធ្វើ​ឲ្យ​គេ​គិត​ថា​ពិតជា​មាន​ខាង​ណា​ភ្លាត់ស្នៀត ហើយ​ពិតជា​មាន​ម្ខាង​ទៀត​មាន​សំណាង។

ម្នាក់​ៗ​យល់​ថា កីឡាករ​ទាំង​២​ពិតជា​មិន​អាច​ស្មើគ្នា​បាន​ទេ ក្នុង​ពេល​ដែល​កីឡាករ​បង្គោល​ក្រហម និង​បង្គោល​ខៀវ សុទ្ធតែ​បញ្ចេញ​ក្បាច់គុន​បាន​ល្អ ដើម្បី​ស្វែងរក​ឱកាស​បំបាក់​គ្នា​ទៅ​វិញ​ទៅ​មក ឲ្យ​ភ្លាត់ស្នៀត​ឲ្យ​ខាង​តែ​បាន​បែប​នេះ ។

កីឡាករ​កម្ពុជា និង​ថៃ មិន​ធ្វើ​ឲ្យ​អ្នក​ទស្សនា​ខកចិត្ត​នោះ​ទេ ដោយ​សម្រុក​វាយ​គ្នា​បាន​ល្អ ហើយ​ប្រឹង​សម្រុក​វាត់​កែង​ផង ម៉ាត់​ផង ជង្គង់​ផង ហើយ​បើ​ទោះជា​ខាង​បង្គោល​ក្រហម​វាត់​មួយ​កែង​ៗ​ពិបាក​ទប់ ក៏​កីឡាករ​ម្ខាង​ទៀត​សម្រុកចូល ធ្វើ​ឲ្យ​ការ​ប្រកួត​ល្អមើល ។ មុន​បញ្ចប់​ការ​ប្រកួត ម្នាក់​ៗ​ភ័យ​អរ​មិន​តិច​ទេ ដោយ សារ​តែ​មិនដឹង​ថា​អ្នក​ណា​នឹង​ភ្លាត់ស្នៀត នៅ​ពេល​ប្រឹង​សម្រុក​គ្នា​ទៅ​វិញ​ទៅ​មក ។

ក្រោយ​ពី​លទ្ធផល​ស្ដែង​ឡើង​បាន​ត្រឹម​ស្មើគ្នា ម្នាក់​ៗ​សុទ្ធតែ​លាន់មាត់​ថា អីយ៉ា កីឡាករ​កម្ពុជា ដ្បិតថា​ហាក់​ធ្លាក់​កូដ ប៉ុន្តែ​កម្លាំង​និង​សមត្ថភាព​របស់​គេ​គឺ​ខ្លាំង​ល្អ ទោះជា​គូប្រកួត​ដែល​ប៉ះ​ជាមួយ​គេ​ជា​កីឡាករ​ល្អ​កម្រិត​ណា ក៏​គេ​នៅ​តែ​អាច​ទៅ​រួច ។ មាន​ន័យ​ថា មិនសូវ​ទទួល​ឡើង​សង្វៀន តែ​ពេល​បង្ហាញមុខ​ម្ដង​ៗ​គឺ​នៅ​តែ​ជា​ខ្លា​ចាស់​មិនធម្មតា ។

សម្រាប់ ចាន់ សំអាត ដ្បិតតែ​រូបគេ​ទទួល​ប្រកួត​តិច​ជាង​មុន ហើយ​មមាញឹក​ខ្លាំង នឹង​ការ​រក​ចំណូល​ខាងក្រៅ ប៉ុន្តែ​ក៏​មាន​វិធានការ​ការពារ​កម្លាំង​ឲ្យ​ឈាន​ឡើង​ដើម្បី​ពង្រីក​កេរ្តិ៍ ឈ្មោះ ។ ជាក់ស្ដែង រូបគេ​សកម្ម​នឹង​ការ​ហាត់​រត់​កុំ​ឲ្យ​ឆាប់​ហត់ និង​រមែង​ហ្វឹកហាត់​យ៉ាង​ហោច​១​ស​ប្ដា​ហ៍​យ៉ាងតិច រាល់​មុន​ពេល​ឡើង​ប្រកួត​នៅ​លើ​សង្វៀន​ម្ដង​ៗ​ផង ទើប​សមត្ថភាព​ឡើង​ប្រកួត​ទទួល​បានការ​សរសើរ​បែប​នេះ​។ ក្នុង​នោះ​ការ​ថែរក្សា​សុខភាព និង​វិធានការ​បង្វឹក​ផ្លូវដង្ហើម​កុំ​ឲ្យ​ឆាប់​ហត់​ក៏​មិនសូវ​ប្រហែស​ដែរ ទើប​ធ្វើ​ឲ្យ​ការ​ប្រកួត​របស់​គេ​នៅ​តែ​រក្សា​បាន​នូវ​កម្លាំង និង​ថាមពល ។

លោក ញាណ សុធី អ្នក​រៀបចំ​កម្មវិធី​ប្រចាំស្ថានីយទូរទស្សន៍​អាស៊ី​អាគ្នេយ៍ ថ្លែង​ថា កីឡា ករ ចាន់ សំអាត និង​ថៃ ដ្បិតតែ​ជា​កីឡាករ​ធ្លាក់​កូដ និង​ម្នាក់​ជា​កីឡាករ​មិនសូវ​មានមុខ​ប្រ កួត​នៅ​កម្ពុជា ប៉ុន្តែ​ការ​ប្រកួត​របស់​កីឡាករ​ទាំង​២​មិន​ធ្វើ​ឲ្យ​អ្នក​ទស្សនា​ខកចិត្ត​នោះ​ទេ ។

ហេតុផល​ដែល​កីឡាករ​ទាំង​២​មិនសូវ​បាន​ឡើង សង្វៀន គឺ​ដោយសារ​តែ​ការ​ប្រកួត​ដែល​រៀប​ចំ​ដោយ​សហព័ន្ធ​ប្រដាល់​តម្រូវ​ឲ្យ​មានការ​ផ្គូផ្គង​វិល​ជុំ ដែល​មាន​ន័យ​ថា​ទម្រាំ​ដល់​គឺ​អាច​ច្រើន​ខែ ។ ម្យ៉ាង មក​ពី​អ្នក​ទាំង​ពីរ​មិនសូវ​ល្បី​ខ្លាំង​ផង ទើប​លោក​យូរ​ៗ​ដាក់​ឲ្យ​ប្រកួត​ម្ដង យ៉ាងណា​ក៏​ដោយ លោក​នឹង​ដាក់​ឲ្យ​ប្រកួត​ឲ្យ​បាន​ច្រើន ដើម្បី​ឲ្យ​អ្នក​ទាំង​ពីរ​ងាយស្រួល​កសាង​កេរ្តិ៍ឈ្មោះ​។

ការ​ប្រកួត​រវាង​កីឡាករ​ទាំង​ពីរ គឺជា​ជំនួប​សាកល្បង​សមត្ថភាព ដោយ​បង្គោល​ខៀវ អាច​និយាយ​បាន​ថា ឡើង​ប្រកួត​ដើម្បី​កសាង​កេរ្តិ៍ ឈ្មោះ​ក្នុង​នាម​ជា​កីឡាករ​ត្រូវការ​កេរ្តិ៍ឈ្មោះ​នៅ​កម្ពុជា ។ ចំណែក​បង្គោល​ក្រហម ត្រូវការ​បំផុត​គឺ​ដណ្ដើម​ប្រជាប្រិយភាព​មក​វិញ ទើប​ការ​ប្រកួត​មួយគូ​នេះ​ល្អមើល​តាំងពី​ដើម​ទី ។ មួយគូ​នេះ បើ​មើល​មួយ​ភ្លែត បង្គោល​ក្រហម សម​នឹង​ឈ្នះ​ច្រើន​ជាង ស្របគ្នា​ដែល​គេ​ក៏​វាយ​ចេញ​ត្រូវ​ចំ​គោលដៅ​បាន​ច្រើន នៅ​ពេល​បើក​ការ​ប្រកួត​ភ្លាម​ៗ ។

លោក ញាណ សុធី ថ្លែង​ថា បង្គោល​ខៀវ ទើបតែ​រក​ចំណុចខ្សោយ​បង្គោល​ក្រហម​ឃើញ​ក្រោយ​ពី​បញ្ចប់​ទឹក​ទី​៣​ប៉ុណ្ណោះ ដោយ​គេ​ចាប់ ផ្ដើម​ទាត់​ជើង​ក្រោម និង​វាត់​កែង​ម្ដង​ហើយ​ម្ដងទៀត ទើប​បង្គោល​ក្រហម​ចាញ់​ប្រៀប ស្ដារ​បញ្ហា​កាត់​ពិន្ទុ​ក្នុង​៣​ទឹក​កន្លង​មក ហើយ​បណ្ដាល​ឲ្យ​ក្រោយ​បញ្ចប់​​ការ​ប្រកួត គឺ​ស្មើគ្នា ។ ការ​ប្រកួត​នៅ​ក្នុង​ថ្ងៃ​នោះ ទាំង​បង្គោល​ខៀវ និង​ក្រហម សុទ្ធតែ​បញ្ចេញ​​សមត្ថភាព​បាន​ល្អ ហើយ​បើ​កុំ​តែ​បង្គោល​ខៀវ​វាយ​ត្រូវ​ចំណុច​សំខាន់​បណ្ដាល​ឲ្យ​បង្គោល​ក្រហម​ចាញ់​ពិន្ទុ ក៏​ប្រហែលជា​មិន​អាច​រក​ចំណុចខ្សោយ​ឃើញ ហើយ​ប្រកួត​បាន​ស្មើគ្នា​ដែរ ។

លោក​មាន​គម្រោង​ដាក់​គូ​នេះ​ឲ្យ​ឡើង​ប្រកួតជា​ថ្មី​ម្ដងទៀត តែ​រង់ចាំ​ឲ្យ​ពួក​គេ​ទាំង​២​នាក់ បាន​ត្រៀមខ្លួន និង​មាន​ពេល​គ្រប់គ្រាន់​ជា​មុន​សិន ៕ (​កែសម្រួល​ដោយ ៖ បុប្ផា​)