តើ​បុត្រី​សែ​រាជវង្ស​អង្គ​ណា​សម្តែង​របាំ​ឧទ្ទិស​ថ្វាយ​ព្រះ​វិញ្ញ​ណ​ក្ខ័​ន្ធ​សម្តេច នរោត្តម បុប្ផា​ទេវី?

293

បុត្រី​សែ​រាជវង្ស​៣​ព្រះ​អង្គ រួម​ជាមួយ​នាដ​ការី​ជា​ច្រើន​នាក់​ទៀត បាន​សម្តែង​របាំ​ឧទ្ទិស​ថ្វាយ​មហា​ព្រះរាជ​កុសល និង​ជា​ការ​ថ្វាយបង្គំ​លា​ជា​លើក​ចុង​ក្រោយ ថ្វាយ​ព្រះ​វិញ្ញ​ណ​ក្ខ័​ន្ធ សម្តេច​រាជបុត្រី​ព្រះ​រៀម នរោត្តម បុប្ផា​ទេវី កាលពី​វេលា​ម៉ោង​៧​ល្ងាច ថ្ងៃ​ទី​២៤ ខែវិច្ឆិកា ឆ្នាំ​២០១៩ នា​ព្រះ​មេរុ ខាង​មុខ​វត្ត​បទុម​វ​តី ។

Loading...

យោង​តាម​ការ​បញ្ជាក់​ពី​ផេ​ក​ហ្វេ​ស​ប៊ុ​ក​របស់​ព្រះមហាក្សត្រ​កម្ពុជា បាន​បញ្ជាក់​ថា បុត្រ​ចំនួន​៣​ព្រះ​អង្គ​នោះ រួម​មាន ព្រះ​អង្គ​ម្ចាស់​ក្ស​ត្រី ស៊ី​សុវត្ថិ កល្យាណ​ទេវី ជា​ព្រះ​បុត្រី នៃ​សម្តេច​រាជបុត្រី​ព្រះ​រៀម នរោត្តម បុប្ផា​ទេវី ព្រះ​អង្គ​ម្ចាស់​ក្ស​ត្រី នរោត្តម រតនា​ទេវី ជា​ព្រះ​បុត្រី នៃ​សម្តេចក្រុមព្រះ នរោត្តម រណឫទ្ធិ និង​អ្នក​អង្គ​ម្ចាស់​ក្ស​ត្រី នរោត្តម រស្មី​ពនិតា ជា​ព្រះ​បុត្រី នៃ​សម្តេច​រាជបុត្រី​ព្រះ​អនុជ នរោត្តម អរុណរស្មី ។

លោក ហង់ ភូមិ​រ៉ា ប្រធាន​ក្រុម​យុវជន​ល្ខោនខោល​ជំនាន់​ថ្មី បាន​ឲ្យ​ដឹង​ថា ការ​សម្តែង​នេះ​មាន​ការ​ចូលរួម​ពី​មន្ត្រី​ក្រសួង​វប្បធម៌ និង​វិចិត្រសិល្បៈ លោកគ្រូ​អ្នកគ្រូ សាកលវិទ្យាល័យ​ភូមិន្ទ​វិចិត្រសិល្បៈ មហាវិទ្យាល័យ​សិល្បៈ​នាដ​សាស្ត្រ សាលា​មធ្យម​វិចិត្រសិល្បៈ មន្ទីរ​វប្បធម៌​វិចិត្រសិល្បៈ​រាជធានី​ភ្នំពេញ ក្រុម​សិល្បៈ​សុ​ភី​លី​ន ក្រុម​សិល្បៈ​យុវជន​យុវជន​ល្ខោនខោល​ជំនាន់​ថ្មី និង​ក្រុម​សិល្បៈ​យុវនារី​របាំ​បុរាណ​ជំនាន់​ថ្មី ក្រុម​សិល្បៈ​គ្រី​ស្នា​រៈ ក្រុម​សិល្បៈ​សាកលវិទ្យាល័យ​ភូមិន្ទ​ភ្នំពេញ និង​ប្អូន​ៗ យុវជន​យុវនារី​ស្ម័​គ​ចិត្ត ។

ព្រះករុណា ព្រះមហាក្សត្រ និង​សម្តេចព្រះ​មហាក្សត្រី ព្រះ​វ​រាជមាតា​ជាតិខ្មែរ ជាទី​គោរព​សក្ការៈ​ដ៏​ខ្ពង់ខ្ពស់​បំផុត ព្រះ​អង្គ​ទាំង​ទ្វេ​សព្វព្រះរាជហឫទ័យ​នឹង​យាង​ជា​ព្រះ​រាជាធិបតី​ដ៏​ខ្ពង់ខ្ពស់​បំផុត ក្នុង​ព្រះ​ពិធី​ថ្វាយ​ព្រះ​ភ្លើង​ព្រះ​សព សម្តេច​រាជបុត្រី​ព្រះ​រៀម នរោត្តម បុប្ផា​ទេវី នា​វេលា​ព្រឹក​ថ្ងៃ​ទី​២៥ ខែវិច្ឆិកា ឆ្នាំ​២០១៩​នេះ​។

នៅ​មុន​ការ​សម្តែង​របាំ​ខាងលើ​នេះ ក៏​មាន​រៀបចំ​ព្រះ​ពិធី​សុំ​ព្រះ​អគ្គី ក្រោម​ព្រះ​អធិបតីភាព ព្រះ​អង្គ​ម្ចាស់​ក្ស​ត្រី ស៊ី​សុវត្ថិ កល្យាណ​ទេវី ជា​ព្រះ​បុត្រី នៃ​សម្តេច​រាជបុត្រី​ព្រះ​រៀម នរោត្តម បុប្ផា​ទេវី ដើម្បី​ប្រារព្ធ​ព្រះ​ពិធី​ថ្វាយ​ព្រះ​ភ្លើង​ខាង​មុខ​វត្ត​បទុម​វ​តី នៅ​ថ្ងៃ​ទី ២៥ ខែវិច្ឆិកា ក្រោម​ព្រះ​រាជាធិបតី​របស់​ព្រះករុណា ព្រះមហាក្សត្រ និង​សម្តេចព្រះ​មហាក្សត្រី ព្រះ​វ​រាជមាតា​ជាតិខ្មែរ ។

សម្តេច​រាជបុត្រី​ព្រះ​រៀម នរោត្តម បុប្ផា​ទេវី ឧត្តម​ប្រឹក្សា​ផ្ទាល់​ព្រះមហាក្សត្រ និង​ជា​សមាជិកា​ក្រុមប្រឹក្សាធម្មនុញ្ញ បាន​យាង​សោយ​ទីវ​ង្គ​ត​ក្នុង​ព្រះ​ជន្មាយុ ៧៦ ព្រះ​វស្សា នៅ​មន្ទីរពេទ្យ​នៅ​ទីក្រុង​បាងកក​ប្រទេស​ថៃ ដោយ​រោគាពាធ នៅ​វេលា​ម៉ោង ១២ កន្លះ​ថ្ងៃត្រង់​កាលពី​ថ្ងៃ​ទី ១៨ ខែវិច្ឆិកា ឆ្នាំ ២០១៩ ។

ការ​បាត់បង់​សម្តេច​រាជបុត្រី​ព្រះ​រៀម នរោត្តម បុប្ផា​ទេវី គឺជា​ការ​បាត់បង់​ដ៏​ធំធេង​បំផុត ក្នុង​វិស័យ​វប្បធម៌ អរិយធម៌​ជាតិខ្មែរ ។ ស្នាដៃ​ដ៏​ធំធេង​សម្រាប់​វប្បធម៌​ខ្មែរ ដែល​ស្នាដៃ​ដ៏​ធំ​របស់​ព្រះ​អង្គ​ម្ចាស់​នរោត្តម បុប្ផា​ទេវី គឺ​ការ​នាំ​ឲ្យ​អង្គការ​យូ​ណេ​ស្កូ ដាក់​បញ្ចូល​របាំ​ព្រះរាជ​ទ្រព្យ ក្នុង​បញ្ជី​បេតិកភណ្ឌ​អរូបី​នៃ​មនុស្សជាតិ​នៅ​ថ្ងៃ​ទី ៧ ខែវិច្ឆិកា ឆ្នាំ ២០០៣ គ្រា​ដែល ព្រះ​អង្គ គង់​ជា​រដ្ឋមន្ត្រីក្រសួង​វប្បធម៌​និង​វិចិត្រសិល្បៈ ៕ (​កែសម្រួល​ដោយ ៖ បុប្ផា​)