បញ្ជូន​​ជនជាតិ​វៀតណាម​ដែល​បាត់​បង់​ជីវិត​ក្នុង​កុងតឺន័រ​មក​ស្រុក​វិញ

579

ប្រទេស​អង់គ្លេស​-​វៀតណាម ៖ បណ្ដាជនអន្តោប្រវេសន៍​វៀតណាម​ដែល​រក​ឃើញ​ក្នុង​រថយន្ត​កុងតឺន័រ​ក្លា​សេ​មូ​យ កាលពី​ដំណាច់​ខែតុលា​នៅ​ជិត​ទីក្រុង​ឡុ​ង​ដ៏ ត្រូវ​បាន​បញ្ជូន​កាលពី​ថ្ងៃ​ទី​២៧​វិច្ឆិកា ​ទៅប្រទេស​​វៀតណាម​វិញហើយ​ ក្រោយ​ការ​រង់ចាំ​ចាប់តាំងពី​ច្រើន​ស​ប្ដា​ហ៍​មក​ហើយ របស់​សាច់ញាតិ​គ្រួសារ​របស់​ពួក​គេ​។

Loading...

យន្តហោះ​របស់​ក្រុមហ៊ុន​អាកាសចរណ៍ VIETNAM AIRLINES ហោះ​មក​ពី​អង់គ្លេស​បាន​ចុះ​នៅ​ព្រ​លាន​យន្តហោះ​ក្រុង​ហាណូយ ជាមួយ​មឈូសដាក់​ជនអន្តោប្រវេសន៍​១៦​នាក់​ដំបូង​ដែល​បញ្ជូន​មក មឈូស​ទាំងនេះ​ត្រូវ​បាន​ដឹក​ចេញ​បន្ត​តាម​រថយន្ត​ជា​ច្រើន​គ្រឿង​ឆ្ពោះទៅ​កាន់​ខេត្ត​ផ្សេង​ៗ​នា​ភាគ​កណ្ដាល​វៀតណាម ដែល​ពួក​គេ​មាន​ប្រភព​នៅ​ទីនោះ​។ ​ចំ​ណែ​ក​មនុស្ស​២៣​នាក់​ទៀត ​ត្រូវ​បញ្ជូន​មក​នា​ប៉ុន្មាន​ថ្ងៃ​ខាង​មុខ​។

​​បុរស​៣១​នាក់ ​និង​នារី​៨​នាក់ ក្នុង​នោះ​មាន​ក្មេង​ជំទង់​អាយុ​១៥​ឆ្នាំ​២​នាក់ ត្រូវ​បាន​រក​ឃើញ​កាល​ពី​ថ្ងៃ​ទី​២៣​ តុលា នៅ​​ក្នុង​កុងតឺន័រ​មួយ នា​តំបន់ឧស្សាហកម្ម​ GRAYS​ ខាងកើត​ក្រុង​ឡុ​ង​ដ៏​។ កុងតឺន័រ​នោះ​ដឹក​មក​ពី​កំពង់​ផែ​បែ​ល​ហ្ស៊ិកមួយ​។ ជន​រង​គ្រោះ​ច្រើន​នាក់​ក្នុង​ចំណោម​ជន​រង​គ្រោះ​ទាំងនេះ មក​ពី​តំបន់​ក្រីក្រ​បំផុត​ទាំងឡាយ​នា​ភាគ​កណ្ដាល​វៀតណាម​។ គ្រួសារ​ពួក​គេ​ត្រូវ​ខ្ទី​លុយ​គេ​ច្រើន​ពាន់​ដុល្លារ ដើម្បី​បញ្ជូន​សាច់ញាតិ​ម្នាក់​ទៅ​កាន់​អង់គ្លេស​។

ចំពោះ​ការ​បញ្ជូន​​មក​ប្រទេស​វិញ អាជ្ញាធរ​បាន​ឲ្យ​សាច់ញាតិ ជ្រើសរើស​ក្នុង​ចំណោម​ជម្រើស​២​ ៖ ជម្រើស​ទី​មួយ ​ត្រូវ​បង់ប្រាក់​១៧៧៤​ដុល្លារ សម្រាប់​នាំ​យក​ធាតុ​មក​បញ្ចុះ ហើយ​ជម្រើស​មួយទៀត បង់ប្រាក់​២៨៥៨​ដុល្លារ​ សម្រាប់​ការ​នាំ​ជនរងគ្រោះ​​មក​ដាក់​ក្នុង​មឈូស​៕ (​កែ​សម្រួល​ដោយ ៖ បុប្ផា​)