មេ​ធំ Bugatti ប្រាប់​ពី​រថយន្ត Bugatti Chiron ដែល​ឥត​ខ្ចោះ​សម្រាប់​លោក

កន្លង​មក Bugatti បាន​ផលិត​រថយន្ត​ស្ព័​រ​ប្រណិត​ៗ ដែល​មាន​ដូច​ជា Veyron, Chiron, Divo, La Voiture Noire និង Centodieci​។ នៅ​ក្នុង​កម្មវិធី​ពិព័រណ៍​រថយន្ត LA ឆ្នាំ ២០១៩ លោក Stephan Winkelmann ប្រធាន​ក្រុមហ៊ុន Bugatti បាន​បង្ហើប​ប្រាប់​សារព័ត៌មាន​ថា អតិថិ​ជន​​ហ៊ាន​ជះ​លុយ​ដល់​ទៅ ៣០​ម៉ឺន​អឺ​រ៉ូ ទៅ​លើ Option របស់​រថយន្ត ដែល​វា​មិន​ទាន់​បូក​ជាមួយ​នឹង​​ពន្ធ​នៅឡើយ​ទេ​។ ខាង​សារព័ត៌មាន​ក៏​បាន​ឆ្លៀត​សួរ​លោក​ពី រថយន្ត Bugatti ដែល​លោក​គិត​ថា​មាន​ភាព​ឥត​ខ្ចោះ​ជាងគេ​។

Loading...

លោក Winkellman មាន​ប្រសាសន៍​ថា​៖«​ខ្ញុំ​ស្រឡាញ់​ពណ៌​គ្រើម ដែល​អាច​ជា​ពណ៌​ខ្មៅ ឬ ពណ៌​ស​។ ខ្ញុំ​ចង់បាន​យ៉ា​ន់​កង់​ពណ៌​ខ្មៅ ជាមួយនឹង​ហ្វ្រាំង​ពណ៌​ក្រហម​។ ផ្នែក​ខាងក្នុង ប្រសិនបើជា​ពណ៌​ត្នោត ខ្ញុំ​ចង់បាន​ថ្នេរ​ដេរ​ពណ៌​ដូច​គ្នា​។ តែ​ប្រសិនបើ​ពណ៌​ខ្មៅ ខ្ញុំ​ចង់បាន​ថ្នេរ​ពណ៌​ក្រហម​»​។

ដោយ​ប្រើ​ការ​ពិពណ៌នា​របស់​លោក Winkellmann ខាង​សារព័ត៌មាន Carbuzz បាន​គូរ​តាម ដោយ​ប្រើប្រាស់​ម៉ូ​ដែល Chiron Sport​។ សម្រាប់​រថយន្ត​ពណ៌​ស គេ​បាន​គូរ​ផ្នែក​ខាងក្នុង​ពណ៌​ត្នោត ខណៈ​ដែល​ផ្នែក​ខាងក្រៅ​ពណ៌​ខ្មៅ គេ​បាន​ដាក់​ពណ៌​ខ្មៅ​លាយ​ថ្នេរ​ក្រហម​នៅ​ផ្នែក​ខាងក្នុង​។ ការ​ឌី​ហ្សា​ញ​នេះ គឺ​ពិតជា​ស្អាត​មែនទែន​។

ដូច​ម៉ូ​ឌែ​ល Chiron Sport ធម្មតា​ដែរ រថយន្ត​នេះ​មាន​ថាមពល​ពី​ម៉ាស៊ីន ៨.០ លី​ត្រ​ប្រើ Turbo-turbo W16 ដែល​ផលិត​កម្លាំង ១៤៧៩​សេះ និង​កម្លាំង​បង្វិល ១១៨០ ផោន​-​ហ្វី​ត ដែល​ត្រូវ​បាន​បញ្ជូន​ទៅ​គ្រប់​កង់​ទាំង​៤ ដោយ​មាន​ប្រអប់លេខ​ភ្លោះ​៧​តង់ ៕