តាមប្រភពព័ត៌មាន Soccer Laduma បានឱ្យដឹងថា អតីតកីឡាករឆ្នើមរបស់ក្រុម FC Barcelona លោក Samuel Eto’o ឥឡូវនេះហាក់ដូចជាកំពុងមានឥទ្ធិពលលើពិភពជំនួញផងដែរ បន្ទាប់ពីសាកលវិទ្យាល័យ Harvard ដែលជាសាលាល្បីល្បាញនៅសហរដ្ឋអាមេរិកទទួលឱ្យចូលរៀន ។
ដូចដែលបានរាយការណ៍ដោយការបោះពុម្ភផ្សាយអេស្ប៉ាញ AS កីឡាកររូបនេះនឹងចាប់ផ្តើមរៀនវគ្គសិក្សាការគ្រប់គ្រងអាជីវកម្មរយៈពេលមួយឆ្នាំ ចាប់ពីខែមករា ខណៈដែលគាត់បន្តពង្រីកខ្លួនចូលទៅក្នុងពិភពជំនួញ។ អតីតកីឡាករអន្តរជាតិកាមេរូនថ្មីៗនេះបានជួយបង្កើតក្រុមហ៊ុនភ្នាល់ល្បែងមួយ ដែលមានឈ្មោះថា Beto’o រួមជាមួយពាណិជ្ជករអាហ្វ្រិកមួយចំនួន ហើយបានបង្ហើបថាគាត់បានចុះឈ្មោះចូលរៀនវគ្គសិក្សានេះ ដើម្បីត្រៀមខ្លួនសម្រាប់ការរីកចម្រើនអាជីវកម្មរបស់គាត់។
លោក Eto’o បានប្រាប់ទស្សនាវដ្តី Jeune Afrique ថា៖ «នៅពេលអ្នកជាកីឡាករបាល់ទាត់ អ្នកត្រូវចំណាយប្រាក់អ្នកដទៃដើម្បីថែរក្សាផលប្រយោជន៍អាជីវកម្មរបស់អ្នក ប៉ុន្តែនៅពេលដែលអ្នកគ្រប់គ្រងពួកគេហើយអ្នកចង់ឲ្យពួកគេរីកចម្រើន អ្នកត្រូវទទួលមានជំនាញថ្មីៗ។ បន្ទាប់មកខ្ញុំនឹងបន្តការសិក្សារបស់ខ្ញុំ ដើម្បីរៀនគ្រប់គ្រងអាជីវកម្ម។ ខ្ញុំនឹងទៅសាកលវិទ្យាល័យ Harvard នៅខែមករា។ សាលាចិត្តល្អគ្រប់គ្រាន់ក្នុងការអនុញ្ញាតឱ្យខ្ញុំចូលរៀនមុខជំនាញ»។
របាយការណ៍ក៏បានបង្ហាញផងដែរថា អតីតមិត្តរួមក្រុមរបស់ Eto’o ដែលមានដូចជា Gerard Pique និង Dani Alves ក៏ធ្លាប់បានចុះឈ្មោះចូលរៀននៅសាកលវិទ្យាល័យដែរ ដោយបានសិក្សារហូតដល់ថ្នាក់អនុបណ្ឌិតផ្នែកអាជីវកម្មកំសាន្តប្រព័ន្ធផ្សព្វផ្សាយនិងកីឡា៕
