រឿង សា​រ័​ត្ន ប៉ះ​ថៃ លើ​សង្វៀន​កំដរ​ជើងឯក​មុន​ផ្ដាច់ព្រ័ត្រ

439

រាជធានី​ភ្នំពេញ ៖ ដោយសារ​តែ​ឡើង​កូដ​នៅ​ក្នុង​ពិភព​ប្រដាល់ កីឡាករ រឿង សា​រ័​ត្ន ត្រូវ​បាន​គេ​ប្រកាស​ឱ្យ​ឡើង​ប្រកួត ជាមួយ​កីឡាករ​ថៃ ប៉ា ឡាំង​កៅ ក្នុង​នាម ជា​គូ​អន្តរជាតិ​ខណៈ​ដែល​នេះ​គឺជា​អ្វី​ដែល កីឡាករ​រូប​នេះ ប្រាប់​ថា ស្រមៃ​ជា​យូរ ។

Loading...

អ្នក​ទាំង​ពីរ​នឹង​ប៉ះ​គ្នា នៅ​ថ្ងៃ​សៅរ៍​ទី​៣០ វិច្ឆិកា ស្អែក​នេះ នៅ​ក្នុង​ព្រឹត្តិការណ៍ Tv5 Knock out Serie by K-Cement ក្នុង​ពេល​ដែល​ការ​ប្រកួត​ជើងឯក​រដូវ​កាល​ទី​៦​នេះ ស្ថិត​ក្នុង​ដំណាក់កាល សម្រាក​ត្រៀម​ប្រកួត​នៅ​ស​ប្ដា​ហ៍ ក្រោយ ដើម្បី​ស្វែងរក​ជើងឯក​វគ្គ​ផ្ដាច់ព្រ័ត្រ ។

ការ​ប្រកួត​ដែល​នឹង​ចាប់ផ្ដើម​ពី​ម៉ោង​៦​ល្ងាច​តទៅ​នេះ ត្រូវ​គេ​ឃើញ​មានការ​រំពឹង​ខ្ពស់​មិន​ខុស​ពី​ការ​ប្រកួត​អន្តរជាតិ​មុន​ៗ​នោះ​ទេ ដោយសារ​តែ​ភាព​ជាក់ស្ដែង​គឺ​ព្រឹត្តិការណ៍​ដំណើរការ​ចំ​ពេល ល្ងាច​ថ្ងៃ​សម្រាក ដែល​ជា​ថ្ងៃ​មនុស្ស​ម្នា​នៅ​តំបន់​ព្រែក​កំ​ពិស​និយម​មក​ទស្សនា​កកកុញ ស្របគ្នា​ដែល​នៅ​តំបន់​ប៉ុស្ដិ៍​លេខ​៥​ក៏​មាន​កំណើន​អ្នក​រស់នៅ​ច្រើន​ឡើង ក្រោយ​មាន​វត្តមាន​សំណង់
បុរី​ព្រោងព្រាត​ប្រដេញ​គ្នា ។

កីឡាករ​កម្ពុជា​ដែល​ជា​ជើង​ខ្លាំង​កំពុង​ឡើង​កូដ ត្រូវ​បាន​គេ​ចាប់អារម្មណ៍​ហួសប្រមាណ​ក្រោយ​ពី​មានការ​ប្រកាស​ថា តម្រូវ​ឱ្យ​ស្វាគមន៍​ជើង​ខ្លាំង​មក​ពី​ប្រទេស​ថៃ ប៉ា​ឡាំង​កៅ ដែល​អ្នក​ណា​ៗ​ក៏​ស្គាល់​ថា​ជា​ជើង​ខ្លាំង ធ្លាប់​ប្រកួត​ឈ្នះ​លើ​កីឡាករ​កម្ពុជា​កន្លង​មក ។ វត្តមាន​កីឡាករ​ទាំង​កម្ពុជា និង​ថៃ ក្នុង​ស​ប្ដា​ហ៍​នេះ មិន​ថា​ការ​ប្រកួត​ជា​លក្ខណៈ​អន្តរជាតិ ឬ​ការ​ប្រកួត​ជា​លក្ខណៈ​មិត្តភាព​ក្នុងស្រុក​នៅ​ក្នុង​ថ្ងៃ​នោះ​ទេ គឺ​ពិតជា​ធ្វើ​ឱ្យ​អ្នក​ស្នេហា​វិស័យ​ប្រដាល់​មាន ការ​ចាប់អារម្មណ៍ ជា​ពិសេស​គឺ​វត្តមាន​របស់ កីឡាករ​រឿង សា​រ័​ត្ន មានការ​ចាប់អារម្មណ៍ យ៉ាង​ខ្លាំង ដោយសារ​តែ​គេ​កំពុង​ឡើង​កូដ​។

សមាសភាព​គូ​អន្តរជាតិ​នេះ ត្រូវ​បាន​គេ​អះអាង​ថា មានការ​សម្រាំង​យ៉ាង​ពិសេស ដើម្បី​ឱ្យ​អ្នក​ទស្សនា​កាន់តែ​កន្ត្រាក់​អារម្មណ៍ ក្នុង​ពេល​ដែល​ស​ប្ដា​ហ៍​នេះ​គឺ​ជាស​ប្ដា​ហ៍​ដែល​តម្រូវ​ឱ្យ​អ្នកមាន​ឈ្មោះ​ក្នុង​ការ​ប្រកួត​ជ្រើសរើស​ជើងឯក​ដែល​ជ្រើស​បាន​សម្រាក​មួ​យស​ប្ដា​ហ៍​ត្រៀម​ប្រកួត​វគ្គ​ផ្ដាច់ព្រ័ត្រ ដណ្ដើម​ជើងឯក និង​ចំណាត់ថ្នាក់​លេខ​៣​។

លោក សេង ក​ដិ​កា បញ្ជាក់​ថា សមាសភាព​ខាង​កម្ពុជា​សម្រាប់​ការ​ប្រកួត​ជាមួយ​ថៃ លោក
ជឿជាក់​ខ្លាំង​លើ​កីឡាករ រឿង សា​រ័​ត្ន ដោយសារ​តែ​គេ​គឺជា​ជើង​ខ្លាំង ហើយ​បើ​ទោះជា​មិនសូវ​មានបទពិសោធន៍​ច្រើន​នៅ​ក្នុង​ការ​ប្រកួត​អន្តរ​ជាតិ​កន្លង​មក ប៉ុន្តែ​សមត្ថភាព​គេ​ល្អ​លោក​ពេញចិត្ត។

ម្យ៉ាង​មក​ពី​លោក​ចង់​លើកមុខ​ម្ចាស់​ពាន​ផង ទើប​លោក​សម្រេច​ដាក់​ឱ្យ​ប្រកួត​ជា​លក្ខណៈ​អន្តរ​ជាតិ ដើម្បី​ឱ្យ​កាន់តែ​ទទួល​បានការ​ចាប់អារម្មណ៍​នៅ​ក្នុង​វិស័យ​ប្រដាល់ ។ លោក​ប្រកាស​ថា វត្តមាន​ចុះ​មក​របស់​កីឡាករ ប៉ា​ឡាំង​កៅ លោក​ចង់​ផ្ដល់​ឱកាស​ឱ្យ​រឿង សា​រ័​ត្ន ដោយសារ​តែ​អ្នក​ទាំង​ពីរ​សុទ្ធតែ​ជា​ជើង​ខ្លាំង​ដូច​គ្នា ទើប​លោក​ហ៊ាន​សម្រេច​ផ្គូផ្គង បើ​ទោះជា​មាន​អ្នកគាំទ្រ​ភាគ​ច្រើន​ថា កីឡាករ​កម្ពុជា​រូប​នេះ​អាច​នឹង​ពិបាក​ទប់​ជាមួយ​កីឡាករ​ថៃ ព្រោះ​គេ​គ្រាន់តែ​ជា​ជើង​ថ្មី ។

លោក​ក៏​បាន​កំណត់​ឱ្យ​កីឡាករ​កម្ពុជា​ហ្វឹកហាត់​ជាប់លាប់​មិន​តិច​ជាង​១ ស​ប្ដា​ហ៍​ផង​ដែរ មុន​ពេល​ផ្គូផ្គង ទើប​លោក​យល់​ថា​សមាសភាព​របស់​កីឡាករ​កម្ពុជា​រូប​នេះ គ្រប់គ្រាន់​សម្រាប់​ឱ្យ​ប៉ុស្តិ៍​លេខ​៥​ដាក់​ប្រកួត​ជា​លក្ខណៈ​អន្តរជាតិ នៅ​ថ្ងៃ​សៅរ៍​នេះ ។ លោក​ថា កីឡាករ​កម្ពុជា និង​ថៃ សុទ្ធតែ​ត្រូវ​បាន​អះអាង​ថា​មានការ​ត្រៀមខ្លួន​ច្បាស់លាស់ ដោយសារ​តែ​ភាគី​ម្ខាង​ៗ​ចង់​ឈ្នះ​ការ​ប្រកួត​រៀងខ្លួន និង​មិន​ចង់​បាត់បង់​ក្រេ​ឌី​ត​ក្រោយ​ពេល​ប៉ះ​គ្នា ។ មួយគូ​នេះ មានការ​ចាប់អារម្មណ៍​ភាគច្រើន ដោយ​រំពឹង​ថា​នឹង​មាន​អ្នក​ស្នេហា​វិស័យ​ប្រដាល់​ជក់ចិត្ត និង​ចង់​ដឹង​ពី​បទ​ពិសោធន៍​អ្នក​ទាំង​ពីរ​នៅ​ពេល​ប៉ះ​គ្នា ។

ម្យ៉ាង​កីឡាករ​កម្ពុជា​មិនសូវ​មាន​ទម្លាប់​ឡើង​វ៉ៃ​លាក់​ដៃ​ស្រាប់​ទើប​លោក​ពេញចិត្ត ។ លោក សេង ក​ដិ​កា បន្ត​ថា ជំនួប​អន្តរជាតិ​ដែល​បាន​ធ្វើ​ឡើង​នៅ​ប៉ុស្តិ៍​លេខ​៥ មិនមែន​សុទ្ធតែ​រន្ថើន​ព្រឹត្តិការណ៍​ជើងឯក​អោយ​អ្នក​ទស្សនា​កាន់តែ​មាន​អារម្មណ៍​កញ្ជ្រោល​នោះ​ទេ ប៉ុន្តែ​សម្រាប់​ជំនួប​រវាង​កីឡា​ករ​ទាំង​២​លោក​ជឿជាក់​ថា​នឹង​កក្រើក ដោយសារ​កីឡាករ​ថៃ​លោក​ស្គាល់​ថ្វីដៃ​ច្បាស់​ហើយ​ថា មិនធម្មតា ហើយ​សម្រាប់​កីឡាករ​កម្ពុជា វិញ ក៏​ល្អ​ស្ថិត​ក្នុង​ទំនុកចិត្ត​លោក តាំងពី​មុន​ផ្គូផ្គង ។

យ៉ាងណា​ក៏​ដោយ​លោក​ថា កីឡាករ​កម្ពុជា​ដ្បិតថា​រូប​លោក និង​អ្នកគាំទ្រ​ទុកចិត្ត​ពី​សមត្ថភាព​យ៉ាងហ្នឹង តែបើ​គេ​ប្រកួត​មិនល្អ ឬ មិន​អស់ពី​សមត្ថភាព ក៏​ពិតជា​រង​ការ​រិះគន់​ថា​ជា​ជើងឯក​មិនល្អ ទើប​តម្រូវ​ឱ្យ​គេ​ត្រូវ​តែ​ប្រកួត​ឱ្យ​ខ្លាំង ៕ (​កែសម្រួល​ដោយ ៖ បុប្ផា​)