ធនាគារជាតិលោក ៖ កំណើនសេដ្ឋកិច្ចកម្ពុជាឆ្នាំ២០១៩ រំពឹងសម្រេចបានអត្រា៧ភាគរយ

139

រាជធានី​ភ្នំពេញ​៖ សកម្មភាព​រឹងប៉ឹង​ក្នុង​ការ​នាំ​ចេញ និង​តម្រូវការ​ក្នុងស្រុក​ខ្លាំង ជា​កត្តា​ទ្រទ្រង់​សេដ្ឋកិច្ច​កម្ពុជា​ឱ្យ​នៅ​រក្សា​បាន​ភាព​ស្វាហាប់​និង​ជំរុញ​កំណើនសេដ្ឋកិច្ច​របស់​កម្ពុជា ប៉ុន្តែ​កំណើន​ជាក់ស្តែង​របស់​សេដ្ឋកិច្ច​ត្រូវ​បាន​រំពឹង​ទុក​ថា​នឹង​ថមថយ​ល្បឿន​មក​នៅ​ត្រឹម ៧​ភាគរយ ក្នុង​ឆ្នាំ​២០១៩ ចុះ​ពី ៧,៥​ភាគរយ ក្នុង​ឆ្នាំ​២០១៨​។ នេះ​បើ​យោង​តាម​របាយការណ៍​បច្ចុប្បន្នភាព​សេដ្ឋកិច្ច​កម្ពុជា​ចុង​ក្រោយ​ដែល​ចេញផ្សាយ​ដោយ​ធនាគារពិភពលោក (World Bank/WB) ចេញផ្សាយ​ថ្ងៃ​ទី ២៧ ខែវិច្ឆិកា​ម្សិលមិញ​។

Loading...

ប្រភព​ដដែល​បាន​បង្ហាញ​ថា ការ​នាំ​ចេញ​ផលិតផល​សម្លៀក​បំពាក់ និង​ស្បែកជើង ដែល​មាន​ទំហំ​ប្រហែល ៧០​ភាគរយ​នៃ​ទំនិញ​នាំ​ចេញ​គ្រប់មុខ បាន​កើន​ចំនួន ១៧,៧​ភាគរយ ក្នុង​ឆ្នាំ​២០១៨ ប៉ុន្តែ​ស្រុត​ចុះ​បន្តិច​វិញ​មក​នៅ​ត្រឹម​១៥,៣​ភាគរយ គិត​ត្រឹម​ខែមិថុនា ឆ្នាំ​២០១៩​។ វិស័យ​សំណង់​នៅ​បន្តសកម្មភាព​គគ្រឹកគគ្រេង ដែល​ឆ្លុះ​បញ្ចាំង​ឱ្យ​ឃើញ​ថា​មិន​ទាន់​មាន​ភាព​នឿយណាយ​នៃ​ការ​វិនិយោគ​លើ​វិស័យ​នេះ​នៅឡើយ​ទេ​។ ជា​លទ្ធផល ការ​នាំ​ចូល​ដែក​សំណង់​បាន​ស្ទុះ​ឡើង​យ៉ាង​គំហុក ដល់​ទៅ​៦៣,៥​ភាគរយ គិត​ត្រឹម​ខែមិថុនា ឆ្នាំ​២០១៩ ពី ២៧,៧​ភាគរយ ក្នុង​ឆ្នាំ​២០១៨​។

ជាមួយ​គ្នា​នេះ​ដែរ ហានិភ័យ​បន្ត​កើនឡើង​សម្រាប់​វិស័យ​ហិរញ្ញវត្ថុ ដោយសារ​តែ​មានការ​ពាក់ព័ន្ធ​ច្រើន​ជាមួយ​វិស័យ​សំណង់ និង​អ​លន​ទ្រព្យ អម​ដោយ​ការ​ពូ​នគរ​របស់​បំណុល​ផង ដែល​ក្នុង​នោះ​ទំហំ​នៃ​ការ​ខ្ចីបុល​សរុប​រួម​គ្នា​ពី​ធនាគារ និង​ពី​ស្ថាប័ន​មីក្រូហិរញ្ញវត្ថុ មាន​ជាង ១០០​ភាគរយ នៃ​ផ​.​ស​.​ស ទៅ​ទៀត​។ ​របាយការណ៍​ដដែល​របស់​ធនាគារពិភពលោក​បាន​បញ្ជាក់​ថា បន្ថែម​លើ​នេះ លទ្ធភាព​នៃ​ការ​ដក​ចេញ​ភាព​អនុគ្រោះ​ពាណិជ្ជកម្ម​ក្រោម​ប្រព័ន្ធ «​គ្រប់មុខ​ទំនិញ​ទាំងអស់​លើកលែង​គ្រឿង​សព្វាវុធ​» (Everything But Arms/EBA) និង​ការ​ធ្លាក់​ចុះ​យ៉ាង​គំហុក​ណាមួយ​នៃ​សេដ្ឋកិច្ច​របស់​ប្រទេស​ចិន (​ដែល​អាច​នឹង​កើត​មាន​មក​ពី​ភាព​តានតឹង​ពាណិជ្ជកម្ម​រវាង​សហរដ្ឋអាមេរិក​និង​ចិន​) អាច​បង្ក​ផល​ប៉ះទង្គិច​យ៉ាង​ខ្លាំង​ទៅ​លើ​ទស្សនវិស័យ​កំណើនសេដ្ឋកិច្ច​របស់​កម្ពុជា​។

​ដើម្បី​ពង្រឹងសមត្ថភាព​ប្រកួតប្រជែង​ក្រៅប្រទេស ថ្មី​ៗ​នេះ អាជ្ញាធរ​កម្ពុជា​បាន​ដាក់​ចេញ​វិធានការ​មួយ​ចំនួន​សំដៅ​ជួយ​សម្រួល​ដល់​ការ​ធ្វើ​ពាណិជ្ជកម្ម ដោយ​បន្ទាប​ថ្លៃ​ចំណាយ​លើ​ការ​ដឹក​ជញ្ជូន​, កាត់​បន្ថយ​ការិយាធិបតេយ្យ​, និង​ជួយ​ដល់​ធុរកិច្ច​ដោយ​កាត់​បន្ថយ​ថ្ងៃ​ឈប់​សម្រាក​ផ្លូវការ​ចំនួន​៦​ថ្ងៃ នៅ​ក្នុង​ឆ្នាំ​២០២០​។ បន្ថែម​លើ​នេះ វិធានការ​កញ្ចប់​ហិរញ្ញវត្ថុ​ធំ​គួរសម​មួយ​សម្រាប់​ទ្រទ្រង់​សេដ្ឋកិច្ច​ដោយ​ប្រើ​ប្រាក់​សន្សំ​របស់​រដ្ឋ នឹង​អាច​ត្រូវ​បាន​ដាក់​ចេញ​នៅ​ក្នុង​ឆ្នាំ​២០២០ ដើម្បី​ជួយ​សម្រាល​ផល​ប៉ះទង្គិច​អវិជ្ជមាន​ដែល​បណ្តាលមក​ពី​ការ​ដក EBA ប្រសិនបើ​វា​នឹង​កើតឡើង​មែន​។

​របាយការណ៍​នេះ​ក៏​បាន​គូសបញ្ជាក់​ផង​ដែរ​ថា ការ​ចូលរួម​របស់​កម្ពុជា​នៅ​ក្នុង​សេដ្ឋកិច្ច​សាកល​តាម​រយៈ​ខ្សែ​ចង្វាក់​តម្លៃ​សាកល (GVCs) មាន​សន្ទុះ​លឿន​ជាង​ប្រទេស​ប្រហាក់ប្រហែល​គ្នា​ផ្សេង​ៗ​ទៀត ទោះបីជា​ការ​ចូលរួម​នោះ​ចាប់ផ្តើម​ពី​មូលដ្ឋាន​ទាប​ក៏​ដោយ​។ ការ​ហូរ​ចូល​នៃ​ការ​វិនិយោគ​ផ្ទាល់​ពី​បរទេស (FDI), ភាព​សម្បូរ​នៃ​ពលកម្ម​មាន​ជំនាញ​ទាប​និង​ពលកម្ម​មាន​ប្រាក់​ឈ្នួល​ទាប​, និង​លទ្ធភាព​ទទួល​បាន​ភាព​អនុគ្រោះ​នាំ​ទំនិញ​ចេញ​ទៅ​កាន់​ទីផ្សារ​ធំ​ៗ សុទ្ធតែ​ជា​កត្តា​នៅ​ពីក្រោយ​ការ​ជំរុញ​សមាហរណកម្ម​យ៉ាង​លឿន​របស់​កម្ពុជា​ចូល​ទៅ​ក្នុង​ខ្សែ​ចង្វាក់​តម្លៃ​សាកល នៅ​តាម​ផ្នែក​ផលិតកម្ម​មួយ​ចំនួន​។

លោកស្រី អ៊ិ​ន​ហ្គូ​ណា ដូ​ប្រា​ចា ប្រធាន​គ្រប់គ្រង​ធនាគារពិភពលោក​សម្រាប់​ប្រទេស​កម្ពុជា មាន​ប្រសាសន៍​ថា​«​ដើម្បី​ឈាន​ឡើង​ទៅ​កាន់​ដំណាក់កាល​មួយទៀត​នៃ​ការ​ចូលរួម​ក្នុង​ខ្សែ​ចង្វាក់​តម្លៃ​សាកល​បាន ប្រទេស​កម្ពុជា​ចាំបាច់​ត្រូវ​តែ​មាន​ល្បាយ​គោលនយោបាយ​កាន់តែ​ទំនើប​ជឿនលឿន​ច្រើន​ថែម​ទៀត​។ ក្នុង​នោះ​រួម​មាន ការ​ពង្រីក​កិច្ចព្រមព្រៀង​ពាណិជ្ជកម្ម​និង​ធ្វើ​វា​ឱ្យ​កាន់តែ​ស៊ីជម្រៅ​, ការ​បន្ទាប​របារ​ពាណិជ្ជកម្ម​សម្រាប់​ទំនិញ​នាំ​ចូល​, ការ​បន្ត​ធ្វើការ​កែ​លម្អ​គុណភាព​វិស័យ​អប់រំ​និង​ជំនាញ​របស់​កម្លាំង​ពលកម្ម​, និង​ការ​ចាប់​យក​សេដ្ឋកិច្ច​ឌី​ជី​ថ​ល​ដើម្បី​ជួយ​បណ្តា​ក្រុមហ៊ុន​ឱ្យធ្វើ​សមាហរណកម្ម​ខ្លួន ទៅ​ក្នុង​ខ្សែ​ចង្វាក់​តម្លៃ​សាកល​»​។

​បើ​តាម​ធនាគារពិភពលោក របាយការណ៍​បច្ចុប្បន្នភាព​សេដ្ឋកិច្ច​កម្ពុជា នេះ​ចេញផ្សាយ​ពីរ​ដង​ក្នុង​មួយ​ឆ្នាំ ដោយ​ផ្តល់​ព័ត៌មាន​ថ្មី​ៗ​បំផុត​ស្តី​ពី​កា​រវិ​វត្ត​របស់​ស្ថានភាព​ម៉ាក្រូសេដ្ឋកិច្ច​របស់​កម្ពុជា ក្នុង​រយៈពេល​ខ្លី​និង​មធ្យម​៕ កែសម្រួលដោយ ៖សុឃាក់