ឯកឧត្តម លឹ​ម គាន​ហោ ចូលរួម​ធ្វើ​បទ​បង្ហាញ និង​ពិគ្រោះ​ពិភាក្សា​ផ្តល់​ធាតុ​ចូល​​ក្នុង​ក្របខ័ណ្ឌ​ឧត្តម​ក្រុមប្រឹក្សា​ពិគ្រោះ

145

រាជធានី​ភ្នំពេញ ៖ នា​ព្រឹក​ថ្ងៃ​ចន្ទ ទី​០៩ ខែធ្នូ ឆ្នាំ ២០១៩ ឯកឧត្តម លឹ​ម គាន​ហោ រដ្ឋមន្ត្រីក្រសួង​ធនធានទឹក និង​ឧតុនិយម បាន​ដឹកនាំ​គណៈប្រតិភូ​ក្រសួង​ធនធានទឹក និង​ឧតុនិយម អញ្ជើញ​ចូលរួម​ធ្វើ​បទ​បង្ហាញ និង​ពិគ្រោះ​ពិភាក្សា​ផ្តល់​ធាតុ​ចូល​ក្នុង​ក្របខ័ណ្ឌ​ឧត្តម​ក្រុមប្រឹក្សា​ពិគ្រោះ និង​ផ្តល់​យោបល់​នៅ​ទីស្តីការ​នាយក​រដ្ឋមន្ត្រី (​វិមាន​សន្តិភាព​) ។

Loading...

កិច្ចប្រជុំ​នេះ ប្រព្រឹត្តិ​ទៅ​ដោយ​មានការ​សម្របសម្រួល​ពី​ឯកឧត្តម ឯក សំ​អុល ប្រធាន​ប្ដូរ​វេន​របស់​ឧត្ដម​ក្រុមប្រឹក្សា​ពិគ្រោះ និង​ផ្ដល់​យោបល់ ។

ឯកឧត្តម លឹ​ម គាន​ហោ រដ្ឋមន្ត្រីក្រសួង​ធនធានទឹក និង​ឧតុនិយម បាន​ធ្វើ​បទ​បង្ហាញ​ស្ដី​ពី កា​រវិ​វ​ឌ្ឍ​រីក​ចម្រើន​លើ​វិស័យ​ធនធានទឹក និង​ឧតុនិយម​ជូន​ដល់​អង្គប្រជុំ ។ តាម​រយៈ​បទ​បង្ហាញ​នេះ ក្រុមប្រឹក្សា​ពិគ្រោះ និង​ផ្ដល់​យោបល់ បាន​ធ្វើការ​កោតសរសើរ និង​វាយតម្លៃ​ខ្ពស់​ចំពោះ​ការ​ខិតខំ​ប្រឹងប្រែង​របស់​រាជរដ្ឋាភិបាល ជា​ពិសេស​ក្រសួង​ធនធានទឹក និង​ឧតុនិយម ដែល​បាន​ធ្វើការ​អភិ​វឌ្ឍ​ជា​បន្តបន្ទាប់​លើ​ការងារ​ស្រោចស្រព ដើម្បី​ដោះស្រាយ​ទឹក​ជូន​ដល់​បងប្អូន​ប្រជា​កសិករ ។

បន្ថែម​លើស​ពី​នេះ ឧត្តម​ក្រុមប្រឹក្សា​ពិគ្រោះ និង​ផ្ដល់​យោបល់ ក៏​បាន​វាយតម្លៃ​ខ្ពស់​ផង​ដែរ ចំពោះ​​ឯកឧត្តម​រដ្ឋមន្ត្រី ដែល​បាន​ដឹកនាំ​ក្រុម​អ្នកបច្ចេកទេស​របស់​ក្រសួង ធ្វើការ​សិក្សា​ស្រាវជ្រាវ និង​ប្រមូល​ចងក្រង​ទិន្នន័យ ទុកជា​ឯកសារ​ដ៏​មាន​តម្លៃ សម្រាប់​ការ​សិក្សា​ស្រាវជ្រាវ និង​ការ​អភិ​វឌ្ឍ របស់​អ្នក​ជំនាន់​ក្រោយ ។

បន្ទាប់​ពី​បទ​បង្ហាញ ស្ដី​ពី​សមិទ្ធផល​ការងារ និង​ការ​សិក្សា​ស្រាវជ្រាវ​របស់​ឯកឧត្តម​រដ្ឋមន្ត្រី​រួច​មក សមាជិក​ឧត្តម​ក្រុមប្រឹក្សា​ពិគ្រោះ និង​ផ្ដល់​យោបល់ បាន​លើក​ឡើង​នូវ​សំណួរ និង​សំណូមពរ​មួយ​​ចំនួន ជា​ពិសេស​ពាក់ព័ន្ធ​លើ​ការ​គ្រប់គ្រង​ធនធានទឹក ការ​អភិរក្ស​បឹងបួរ ស្ទឹង ទន្លេ ព្រែក អូរ… ព្រមទាំង​បាន​ពាំនាំ​នូវ​សំណើ​របស់​ប្រជាពលរដ្ឋ​មួយ​ចំនួន ដែល​បាន​ស្នើ​សុំ​សិទ្ធិ​កាន់កាប់​ដីធ្លី នៅ​តំបន់​អាង​ទឹក​មួយ​ចំនួន ។

ជា​ការ​ឆ្លើយ​តប ឯកឧត្តម​រដ្ឋមន្ត្រី​បាន​ទទួលយក​នៅ​ធាតុ​ចូល​នានា ដែល​បាន​លើក​ឡើង​ដោយ​តំណាង​គណបក្ស​នៅ​ក្នុង​ឧត្តម​ក្រុមប្រឹក្សា​ពិគ្រោះ និង​ផ្ដល់​យោបល់ ដើម្បី​ដាក់​បញ្ចូល​ទៅ​ក្នុង​ផែនការ​គ្រប់គ្រង អភិរក្ស និង​អភិវឌ្ឍ​របស់​ក្រសួង ។ ចំពោះ​សំណើសុំ​សិទ្ធិ​កាន់កាប់​ដីធ្លី ដែល​មានការ​ជាប់​ពាក់ព័ន្ធ​នឹង​អាង​ទឹកតូច​មួយ​ចំនួន ឯកឧត្តម​រដ្ឋមន្ត្រី​នឹង​លើកយក​បញ្ហា​នេះ ទៅ​ពិនិត្យ ពិភាក្សា​ជាមួយ​ឯកឧត្តម​អភិបាល នៃ​គណៈ​អភិបាលខេត្ត​ដែល​មានការ​ពាក់ព័ន្ធ ។

ចំពោះ​បញ្ហា​ការ​យក​ប្រាក់​ពី​បងប្អូន​ប្រជាពលរដ្ឋ​ដែល​ចូល​ទៅ​កម្សាន្ត​តាម​បណ្ដា​ប្រព័ន្ធ​ធារា​សាស្ត្រ​​នានា ឯកឧត្តម​រដ្ឋមន្ត្រី​បាន​បញ្ជាក់​ជូន​ថា ក្រសួង​ធនធានទឹក និង​ឧតុនិយម ពុំ​មានការ​ពាក់ព័ន្ធ​នឹង​ការ​តម្រូវ​ឲ្យ​បង់ប្រាក់​នេះ​ទេ ។ ឯកឧត្តម​រដ្ឋមន្ត្រី និង​លើកយក​បញ្ហា​នេះ ទៅ​ពិភាក្សា​ជាមួយ​ក្រសួង​ស្ថាប័ន និង​អាជ្ញាធរ​ដែនដី​ដែល​មានការ​ពាក់ព័ន្ធ ។ ដោយ​សហការ (​កែសម្រួល​ដោយ ៖ បុប្ផា​)