បុរស​ដែល​មាន​ភរិយា​ពូកែ​រក​លុយ​ជាង​ខ្លួន ​គួរ​ធ្វើ​ដូច​ម្តេច?

126

រឿង​លុយ​អាច​ជា​ប្រធានបទ​មួយ​ដែល​មនុស្ស​ពីរ​នាក់ចៀសវាង​និយាយ ​ប្រសិនបើ​ភាគី​ខាង​ភរិយា​រកបាន​ច្រើន​ជាង​ខាង​ស្វាមី ។ ទោះជា​គូជីវិត​មួយ​ចំនួន​មិន​មាន​បញ្ហា​ពិតមែន​ក្តី មនុស្ស​ខ្លះ​ទៀត​នៅ​តែ​មិន​ទាន់​អាច​ទទួលយក​បាន​ព្រោះ​មាន​សម្ពាធ​ពី​សង្គម​ជា​ពិសេស​ទៅ​លើ​ស្វាមី ។

Loading...

ប្រសិនបើ​អ្នកជា​ភាគី​ខាង​បុរស​ដែល​មាន​ភរិយា​ជា​អ្នក​ដែល​រក​ប្រាក់​ចំណូល​បាន​ច្រើន​ជាង​ខ្លួន​ក្នុង​គ្រួសារ​នោះ អ្នក​គួរ​អនុវត្ត​តាម​វិធី​ខាងក្រោម​នេះ​ប្រសិនបើ​អ្នក​ចង់​ការពារ​ទំនាក់ទំនង​អាពាហ៍ពិពាហ៍​របស់​អ្នក ។

១-រក្សា​ភាព​ស្មោះត្រង់​៖
ជំហាន​ដំបូង​សម្រាប់​អ្នក គឺ​បើក​ទូលាយ​ពី​អារម្មណ៍ និង​គំនិត​របស់​អ្នក​ជាមួយនឹង​ភរិយា ជា​ពិសេស​លើ​ទំនួល​ខុស​ត្រូវ​ដែល​អ្នក​ទាំង​ពីរ​ចែករំលែក​ជាមួយ​គ្នា​ក្នុង​ផ្នែក​លុយ ។ ក្រៅពី​រឿង​លុយ​ហើយ អ្នក​ទាំង​ពីរ​ក៏​គួរតែ​ឧស្សាហ៍​និយាយ​គ្នា​ទាក់ទិន​នឹង​អារម្មណ៍​ដែល​ខ្លួន​មាន​ដែរ​ព្រោះ​អ្នក​ទាំង​ពីរ​អាច​នឹង​ចាប់ផ្តើម​លាក់​អារម្មណ៍​ព្រោះតែ​ខាង​ភរិយា​រក​ចំណូល​បាន​ច្រើន​ជាង ។

២-ចូលរួម​ជួយ​ក្នុង​វិធី​ផ្សេង​៖
បើ​អ្នករក​ចំណូល​បាន​ទាប​ជាង​ភរិយា អ្នក​មិន​គួរ​មាន​អារម្មណ៍​ថា​ខ្លួន​មិន​មាន​សមត្ថភាព​គ្រប់គ្រាន់​ឡើយ ។ ផ្ទុយ​មក​វិញ អ្នក​គួរ​គិត​ពី​វិធី​ផ្សេង​ៗ​ដែល​អ្នក​អាច​ចូលរួម​ជួយ​ក្នុង​គ្រួសារ​អ្នក​បាន​ដូច​ជា​ការ​ធ្វើ​កិច្ចការ​ក្នុងផ្ទះ និង​មើលថែ​កូន​ៗ​ជាដើម ។ ចូរ​ចង​ចាំ​ថា​ភរិយា​របស់​អ្នក​ក៏​អាច​ជួបនឹង​សម្ពាធ​ធ្ងន់ធ្ងរ​ព្រោះតែ​ការងារ​ដែរ​ដូច្នេះ​ក្នុង​នាម​ជា​ដៃគូ​ជីវិត អ្នក​មិន​គួរ​ប្រកាន់​ច្រើន​ទេ និង​ជួយ​គាំទ្រ​គ្នា​ទៅ​វិញ​ទៅ​មក​វិញ ។

៣-រៀបចំ​គោលដៅ​ជាមួយ​គ្នា​៖
ចំណុច​សំខាន់​ដែល​អ្នក​ត្រូវ​តែ​ចង​ចាំ​គឺ​ការ​ចូល​ដៃ​គ្នា​ដើម្បី​បង្កើត​គម្រោងការ និង​គោលដៅ​រួម​មិន​ថា​ជា​គោលដៅ​ផ្នែក​លុយ ជីវិត ឬ​អនាគត​ទេ​ឲ្យ​តែ​វា​ល្អ​សម្រាប់​អ្នក​ទាំង​ពីរ ។ អ្នក​ក៏​អាច​ពិភាក្សា​ពី​គោលដៅ​ផ្សេង​ៗ​ដែល​មិន​ពាន់​ព័ន្ធ​និង​លុយ​ដែរ​ដូច​ជា​ការ​សម្រក​ទម្ងន់ ឬ​ការ​ពង្រឹង​សុខភាព​ជាមួយ​គ្នា​ជាដើម ។

៤-ចូរ​ចង​ចាំ​ថា​អ្នក​ត្រូវការ​គ្នា​ទៅ​វិញ​ទៅ​មក​ទើប​អាច​ជោគជ័យ​បាន​៖
ពេល​ដែល​ដៃគូ​របស់​អ្នក​ជោគជ័យ​នោះ​អ្នក​ក៏​ជោគជ័យ​ដែរ ។ អ្នក​មិនមែន​កំពុង​តែ​ប្រកួតប្រជែង​ជាមួយ​គ្នា​ដើម្បី​ដឹង​ថា​នរណា​អាច​រក​ចំណូល​បាន​ច្រើន​ជាងគេ ។ អ្នក​ចែករំលែក​ពេល​ល្អ​ៗ និង​ពេល​លំបាក​ជាមួយ​គ្នា​មិន​ថា​អ្នករក​ចំណូល​បាន​ប៉ុន្មាន​ទេ ៕