ក្រុម​ជួញដូរ​គ្រឿងញៀន​៤​នាក់​នឹង​បញ្ជូន​ទៅ​តុលាការ

ខេត្តបាត់ដំបង ៖ ក្រុម​ជនសង្ស័យ​ចំនួន​៤​នាក់ ដែល​សមត្ថកិច្ច​បង្ក្រាប​បាន​ពាក់ព័ន្ធ​នឹង​បទល្មើស​ជួញដូរ​គ្រឿងញៀន នឹង​អាច​ត្រូវ​កម្លាំង​ការិយាល័យ​ជំនាញ​កសាង​សំណុំរឿង​បញ្ជូន​ទៅ​តុលាការ​នៅ​រសៀល​ថ្ងៃ​ទី​២២ ឬ​ព្រឹក​ថ្ងៃ​ទី​២៣ ធ្នូ នេះ​។ នេះ​បើ​តាម​ការ​ឱ្យ​ដឹង​ពី​មន្ត្រី​ការិយាល័យ​ជំនាញ​។

Loading...

លោក​សុខ និមល នាយការិយាល័យ​ស្ដីទី​ប្រឆាំង​គ្រឿងញៀន​នៃ​ស្នងការ​ខេត្ត បានឱ្យ​ដឹង​ថា ជនសង្ស័យ​ទាំង​៤​នាក់​នោះ រួម​មាន ១-​ឈ្មោះ បេន ប៊ុ​ន​សៀន ហៅ ឌៀ​ន ភេទ​ប្រុស អាយុ​២២​ឆ្នាំ រស់នៅ​ភូមិ​ទួល​ជ្រៃ ឃុំ​សំពៅ​លូន ស្រុក​សំពៅ​លូន ២-​ឈ្មោះ សុខ សំបូរ ភេទ​ប្រុស អាយុ​៣៤​ឆ្នាំ នៅ​ភូមិ​វាលវង់ ឃុំ​តា​ស្តា ស្រុក​សំពៅ​លូន ៣-​ឈ្មោះ មិន មឿ​ន ភេទ​ប្រុស អាយុ​៣៦​ឆ្នាំ និង​៤-​ឈ្មោះ ស៊ី​ម ក្រឹម ហៅ​វ៉ា​ន់ ភេទ​ប្រុស អាយុ​២៦​ឆ្នាំ ។ ជន​២​នាក់​នេះ នៅ​ភូមិ​អូរ​ចំ​ណិ​ប ឃុំ​តា​ស្តា ស្រុក​សំពៅ​លូន​។

លោក​សុខ និមល បាន​បញ្ជាក់​ថា ជន​ទាំង​៤​នាក់​នេះ​ត្រូវ​បាន​កម្លាំង​ជំនាញ​ផ្នែក​គ្រឿងញៀន នៃ​អធិការ​ស្រុក​សំពៅ​លូន​បង្ក្រាប​បានជា​បន្តបន្ទាប់ ក្រោម​ការ​បញ្ជា​ផ្ទាល់​ពី​លោកស្នងការ​ខេត្ត និង​លោក​នួន សាន ព្រះរាជអាជ្ញា​អម​សាលាដំបូង​ខេត្ត កាលពី​រសៀល​ថ្ងៃ​ទី​២០ ធ្នូ នៅ​ក្នុងភូមិ​ត្រពាំង​ព្រលិត ឃុំ​សន្តិភាព ស្រុក​សំពៅ​លូន ខណ​:​ដែល​ក្រុម​សង្គម​ងងឹត​នេះ​កំពុង​ប្រព្រឹត្ត​បទល្មើស​នេះ​ជាក់ស្ដែង​។ ជាមួយនឹង​ការ​ឃាត់ខ្លួន​ក្រុម​នេះ មន្ត្រី​ជំនាញ​រឹបអូស​បាន​វត្ថុ​តាង​គ្រឿងញៀន និង​មធ្យោបាយ​ដែល​ពាក់ព័ន្ធ​មួយ​ចំនួន​ផង​។

យោង​តាម​របាយការណ៍​របស់​អធិការ​ស្រុក​សំពៅ​លូន បានឱ្យ​ដឹង​ថា វត្ថុ​តាង​ដែល​ដកហូត​បាន​ពី​ក្រុម​ជនសង្ស័យ​ទាំង​៤​នាក់​ខាងលើ​នេះ​រួម​មាន ថ្នាំ​ញៀន​ប្រភេទ​មេ​តំ​ហ្វេ​តា​មីន ICE (​ម៉ា​ទឹកកក​) ចំនួន​៤​ថង់​, ទូរស័ព្ទ​ដៃ​ចំនួន​៦​គ្រឿង​ចាស់ (​ខូច​ចំនួន​១​គ្រឿង​) ម៉ូតូ​ចំនួន​២​គ្រឿង​, រថយន្ត​ម៉ាក toyota hillux vigo ចំនួន​១​គ្រឿង​, កាំបិត​វែង​ចំនួន​៣​ដើម​, កាំភ្លើង​កែ​ច្នៃ​បាញ់​គ្រាប់កង់​ចំនួន​០១​ដើម និង ថង់​សម្រាប់​ច្រក​គ្រឿងញៀន​លក់​មួយ​ចំនួន រួម​ទាំង​សម្ភារៈ​សម្រាប់​ប្រើប្រាស់​គ្រឿងញៀន​មួយ​ចំនួន​ទៀត​។

យោង​តាម​ប្រភព​ដដែល​បាន​បន្ត​ថា ពាក់ព័ន្ធ​នឹង​វត្ថុ​តាង​ខាងលើ​នេះ បើ​តាម​ចម្លើយ​របស់​ក្រុម​ជនសង្ស័យ ដែល​មន្ត្រី​ជំនាញ​បាន​សាកសួរ ពួក​គេ​បាន​សារភាព​ទ​ទូល​ស្គាល់​ថា គ្រឿងញៀន​រួម​ទាំង​វត្ថុ​តាង​ពាក់ព័ន្ធ​ដទៃ ដែល​សមត្ថកិច្ច​បាន​ដកហូត គឺ​ពិតជា​របស់​ពួក​ខ្លួន​មែន តែ​ពួក​គេ​ហាក់​មិន​ទម្លាយ​ពី​ប្រភព​គ្រឿងញៀន​ដែល​ក្រុម​ខ្លួន​នាំ​យក​មក​ជួញដូរ​បន្ត​ឱ្យ​ក្បោះក្បាយ​ទេ​។ ប៉ុន្តែ​លោក​សុខ និមល នាយការិយាល័យ​ស្ដីទី បាន​បញ្ជាក់​យ៉ាង​ដូច្នេះ​ថា «​បើ​តាម​ការ​ស៊ើបអង្កេត និង​ការ​តាមដាន​ពី​សកម្មភាព​ក្រុម​នេះ​កន្លង​មកនេះ គឺ​ក្រុម​នេះ​ជា​មុខសញ្ញា​ជូ​ញ​ដូរ​ក្នុង​ទ្រង់ទ្រាយ​ធំដុំ​គួរសម​ដែរ នៅ​ក្នុងស្រុក​សំពៅ​លូន​»​។

លោក​សុខ និមល បាន​បញ្ជាក់​ថា ពេល​នេះ​មន្ត្រី​ការិយាល័យ​ជំនាញ​កំពុង​សាកសួរ​ក្រុម​ជូ​ញ​ដូរ​គ្រឿងញៀន​ទាំង​៤​នាក់​នេះ ហើយ​ត្រៀម​បញ្ជូន​ទៅ​សាលាដំបូង​ខេត្ត ចាត់ការ​តាម​នីតិវិធី​នៅ​ពេល​ឆាប់​ៗ​នេះ​ហើយ​៕ (កែសម្រួលដោយ ៖ ធីតា​)