អាជីវកម្ម​លក់​គ្រឿងសំអាង​តាម​អន​ឡាញ​កាក់កប​ជាង​លក់ដូរ​ផ្ទាល់ តែ​ប្រឈម​នឹង​ហានិ​ភ័យ​ខ្ពស់​ចំពោះ​អ្នក​ប្រើប្រាស់

190

​រាជធានី​ភ្នំពេញ ៖ អាជីវកម្ម​អន​ឡាញ​នា​ពេល​បច្ចុប្បន្ន​នេះ​បាន​នឹង​កំពុង​ជួយ​អោយ​អ្នក​ប្រកប​អាជីវកម្ម​នេះ ក្លាយជា​អ្នក​មានបាន​ក្នុង​ពេល​ដ៏​ខ្លី ដោយ​គេ​បាន​ផ្សព្វផ្សាយ​និង​ប្រកាស​លក់ទំនិញ​របស់​គេ​តាម​បណ្ដាញ​សង្គម​ហ្វេ​ស​ប៊ុ​ក​យ៉ាង​គគ្រឹកគគ្រេង ជា​ពិសេស​នោះ​គឺ​ផលិតផល​គ្រឿងសំអាង​តែ​ម្តង ដោយ​មាន​អ្នកលក់​ខ្លះ​មានការ​បង្ហាញ​ភាព​ស៊ិ​ច​ស៊ី​របស់​ខ្លួន​ទៅ​អតិថិជន​ដើម្បី​អោយ​គេ​ចាប់អារម្មណ៍​ចូល​មើល​ការ​ឡាយ៍​លក់​និង​ទិញ​នូវ​ទំនិញ​របស់​ខ្លួន ។

Loading...

ទន្ទឹម​នឹង​នេះ​ដែរ ដោយសារ​តែ​អាជីវកម្ម​មួយ​នេះ មិន​ទាន់​មានច្បាប់​គ្រប់គ្រង​ជា​ផ្លូវការ ធ្វើ​អោយ​អ្នក​ប្រកប​របរ​នេះ​មួយ​ចំនួន​យក​ទំនិញ​មិន​សុទ្ធ ឬ​ការ​លក់​នូវ​គ្រឿងសម្អាង​បកស្បែក​ដោយ​ពុំ​មានច្បាប់​ត្រឹមត្រូវ ឬ​ទំនិញ​ក្លែងក្លាយ​មក​ប្រកាស​លក់​ដើម្បី​បាន​ប្រាក់​ចំណេញ​ខ្ពស់ ដែល​ជា​ហេតុ​បង្ក​ផល​ប៉ះពាល់​ដល់​អ្នក​ប្រើប្រាស់ ។

​បើ​តាម​អ្នកស្រី សាន សុខ​ខេ​ង អ្នក​នាំ​ចូល​និង​ចែកចាយ​គ្រឿងសំអាង​មក​ពី​ប្រទេស​ថៃ បានអោយ​ដឹង​ថា​ការ​លក់​និង​ចែកចាយ​ផលិតផល​គ្រឿងសំអាង នៅ​ក្នុង​ប្រទេស​កម្ពុជា អ្នកស្រី មើលឃើញ​ថា​ការ​លក់​តាម​អន​ឡាញ​មាន​កំណើន​យ៉ាង​គគ្រឹកគគ្រេង​ជាង​ការ​លក់​ដោយ​ផ្ទាល់ ព្រោះ អតិថិជន​អ្នក​ប្រើប្រាស់​ភាគច្រើន​ទិញ​តាម​រយៈ​ការ Live តាម​បណ្ដាញ​សង្គម​របស់​ភ្នាក់ងារ​លក់​របស់​ខ្លួន ហើយ​សម្រាប់​ការ​មក​ទិញ​ដោយ​ផ្ទាល់​ៗ​ក៏​មាន​ដែរ ក៏​ប៉ុន្តែ​មិន​ច្រើន​ដូច​ការ​លក់​តាម​បណ្ដាញ​សង្គម​អន​ឡាញ​នោះ​ឡើយ ។ ​អ្នកស្រី​បាន​បន្ត​ថា ក្នុង​នាម​ជា​អ្នកលក់​និង​អ្នក​រកស៊ី​តាម​អន​ឡាញ អ្នកស្រី​ក៏​បារម្ភ ចំពោះ​ការ​លក់​ផលិតផល​មិន​សុទ្ធ ផលិតផល​ក្លែងក្លាយ​ទៅ​អតិថិជន​ដែរ ពីព្រោះ​ដោយសារ​តែ​អាជីវកម្ម​អន​ឡាញ​នេះ​មិន​ទាន់​មានច្បាប់​គ្រប់គ្រង​ត្រឹមត្រូវ ដូច្នេះ​អ្នកលក់​ណា​ដែល​ខូច​ៗ​គេ​អាច​យក​លុយ​ហើយ​មិន​ផ្ដល់​ទំនិញ​អោយ ឬ​អោយ​ទំនិញ​មិន​សុទ្ធ​ដូច​អ្វី​ដែល​បាន​ប្រកាស​ក្នុង​ការ Live របស់​គេ​ជាដើម ។

​អ្នកស្រី សាន សុខ​ខេ​ង បាន​និយាយ​ថា « អតិថិជន​យើង​ភាគច្រើន​ជា​យុវវ័យ ដូច្នេះ​ពួក​គាត់​បាន​យល់​ដឹង និង​អាច​ប្រើប្រាស់​ស្មា​ត​ហ្វូ​ន និង​ប្រើប្រាស់​បណ្ដាញ​សង្គម​ហ្វេ​សប៊ុ​កបាន​យ៉ាង​ស្ទាត់ អ​ញ្ចឹ​ង​ហើយ​នៅ​ពេល​ដែល​យើង​ផ្សព្វផ្សាយ​លក់ ឬ Live លក់ទំនិញ​តាម​បណ្ដាញ​សង្គម អតិថិជន​ក៏​បានឃើញ​ហើយ​បញ្ជា​រទិញ​ផលិតផល​របស់​យើង​តាម​ការ​Live របស់​បុគ្គលិក ក៏​ដូច​ជា​ដៃគូ​ជំនួញ​របស់​យើង » ។

​អ្នកស្រី​ក៏​បាន​បង្ហាញ​ពី​ការ​ព្រួយបារម្ភ​ចំពោះ​ជន​ដែល​រកស៊ី​មិន​ស្មោះត្រង់ ចង់​ចំណេញ​លឿន​បន្លំ​ផលិតផល លក់​របស់​ដែល​មិន​សុទ្ធ មិនល្អ ទៅ​តាម​ស្តង់ដារ​ជាដើម ដែល​ធ្វើ​អោយ​ប៉ះពាល់​ដល់​អាជីវកម្ម​នេះ​ទាំងមូល​ផង​ដែរ ។ អ្នកស្រី​ចង់អោយ​ក្រសួង​ចេញ​ច្បាប់​អោយ​ឆាប់​ៗ ដើម្បី​ជួយ​ការពារ​អ្នករក​ស៊ីក្នុង​អាជីវកម្ម​អន​ឡាញ​នេះ ហើយ​ក៏​អាច​អោយ​រដ្ឋាភិបាល​ទទួល​បាន​ចំណូល​បន្ថែម​តាម​រយៈ​ការ​បង់ពន្ធ​ផង​ដែរ ។

បើ​តាម​ការ​សង្កេត​ក្នុង​បណ្ដាញ​សង្គម​ដែល​កើតឡើង​នា​ពេល​កន្លង​មកនេះ ការ​រកស៊ី​លើ​អន​ឡាញ មាន​អ្នកខ្លះ​ទទួល​បាន​ជោគជ័យ តែ​អ្នកខ្លះ​ទៀត​ក៏​មិនសូវ​បាន​ជោគជ័យ​ប៉ុន្មាន​ដែរ ក្នុង​នោះ​គេ​ឃើញ​ថា​តារា​ល្បី​ៗ​បាន​ចាប់​យក​អាជីវកម្ម​អន​ឡាញ​សម្រាប់​លក់​ផលិតផល​គ្រឿងសំអាង ភាគច្រើន​ផ្ដោត​ទៅ​លើ​ឡេ​លាប​ស្បែក ម្សៅលាបមុខ ជាដើម ដោយ​មាន​អ្នកលក់​មួយ​ចំនួន​ដែល​អះអាង​អំពី​ការ​លក់​នូវ​ឡេ​លាប​ឲ្យ​ស្បែក​ខ្លួន ឬ​ស្បែក​មុខ​.​ស ក្នុង​រយៈពេល​ខ្លី ហ៊ាន​ព្រ​លែងខ្លួន​ស្ទើ​តែ​ទាំងស្រុង​ដើម្បី​បង្ហាញ​អំពី​តិច​និ​ច​លាប​ឡេ​អោយ​ឆាប់​.​ស ធ្វើ​យ៉ាងណា​អោយ​អតិថិជន​របស់​ខ្លួន​ជឿជាក់ ។

យ៉ាងណាមិញ​នៅ​រសៀល​ថ្ងៃ​ទី ២០ ខែធ្នូ​កន្លង​ទៅ​នេះ​មិន​អាច​ទាក់ទង​លោកស្រី ឱ វណ្ណ​ឌី​ន អ្នកនាំពាក្យ​ក្រសួងសុខាភិបាល​បាន​ទេ ដោយ​ទូរ​សព្ទ​ចូល​ហើយ ជំនួយការ​លោកស្រី ជា​អ្នក​ទទួល​ថា​លោកស្រី កំពុង​ជាប់រវល់​ប្រជុំ ។ ​យ៉ាងណា​ក៏​ដោយ​យោង​តាម​គេហទំព័រ​ហ្វេ​ស​ប៊ុ​ក​ផ្លូវការ​របស់​ក្រសួងសុខាភិបាល​បាន​បង្ហាញ​ថា ក្រសួង​នឹង​ចាត់​វិធាន​ចំពោះ​ក្រុម​រកស៊ី​អន​ឡាញ លក់​ផលិតផល​គ្រឿងសំអាង​ដែល​មិន​មាន​ប្រភព​ច្បាស់លាស់ មិន​មាន​ចុះ​ប្រវេទន៍ និង​គ្មាន​ច្បាប់​អនុញ្ញាត​អោយ​ផ្សព្វផ្សាយ​ជាដើម ជាក់ស្ដែង​កាលពី​ថ្ងៃ​ទី ១៨ ខែធ្នូ ក្រសួង​បាន​ចេញ​សេចក្តីជូនដំណឹងអោយ​ម្ចាស់​គណនី​ហ្វេ​ស​ប៊ុ​កមួយ​បញ្ឈប់​ការ​នាំ​ចូល​ផលិតផល​គ្មាន​ប្រភព គ្មាន​ការ​ត្រួតពិនិត្យ ហើយ​អោយ​ប្រមូល​ផលិតផល​ទាំងនោះ​មក​កំទេច​ចោល ។

សេចក្តីជូនដំណឹង​របស់​ក្រសួង​បាន​បញ្ជាក់​ថា ការ​ធ្វើ​បែប​នេះ ដើម្បី​ការពារ​ដល់​អ្នក​ប្រើប្រាស់ ដែល​អាច​រង​ផល​ប៉ះពាល់​ដល់​សុខភាព​និង​ឈាន​ដល់​ប៉ះពាល់​ជីវិត​ផង​ដែរ ។ ក្រសួង​ក៏​បាន​បញ្ជាក់​ប្រាប់​សាធារណជន​អោយ​ទាក់ទង​ទៅ​ក្រសួង​ផ្ទាល់​ក្នុង​ករណី​មានការ​សង្ស័យ​ថា​មានការ​ផ្សព្វផ្សាយ និង​ចរាចរណ៍​ផលិត​មិន​ប្រក្រតី​នៅ​ក្នុង​ប្រទេស​កម្ពុជា ដើម្បី​ក្រសួង​ចាត់ការ​បាន​ទាន់​ពេលវេលា ៕ កែសម្រួលដោយ ៖សុឃាក់