ប្រទះ​ឃើញ​បុរស​អនាថា​ម្នាក់​ដេក​ស្លាប់ នៅ​ក្នុង​វត្ត​កំ​បូល

រាជធានី​ភ្នំពេញ ៖ បុរស​អនាថា​វ័យ​ចំណាស់​ម្នាក់​ត្រូវ​បាន​ប្រទះ​ឃើញ​ដេក​ស្លាប់ ក្នុង​បរិវេណ​វត្ត​កំ​បូល ដោយ​ភ្លាម​ៗ​ពុំ​មាន​នរណា​ដឹង​ថា​មូលហេតុ​អ្វី​ឡើយ​។ បន្ទាប់​មក​បាន​រាយការណ៍​ទៅ​កាន់​សមត្ថកិច្ច ចុះ​ទៅ​ពិនិត្យ​មើល​ហើយ​មានការ​សង្ស័យ​ថា ស្លាប់​ដោយសារ​ជំងឺ​គាំងបេះដូង​។ ហេតុការណ៍​នេះ​បាន​បង្ក ឲ្យ​មានការ​ភ្ញាក់ផ្អើល កាលពី​វេលា​ម៉ោង​១ និង​៣០​នាទី​រសៀល ថ្ងៃ​ទី​២៧ ខែមករា ឆ្នាំ​២០២០ នៅ​សាលា​បុណ្យ​វត្ត​កំ​បូល ក្នុងភូមិ​ផ្សា​រកំ​បូល សង្កាត់​កំ​បូល ខណ្ឌ​កំ​បូល រាជធានី​ភ្នំពេញ​។

Loading...

សព​បុរស​ខាងលើ​មិន​ត្រូវ​បាន​ស្គាល់ អត្តសញ្ញាណ​ឡើយ​មាន​អាយុ​ប្រហែល​ជាង​៥០​ឆ្នាំ ស្នាក់​អាស្រ័យ​គ្មាន​គោលដៅ​ច្បាស់លាស់​នោះ​ទេ ប៉ុន្តែ​ភាគច្រើន​ស្នាក់​នៅ​នៅ​ក្នុង​វត្ត​កំ​បូល​នោះ​តែ​ម្ដង​។ ប្រជាពលរដ្ឋ​បាន​ឲ្យ​ដឹង​ថា កាលពី​វេលា​ព្រឹក​ថ្ងៃ​កើតហេតុ​គាត់​ទិញ​បបរ​១​ចាន​ឲ្យ​បុរស​នេះ​ហូប ប៉ុន្តែ​បុរស​នោះ​មិន​ព្រម​ហូប​ឡើយ និង​គិតតែ​ពី​ដេក​មិន​ក្រោយ​សោះ លុះ​រហូត​ដល់​ពេល​កើតហេតុ នៅ​តែ​មិនឃើញ​ក្រោក​ទើប​ចូល​ទៅ​ដាស់​ឲ្យ​ក្រោក​ហូប​បាយ​ហូប​ទឹក ស្រាប់តែ​ប្រទះ​ឃើញ​ស្លាប់​បាត់ ទៅ​ហើយ​។

ទើប​មានការ​ភ្ញាក់ផ្អើល​ហើយ​បាន​រាយការណ៍​ជូន​នគរបាល​ប៉ុស្តិ៍​កំ​បូល​ឲ្យ​ចុះ​ទៅ​ពិនិត្យ​មើល និង​រាយការណ៍​បន្ត​ទៅ​កាន់​នគរបាល​ការិយាល័យ​បច្ចេកទេស​វិទ្យាសាស្ត្រ នៃ​ស្នងការដ្ឋាន​នគរបាល រាជធានី​ភ្នំពេញ​ចុះ​ទៅ​ពិនិត្យ​កោសល្យវិច័យ​។ បន្ទាប់​មក​បាន​នាំ​យក​សាកសព​ទៅ​កាន់​វត្ត​អង្គ​បឹង​ចក សង្កាត់​កំ​បូល ដើម្បី​ធ្វើបុណ្យ​បូជា​៕ ដោយ ៖ យន់ ស៊ី​ថា