កម្ពុជា​-​ម៉ុង​ហ្គោ​លី ពង្រឹង​កិច្ច​សហប្រតិបត្តិការ​ក្នុង​វិស័យ​ទេសចរណ៍

រាជធានី​ភ្នំពេញ ៖ នា​រសៀល​ថ្ងៃ​ទី​២៨ ខែមករា ឆ្នាំ​២០២០ នា​ទីស្ដីការ​ក្រសួងទេសចរណ៍ លោក ថោ​ង ខុន រដ្ឋមន្ត្រី​ក្រសួងទេសចរណ៍​កម្ពុជា បាន​ជួប​សវនាការ​ជាមួយ​លោក Tserenbat Namsrai រដ្ឋមន្ត្រី​បរិស្ថាន និង​ទេសចរណ៍​ម៉ុង​ហ្គោ​លី ដែល​បាន​មក​បំពេញ​ទស្សនៈកិច្ច​នៅ​កម្ពុជា ដើម្បី​ពង្រឹង ថែម​ទៀត​កិច្ច​សហប្រតិបត្តិការ​ទេសចរណ៍​រវាង​ប្រទេស​ទាំង​ពីរ​។ លោក​រដ្ឋមន្ត្រី ថោ​ង ខុន បាន​រំលឹក​អំពី ចំណង​ការទូត​រវាង​ប្រទេស​ទាំង​ពីរ​ជា​ពិសេស​ការ​គាំទ្រ​របស់​ម៉ុង​ហ្គោ​លី​ដល់​កម្ពុជា​ក្នុង​ដំណាក់កាល​កសាង​ជាតិ​ដ៏​លំបាក​បន្ទាប់​ពី​ការ​ផ្ដួលរំលំ​របប​ប្រល័យ​ពួ​ជ​សាសន៍​ប៉ុ​ល​ពត ជា​ពិសេស​ក្រោម​ការ​ដឹកនាំ ប្រកបដោយ​គតិបណ្ឌិត​របស់​សម្ដេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី​នៃ ព្រះរាជាណាចក្រ​កម្ពុជា​។

Loading...

កម្ពុជា​មានការ​អភិវឌ្ឍ​លើ​គ្រប់​វិស័យ ក្នុង​នោះ​វិស័យ​ទេសចរណ៍​កម្ពុជា ក៏​បាន​ចូលរួម​ទ្រទ្រង់​កំណើនសេដ្ឋកិច្ច​ដ៏​ខ្លាំងក្លា​ផង​ដែរ​។ លោក​រដ្ឋមន្ត្រី​បាន​បង្ហាញ​អំពី ការ​បន្ត​អភិវឌ្ឍ​វិស័យ​ទេសចរណ៍​តាម​គោលការណ៍​ចីរភាព​របស់​កម្ពុជា ជា​ពិសេស​ការ​អភិវឌ្ឍ អេកូ​ទេសចរណ៍ និង​ទេសចរណ៍​សហគមន៍ ស្រប​តាម​គោលនយោបាយ​ជាតិ​អេកូ​ទេសចរណ៍ ២០១៩-២០៣០ ក្រោម​យន្តការ​ការងារ​អន្តរក្រសួង ដែល​នឹង​ចូលរួម​ដល់​ការ​លើកកម្ពស់​ជីវភាព​រស់នៅ របស់​ប្រជាពលរដ្ឋ​តាម​មូលដ្ឋាន ក៏​ដូច​ជា​ចូលរួម​ដល់​ការ​សម្រេច​បាន​នូវ​គោលដៅ​អភិវឌ្ឍន៍ ប្រកបដោយ​ចីរភាព​ទាំង​១៧ របស់​អង្គការសហប្រជាជាតិ​។

លោក Tserenbat Namsrai រដ្ឋមន្ត្រី​បរិស្ថាន និង​ទេសចរណ៍​ម៉ុង​ហ្គោ​លី ក៏​បាន​កោតសរសើរ​ដល់​ការ​រីក​ចម្រើន​របស់​កម្ពុជា ជា​ពិសេស​ការ​រីក​ចម្រើន​ឥត​ឈប់ នៃ​វិស័យ​ទេសចរណ៍ និង​បាន​គាំទ្រ​ឲ្យ​មាន​កិច្ច​សហប្រតិបត្តិការ រវាង​ប្រទេស​ទាំង​ពីរ​លើ​វិស័យ​ទេសចរណ៍ ក្នុង​នោះ​ភាគី​ទាំង​ពីរ​បាន​ឯកភាព​លើ​ការ​រៀបចំ​ឲ្យ​មាន អនុស្សរណៈ យោគយល់​ស្ដី​ពី​កិច្ច​សហប្រតិបត្តិការ​លើ​វិស័យ​ទេសចរណ៍ នៃ​ប្រទេស​ទាំង​ពីរ ដោយ​ផ្ដោត​លើ​៖ ១-​ជំរុញ​ការ​ចែករំលែក​បទ​ពិសោធន៍ និង​អភិវឌ្ឍ​រួម​គ្នា​លើ​ទេសចរណ៍​បេតិកភណ្ឌ​វប្បធម៌ ទេសចរណ៍​ទីក្រុង និង​ជនបទ ទេសចរណ៍ធម្មជាតិ អេកូ​ទេសចរណ៍ ទេសចរណ៍​សហគមន៍ ទេសចរណ៍​សាសនា​។​ល​។

២-​ផ្លាស់​ប្តូរ​ដំណើរ​ទស្សនកិច្ច​ស្វែង​យល់ និង​ទស្សនកិច្ច​ផ្លូវការ​ដល់​ផ្នែក ឯកជន ប្រព័ន្ធ​ផ្សព្វផ្សាយ និង​មន្ត្រី​ទេសចរណ៍​ជាតិ ដើម្បី​ជំរុញ​ការ​យល់​ដឹង​ពី​វប្បធម៌ និង​គោលដៅ​ទេសចរណ៍​រវាង​ប្រទេស​ទាំង​ពីរ​។ ៣-​ពិភាក្សា​លើ​លទ្ធភាព​ឲ្យ​មានការ​ហោះហើរ ត្រង់​រវាង​ប្រទេស​ទាំង​ពីរ​។ ៤-​ជំរុញ​ការ​គាំទ្រ​គ្នា​លើ​ការ​រៀបចំ​ព្រឹត្តិការណ៍​ទេសចរណ៍ ដោយ​ជំរុញ ផ្នែក​ឯកជន និង​សាធារណៈ​ចូលរួម​ព្រឹត្តិការណ៍​ទេសចរណ៍​ដែល​រៀបចំ​ដោយ​ប្រទេស​នីមួយ​ៗ​។

សូម​រំលឹក​ថា តាម​កម្ពុជា និង​ម៉ុង​ហ្គោ​លី​បាន​បង្កើត​ទំនាក់ទំនង​ការទូត​ដំបូង​នៅ​ឆ្នាំ​១៩៦០ ហើយ​បន្ទាប់​ពី​កម្ពុជា​បាន​ឆ្លងកាត់​សម័យកាល​ដ៏​ខ្មៅ​ងងឹត ប្រទេស​ទាំង​ពីរ​បាន​បង្កើត​ទំនាក់ទំនង​ការទូត​ឡើង​វិញ​នៅ​ឆ្នាំ​១៩៧៩ ដោយ​បាន​ជួយ​គាំទ្រ​គ្នា​ទៅ​វិញ​ទៅ​មក​លើ​ឆាក​អន្តរជាតិ​៕ ដោយ ៖ សុខ សា​រ៉ា​យ