កូនក្រមុំ​អ្នកស្រី កែវ កល្យាណ ចាប់ផ្តើម​ចេញ​មុខ​ក្រសោប​ទីផ្សារ​ភាពយន្ត

រាជធានី​ភ្នំពេញ ៖ មានការ​ភ្ញាក់ផ្អើល​នៅ​ក្នុង​ពិធី​ជួបជុំ​សិល្បករ​ចាស់​ថ្មី សំពះ​សុំ​សេចក្ដីសុខ​ថត​រឿង​ថ្មី ស្រាប់តែ​គេ​ឃើញ​វត្តមាន​កូនស្រី​ដ៏​ស្រស់​ស្អាត​របស់​អតីត​តារា​សម្តែង កែវ កល្យាណ មាន​តំណែង​ជា តួ​សំខាន់​នៅ​ក្នុង​នោះ​។ អ្វី​ដែល​នឹក​មិន​ដល់​កូនស្រី​រូប​នេះ​បាន​ត្រូវ​អ្នកដឹកនាំ និង​អ្នកនិពន្ធ ពាន់ ភួង​បុប្ផា ជ្រើសរើស​ឲ្យ​មក​ចូលរួម​សម្តែង​ជាមួយ ហើយ​ផលិតករ​ជើង​ចាស់​រូប​នេះ​មិនមែន​ចេះ​តែ​ដាក់​តួ​នោះ​ទេ ប្រសិនបើ​មិនកើត​។

Loading...

អ្នកស្រី ពាន់ ភួង​បុប្ផា បាន​និយាយ​ថា មិនមែន​រើស​មក​ដោយសារ​ស្គាល់​ម្តាយ ឬ​មាន​ខ្សែ​ទើបបាន​ថត​នោះ​ទេ​។ តែ​នេះ​កូនស្រី​របស់​អ្នក​នាង កែវ កល្យាណ គឺ​កញ្ញា កែវ ឡា​វិញ គាត់​មាន​បុគ្គលិកលក្ខណៈ​សមសួន​តាម​ផ្ទៃរឿង ដែល​អ្នកស្រី​មើលឃើញ​ថា គាត់​អាច​ទៅ​រួច ទើប​អោយ​ឱកាស​។ យ៉ាងណា​អ្នកស្រី​មិន​ទាន់​ដឹង​ថា ពេល​ថត​គាត់​សម្តែង​ចូល​តួ​បែប​ណា ទាល់តែ​ប្រឡូក​ហើយ​យើង​កែខៃ​គ្នា​។ ឡា​វិញ ត្រូវជា​តួ​សំខាន់​ក្នុង​រឿង «​រសជាតិ​អ្នកមាន​» ដែល​ជា​រឿង​ភាគ​ថ្មី​នៅ ទូរទស្សន៍ ភី​អិន​អិន បែប​អប់រំ​ជីវិត​សង្គម​ពិត​ៗ ស្តី​ពី​សេចក្តីសុខ​របស់ ក្នុង​គ្រួសារ​មួយ មិន​សំខាន់​ទ្រព្យ​មួយ​មុខ​ទេ​ទាល់តែ​កើត​ចេញពី​សមាជិកគ្រួសារ​។

កញ្ញា កែវ ឡា​វិញ ដែល​មានមុខ​ស្អាត​ដូច​ឥណ្ឌា រាង​ខ្ពស់​សាច់​ស បាន​ឲ្យ​ដឹង​ថា កញ្ញា​កាន់តែ​ភ័យ​បុក​ពោះ ពេល​ទទួល​ដំណឹង​បានការ​ងារ​ជា​តួអង្គ​សំខាន់​ថត​ឲ្យ​អ្នក​មីង​បុប្ផា ដែល​ជា​បុគ្គល​ឆ្នើម​ខាង​ភាពយន្ត​។ នាង​មាន​តែ​ព្យាយាម​ធ្វើការ​ឲ្យ​ល្អ ហើយ​មិនមែន​អាង​ម្តាយ​អត់​ខំ​សម្តែង​ដុះខាត់​នោះ​ទេ​។ ផ្ទុយ​ទៅ​វិញ នាង​បាន​ទុន​ខ្លះ​ៗ​ពី​អ្នក​ម្តាយ​ឲ្យ​ចេះ​លេង​ទឹកមុខ​ពេល​ថត រៀន​ឈ្វេងយល់​ពី​មនុស្ស​ជុំវិញ​ខ្លួន បើ​ស្រឡាញ់​សិល្បៈ​ចង់​បន្តវេន​។ ពេល​នេះ​គាត់​បើកឱកាស​អត់​ហាម​នោះ​ទេ មាន​តែ​ចាំ​អ៊ុត​មើល ការងារ​យើង​រលូន​បែប​ណា​។

ឡា​វិញ និយាយ​ទៀត​ថា នាង​ពេញចិត្ត​តំណែង​តួ​សម្តែង ហើយ​សិល្បៈ​ចង់​បង្ហាញ​ស្នាដៃ​ឲ្យ​ច្រើន​ដូច​ជា​ដើរ​ម៉ូ​ដ និង​ការងារ​ផ្នែក​ពិធី​ការិនី​ជាដើម​។ តារា​ចូលរួម​សម្តែង​ក្នុង​រឿង «​រសជាតិ​អ្នកមាន​» រួម​មាន​លោក ជា សំណាង​, កញ្ញា កែវ ឡា​វិញ​, កញ្ញា ទឹម រ​ដ្ឋា​, កញ្ញា ខាត់ យ៉ា​ឡា​ង​, កញ្ញា ម៉ូ​នី វិ​ជ្ឋ​រ៉ា​, បញ្ញា សិទ្ធិ​, អ៊ែ​ត វី​ន​, ហង្ស សម្បើម​ស័ក្តិ​, លោក ជន និង​តារា​ផ្សេង​ៗ​ទៀត​៕ ដោយ ៖ ខាត់ សា​មឿ​ន