រថយន្ត​ពីរ​គ្រឿង​បុក​គ្នា​ចន្លោះ​គីឡូម៉ែត្រ​លេខ​១១៥-១១៦ ចំណុច​លើ​ស្ពាន​ស្ទឹង​សំរោង

ខេត្ត​ព្រះ​សីហ​នុ ៖ នៅ​វេលា​ម៉ោង​៨ និង​៤០​នាទី​ព្រឹក ថ្ងៃ​ទី​១៤ ខែមីនា ឆ្នាំ​២០២០ ចន្លោះ​គីឡូម៉ែត្រ​លេខ ១១៥-១១៦ ចំណុច​លើ​ស្ពាន​ស្ទឹង​សំរោង ស្ថិត​ក្នុងភូមិ​ស្ទឹង​ច្រាល ឃុំ​អូរ​បាក់រទេះ ស្រុក​កំពង់​សីលា ខេត្ត​ព្រះ​សីហ​នុ មាន​ករណី​គ្រោះថ្នាក់​ចរាចរ​មួយ​បាន​កើតឡើង រវាង​រថយន្ត​នឹង​រថយន្ត​មាន​ទិស​ដៅ​បញ្ច្រាសទិស​ដៅ​គ្នា (​ភ្នំពេញ​-​ព្រះ​សីហ​នុ​) ទី​១-​រថយន្ត​ម៉ាក ហ៊ី​យ៉ា​ន់​ដាយ ពណ៌​ស ពាក់​ស្លាក​លេខ កំពង់ស្ពឺ 3A-2329 បើកបរ​ដោយ​ឈ្មោះ ឆោម ច​ន្នី ភេទ​ប្រុស អាយុ​៣១​ឆ្នាំ មាន​ទីលំនៅ ផ្សារ​ត្រពាំង​ក្រឡឹង ស្រុក​ភ្នំស្រួច ខេត្តកំពង់ស្ពឺ រង​របួសស្រាល​ត្រូវ​ជើង ខាងស្តាំ​។

Loading...

ទី​២-​រថយន្ត​ម៉ាក ហ៊ី​ណូ ពណ៌​ស ពាក់​ស្លាក​លេខ ត្បូងឃ្មុំ 3A-0511 អ្នក​បើក​រត់គេច​បាត់ ស្រប​ពេល​នោះ​ម៉ូតូ​មួយ​គ្រឿង​មក​ដល់​ម៉ាក ហុងដា​ឌ្រី​ម ស៊េរី​ឆ្នាំ​២០១៩ ពាក់​ស្លាក​លេខ កោះកុង 1B-8791 ដោយ​មាន​គ្នា​០២​នាក់ បើកបរ​ដោយ​ឈ្មោះ គង់ វិ​ចិ​ត្រា ភេទ​ប្រុស អាយុ​២៧​ឆ្នាំ និង​ឈ្មោះ ប៉េង សុ​ខន ភេទ​ប្រុស អាយុ​២៥​ឆ្នាំ ក៏​បាន​បុក​ជាមួយ​រថយន្ត​ខាងលើ​បណ្តាល​ឲ្យ​អ្នក​រួម​ដំណើរ​ជិះ​ម៉ូតូ រង​របួស​បាក់ជើង​ខាងឆ្វេង មាន​ទីលំនៅ​ភូមិ​៤ សង្កាត់​ស្មាច់​មាន​ជ័យ ក្រុង​ខេមរភូមិន្ទ ខេត្តកោះកុង ត្រូវ​បាន​បញ្ជូន​ទៅ​សង្គ្រោះ​។

ចំពោះ​មុខ​រថយន្ត​ទាំង​ពីរ​ខាងលើ​បាន​ជាប់​នៅ​លើ​ស្ពាន​បណ្តាល​ឲ្យ​មាន ការ​កកស្ទះ កម្លាំង​កងរាជអាវុធហត្ថ​ស្រុក និង​កម្លាំង​ប៉ូលិស​ស្រុក បាន​សម្រួល​បញ្ចៀស​ការ​កកស្ទះ រហូត​ដល់​ចរាចរ​ដំណើរការ​ទៅ​មក​ធម្មតា​។ ក្រោយ​ពេល​កើត​ហេ​ត​រថយន្ត​ទាំង​ពីរ និង​ម៉ូតូ​ខាងលើ​យក​ទៅ​រក្សា​ទុក​នៅ​អធិការដ្ឋាន​នគរបាល​ស្រុក​កំពង់​សីលា​បន្ត​តាម​នីតិវិធី​៕ ដោយ ៖ ហ៊ុយ ចាន់​ធួន