ពលរដ្ឋ​នៅ​ស្រុក​ចិត្រ​បុរី​បង្វែរ​របរ​ពី​ដឹក​ជញ្ជូន​អនុ​ផល​ព្រៃឈើ មក​ធ្វើ​របរ​ដំណាំ​ធម្មជាតិ

ខេត្តក្រចេះ ៖ ពលរដ្ឋ​រស់នៅ​ឃុំ​គោ​លាប់ ស្រុក​ចិត្រ​បុរី ប្រមាណ​ជិត​១០​គ្រួសារ សព្វថ្ងៃ​បាន​បង្វែរ​មុខរបរ ពី​ការ​ដឹក​ជញ្ជូន​អនុ​ផល​ព្រៃឈើ​ដែល​ជា​របរ​ខុសច្បាប់​មក​ចាប់​យក​របរ​ដាំ​បន្លែ​ធម្មជាតិ និង​ចិញ្ចឹម សត្វ​ជា​ប្រភព​ចំណូល​ចម្បង​ប្រចាំ​គ្រួសារ​។ ពួក​គាត់​និយាយ​ថា បន្ទាប់​ពី​ពួក​គាត់​ចាប់​យក​របរ​ដាំ​បន្លែ ធម្មជាតិ​មាន​រយៈពេល​ជា​៦​ឆ្នាំ​មកនេះ ធ្វើ​ឲ្យ​ស្ថានភាព​ជីវភាព​ក្នុង​គ្រួសារ​របស់​ពួក​គាត់​កាន់តែ​រីក ធំធាត់​ពី​មួយ​ឆ្នាំទៅ​មួយ​ឆ្នាំ​។ ពលរដ្ឋ​ទាំងនោះ​បាន​រៀបរាប់​ថា កន្លង​មក​ពួក​គាត់​បាន​នាំ​គ្នា​ចាប់​យក​របរ ដឹក​ជញ្ជូន​អនុ​ផល​ព្រៃឈើ​ដូច​ជា ចូល​ព្រៃ​ទៅ​កាប់​អុស កាត់ឈើ​ជន្លង់ម្រេច និង​អា​ច្រៀក​ឈើ​កា្តរ និង​សរសរ យក​ពី​ព្រៃ​មក​លក់​។

Loading...

ដែល​របរ​មួយ​នេះ​មាន​ភាព​ប្រឈម​នឹង​ផ្លូវច្បាប់​ជា​ខ្លាំង ចំណែកឯ​ផល​ចំណេញ​វិញ​ក៏​មិនឃើញ បាន​អ្វី​ជា​ដុំ​កំភួន​នោះ​ដែរ​។ តែបើ​ទោះជា​យ៉ាងណា ការ​ដាំ​ដុះ​បន្លែបង្ការ​របស់​ពួក​គាត់​សព្វថ្ងៃ​មាន​ពេល​ខ្លះ ធ្លាក់ ទិន្នផល​បាន​កម្រៃ​តិចតួច ដោយសារ​តែ​មានការ​ប្រឈម​នឹង​កង្វះ​ទឹក​ស្រប​ជាមួយនឹង​សណ្ឋាន​ដី​ខ្លះ​គឺ​មិនសូវ​មាន ជីជាតិ ធ្វើ​ឲ្យ​ការ​ដាំ​ដុះ​មានការ​លូតលាស់​មិន​បាន​ល្អ​។ ពួក​គាត់​បាន​ប្រៀបធៀប​ថា ការ​ដាំ​ដុះ​ទទួល​ទិន្នផល​ច្រើន​នា​រដូវវស្សា ដោយសារ​មានទឹក​ស្រោចស្រព​គ្រប់គ្រាន់ ចំណែកឯ​រដូវប្រាំង​ទិន្នផល​ធ្លាក់​ចុះ​ខ្លាំង​ដោយសារ​តែ​បញ្ហា​កង្វះ​ទឹក​ស្រោចស្រព​។ ដោយសារ​តែ​កត្តា​ខ្វះ​ទឹក ទើប​ធ្វើ​ឲ្យ​ពលរដ្ឋ​ខ្លះ បាន​សម្រេច​ផ្អាក​ការ​ដាំ​ដុះ​បន្លែ​នៅ​រៀង​រាល់​រដូវប្រាំង​។

មាន​វ័យ​៥០​ឆ្នាំ បុរស​ឈ្មោះ ស៊ុម សុខ ជា​ពលរដ្ឋ​មួយ​គ្រួសារ ក្នុង​ចំណោម​ពលរដ្ឋ​ជិត​១០​គ្រួសារ ដែល​មាន​របរ​ដាំ​បន្លែ​ធម្មជាតិ និង​ចិញ្ចឹមសត្វ រស់នៅ​ក្នុង​ឃុំ​គោ​លាប់ ស្រុក​ចិត្រ​បុរី បាន​រៀបរាប់​ប្រាប់ ឲ្យ​ដឹង​នៅ​ថ្ងៃ​ទី​២០ ខែមីនា នេះ​ថា គ្រួសារ​របស់​គាត់​បាន​ចាប់​យក​របរ​ដាំ​បន្លែ​ធម្មជាតិ​ជា​របរ​ស្នូល​នេះ មាន​រយៈពេល​ជាង​៦​ឆ្នាំ​មក​ហើយ​។ បន្លែ​ដែល​គាត់​ដាំ ជា​ប្រ​រ​ភេទ​បន្លែ​ធម្មជាតិ រួម​មាន​ស្ពៃ ខាត់ណា ត្រប់ សណ្តែកទ្រើង ម្រះ និង​បន្លែ​ផ្សេង​ៗ​ទៀត​។ បុរស​រូប​នេះ​ថា ដោយសារ​តែ​បន្លែ​ដែល​គាត់​ដាំ​ដុះ​ភាគច្រើន​គឺ​ប្រើ​ជីធម្មជាតិ ទើប​មិន​ពិបាក​រក​ទីផ្សារ​លក់​នោះ​ទេ​។ កំពង់​រែក​ទឹក​ស្រោច​ស្ពៃ​ដែល​បាន​ដាំ​នៅ​លើ​រង ដែល​ត្រូវ​បាន​លើក​ជា​ជួរ​ៗ​នៅ​លើ​ដី​ខាងក្រោយ ផ្ទះ​បុរស​ជា​កសិករ​រូប​នេះ បាន​អះអាង​ថា របរ​ដាំ​បន្លែ​នេះ​អាច​រក​ប្រាក់​ចំណូល​ពី​មធ្យម​ក្នុង​មួយ​ខែ បាន​ជាង​១​លាន​រៀល ទៅ​២​លាន​រៀល​ឯណោះ​។

គាត់​ចាត់​ថា របរ​នេះ​បាន​ជួយ​កែប្រែ​ជីវភាព​របស់ គាត់​ពី​ភាព​ដុនដាប​ខ្លាំង​ឲ្យ​កែប្រែ​មុខមាត់​ថ្មី​នៅ​ក្នុង​សង្គម​ជឿនលឿន និង​គេ​មួយ​កំ​ម្រិ​ត​ទៀត​។ មិន​ត្រឹមតែ​ចាប់​យក​របរការ​ដាំ​បន្លែ​ធម្មជាតិ​តែ​មួយ​គ្រួសារ​ខ្លួនឯង​នោះ​ទេ គ្រួសារ​បុរស​ជា​កសិករ រូប​នេះ ថែម​ទាំង​បាន​ផ្តល់​ចំណេះដឹង​ពី​វិធី​ការ​ដាំ​បន្លែ​ធម្មជាតិ​នេះ​ដល់​អ្នក​ភូមិ​ក្នុង​ឃុំ​ជាមួយ​ជា​ច្រើន​គ្រួសារ​ផ្សេង​ទៀត ដើម្បី​ជំរុញ​ឲ្យ​អ្នក​ភូមិ​បង្វែរ​ពី​ការ​ដឹក​ជញ្ជូន​អនុ​ផល​ព្រៃឈើ ដែល​ជា​របរ​ខុសច្បាប់ ឲ្យ​មក​ចាប់​យក​របរ​ដាំ​បន្លែរ​ដូច​គ្រួសារ​របស់​គាត់​វិញ​។ អាជ្ញាធរ​ស្រុក​ចិត្រ​បុរី​បាន​ឲ្យ​ដឹង​ថា ស្រុក​ចិត្រ​បុរី​មាន​ឃុំ​ចំនួន​៧ ក្នុង​នោះ​មាន​ឃុំ​ចំនួន​៤ មា​នទី​តាំងនៅ​ប្រ៉​ប​នឹង​ដង​ទន្លេមេគង្គ​។ ហើយ​ពលរដ្ឋ​ដែល​រស់នៅ​ក្នុង​ឃុំ​ទាំង​៤​នេះ​ភាគច្រើន​បាន​ចាប់​យក​របរ​កសិកម្ម ដូច​ជា​ចិញ្ចឹមសត្វ ចិញ្ចឹម​ត្រី ធ្វើស្រែ និង​ដាំ​ដំណាំ ជា​របរ​ចម្បង​ក្នុង​គ្រួសារ​៕ ដោយ ៖ ប៊ុ​ន លី​ន​ណា