បង្ក្រាប​ទីតាំង​បំបែកសម្បុក​ចោរលួច​ម៉ូតូ យក​មក​លាក់​ទុក​នៅ​ក្នុង​ក្រុង​សៀមរាប

ខេត្តសៀមរាប ៖ ក្រោយ​ទទួល​បណ្ដឹង​ពី​ជន​រង​គ្រោះ ម្ចាស់​ម៉ូតូ​ស្កូ​ពី​ដែល​ជនសង្ស័យ​ធ្វើ​សកម្ម​លួច​កាច់​សោករ​នៅ​ក្នុងភូមិ​វត្ត​បូព៌ សង្កាត់​សាលា​កំរើក ក្រុង​សៀមរាប ត្រង់​ចំណុច​ផ្លូវ​សាលា​បញ្ញា​សាស្ត្រ​ហើយ​ជនសង្ស័យ​បាន​បើក​គេចខ្លួន​បាត់ ទើប​លោក​វរសេនីយ៍ឯក ណុ​ប សា​រ៉ា​ក់ អធិការ​នគរបាល​ក្រុង​សៀមរាប ដឹកនាំ​កម្លាំង​នគរបាល ព្រហ្មទណ្ឌ​ក្រុង​សៀមរាប បាន​ចុះ​សហការ​ជាមួយ​កម្លាំង​ប៉ុស្តិ៍​នគរបាល​សង្កាត់​សាលា​កំរើក និង​កម្លាំង​ប៉ុស្តិ៍​នគរបាល​សង្កាត់​ជ្រាវ ហើយ​ស្រាវជ្រាវ​ឃើញ ទីតាំង​ដែល​ក្រុម​ចោរ​ជំនាញ ខាង​កាច់​សោក​ម៉ូតូ​យ៉ាង​សកម្ម នៅ​ក្នុង​ក្រុង​សៀមរាប យក​ម៉ូតូ​ទៅ​លាក់​ទុក​នៅផ្ទះ​ជួល​ដាច់​ពី​គេ ក្នុង​ដី​ឡូត៍មួយ​កន្លែង ដែល​មាន​ម្ចាស់ផ្ទះ​ជួល​ឈ្មោះ អួ​ង វ​ណ្ណា ភេទ​ប្រុស អាយុ​៤៩​ឆ្នាំ ស្ថិត​នៅ​ចំណុច​ក្រុម​ទី​៧ ភូមិ​បុស្ស​ក្រឡាញ់ សង្កាត់​ជ្រាវ ក្រុង​/​ខេត្តសៀមរាប។

Loading...

ហើយ​ក្រុម​ជនសង្ស័យ បានដឹង​ថា មាន​កម្លាំង​នគរបាល តាម​ពីក្រោយ ក៏​នាំ​គ្នា​ចាក់សោ​របង​មុខ​ផ្ទះ និង​ចាក់​គន្លឹះទ្វារ មុខ​ផ្ទះ​គេច​តាម​ច្រក​ក្រោយ​បាត់​។ នៅ​ក្នុងផ្ទះ​សមត្ថកិច្ច​យើង​បាន​ធ្វើការ​ឆែកឆេរ​ឃើញ​ម៉ូតូ ៥​គ្រឿង (៤​គ្រឿង​ម៉ូតូ​ម៉ាក​ហុងដា​ឌ្រី​ម និង​១​គ្រឿង​ទៀត​ម៉ាក​ស្គុ​ប​ពី​) និង​សម្ភារ​វត្ថុ​តាង​សម្រាប់​ធ្វើ​សកម្មភាព មួយ​ចំនួន រួច​យក​មក​រក្សា​ទុក​នៅ​អធិការដ្ឋាន​នគរបាល​ក្រុង​សៀមរាប ដើម្បី​រៀបចំ​កសាង​សំណុំរឿង បន្ត​ទៅ​តុលាការខេត្ត​ចាត់ការ​ទៅ​តាម​ផ្លូវច្បាប់​។ ហេតុការណ៍​ចុះ​ប្រតិបត្តិការ​បំបែកសម្បុក​ក្រុម មុខសញ្ញា​ចោរ​កាច់​សោក​ម៉ូតូ​នោះ​ធ្វើ​ឡើង​នៅ​ថ្ងៃ​ទី​២០ ខែមីនា ឆ្នាំ​២០២០ ស្ថិត​នៅ​ក្នុងផ្ទះ ដី​ឡូត៍​១​កន្លែង ក្នុងភូមិ​បុស្ស​ក្រឡាញ់ សង្កាត់​ជ្រាវ ក្រុង​/​ខេត្តសៀមរាប​។

បើ​តាម​ការ​អះអាង​ពី​លោក វរសេនីយ៍ឯក ណុ​ប សា​រ៉ា​ក់ បាន​ប្រាប់​ថា បន្ទាប់​ពី​ទទួល​បាន​ពាក្យបណ្តឹង​របស់​ជន​រង​គ្រោះ ថា ចោរលួច​កាច់​សោក​ម៉ូតូ​បាត់​នៅ​ត្រង់​ចំណុច​ផ្លូវ​សាលា​បញ្ញា​សាស្ត្រ ហើយ​ជនសង្ស័យ​បាន​បើក គេចខ្លួន​បាត់ ដោយ​ក្នុង​ម៉ូតូ​នោះ​មាន​ដាក់ GPS ទើប​សមត្ថកិច្ច​យើង​បាន​តាម​ជាមួយ​ម្ចាស់​ម៉ូតូ ទៅ​ដល់​ផ្ទះ​ជួល​ដាច់​ពី​គេ ក្នុង​ដី​ឡូត៍​មួយ​កន្លែង ខណៈ​ពេល​នោះ​លោក​ក៏​សុំ​ការ​អនុញ្ញាត ពី​ព្រះរាជអាជ្ញា អម​សាលាដំបូង​ខេត្តសៀមរាប ធ្វើការ​ឆែកឆេរ​ភ្លាម​ៗ ហើយ​ឃើញ​មាន​ម៉ូតូ​ចំនួន ៥ គ្រឿង ក្នុង​នោះ​មាន​(​ម៉ូតូ​៤​គ្រឿង​ម៉ាក​ហុងដា​ឌ្រី​ម និង​១​គ្រឿង​ទៀត​ម៉ាក​ស្គុ​ប​ពី ដែល​ជា​របស់​ជន​រង​គ្រោះ​) និង​សម្ភារ​វត្ថុ​តាង​សម្រាប់​ធ្វើ​សកម្មភាព​កាច់​សោក​មួយ​ចំនួន​។

លោក​បាន​បញ្ជាក់​ថា ១-​ម៉ូតូ​ម៉ាក​ហុងដា ពណ៌​ខ្មៅ​ស៊េរី​ឆ្នាំ​២០១៧ ពាក់​ស្លាក​លេខ កណ្ដាល 1W-59 45 លេខ​ម៉ាស៊ីន និង​លេខ​តួ 9776234 ម៉ូតូ​នេះ​ទុក​នៅ​ខាងក្រៅ​ផ្ទះ​មុខ​ផ្ទះ​ក្នុង​របង​។ ២- ម៉ូតូ​ម៉ាក​ស្កុប​ពី​ពណ៌​ស គ្មាន​ស្លាក​លេខ ស៊េរី​ឆ្នាំ​២០១៨ ដែល​មាន​លេខ​ម៉ាស៊ីន និង​លេខ​តួ pet1 01 257 ទុក​នៅ​ក្នុងផ្ទះ​កន្លែង​ទទួលភ្ញៀវ​។ ៣-​ម៉ូតូ​ម៉ាក​ហុងដា​ឌ្រី​ម ពណ៌​ខ្មៅ ស៊េរី​ឆ្នាំ​២០១៩ គ្មាន​ស្លាក លេខ​ម៉ាស៊ីន និង​លេខ​តួ 5445 801​។ ៤-​ម៉ូតូ​ម៉ាក​ហុងដា​ឌ្រី​ម​ពណ៌​ខ្មៅ​ស៊េរី ឆ្នាំ​២០១៥ ពាក់​ស្លាក​លេខ កំពង់ចាម 1G-1490 មាន​លេខ​ម៉ាស៊ីន និង​លេខ​តួ 9365 865​។ ៥- ម៉ូតូ​ម៉ាក​ហុងដា​ឌ្រី​ម ពណ៌​ខ្មៅ ស៊េរី​២០១២ មាន​ស្លាក​លេខ សៀមរាប 1K-9988 លេខ​ម៉ាស៊ីន និង​លេខ​តួ 8754 585 ម៉ូតូ​នេះ​ទុក​នៅ​ក្នុង​បន្ទប់​ក្នុងផ្ទះ​។

ក្រោយ​ធ្វើការ​ត្រួតពិនិត្យ​ចប់​សព្វគ្រប់ កម្លាំង​ជំនាញ​ក្រុង និង​ប៉ុស្ដិ៍​បាន​យក​ម៉ូតូ​ជា​វត្ថុ​តាង​ទាំងអស់​ទៅ​រក្សា​ទុក​នៅ​អធិការដ្ឋាន នគរបាល​ក្រុង​សៀមរាប​។ ចំណែក​ជនសង្ស័យ​បាន​រត់គេច​ខ្លួន​បាត់​មុន​កម្លាំង​នគរបាល​ទៅ​ដល់​។ លោក​បាន​បញ្ជាក់​បន្ថែម​ថា លោក​បាន​សំណូមពរ តាម​សេចក្តី​ប្រកាស​ព័ត៌មាន និង ជូនដំណឹង​ដល់​បងប្អូន ជន​រង​គ្រោះ​ដែល​បាន​បាត់​ម៉ូតូ ទាំងអស់​នៅ​ក្នុង​ក្រុង​សៀមរាប សូមអ​ញ្ចើ​ញ​យក​ឯកសារ​មក​ធ្វើការ​ផ្ទៀងផ្ទាត់ លេខ​តួ លេខ​ម៉ាស៊ីន តាម​ព័ត៌មាន​នេះ បើ​ពិនិត្យ​ឃើញ​ថា ត្រឹមត្រូវ​ជាក់ស្ដែង​នៅ​កន្លែង អធិការដ្ឋាន​នគរបាល​ក្រុង ជាមួយនឹង​មន្ត្រី​នគរបាល​ព្រហ្មទណ្ឌ​ក្រុង ដើម្បី​ស្នើរ​សុំ​យក​ទៅ​ប្រើប្រាស់​វិញ​។

បើ​តាម​ប្រភព​ពី​ពលរដ្ឋ​នៅ​ក្នុង​ក្រុង​សៀមរាប រង់ចាំ​មើល​ថា តើ​សមត្ថកិច្ច​មាន​វិធានការ​ក្តៅ ឬ​ត្រជាក់​ជាមួយ​ចោរ និង​ម្ចាស់ផ្ទះ​បើ​ម្ចាស់​ម៉ូតូ​ឃើញ​ចោរ ហើយ រត់​ទៅ​ប្រាប់​ប៉ូលិស​មួយ​ភ្លែត​ដល់​មក​វិញ​ស្រាប់តែ​បាត់​ចោរ​ឈឹង តើ​សមត្ថកិច្ច​ជំនាញ អាច​ស្វែងរក​ចាប់ចោរ​ជំនាញ​កាច់​សោក​ម៉ូតូ ដ៏​សកម្ម​នៅ​ក្នុង​ក្រុង​ទេសចរណ៍​យក​មក​វិញ​បាន​ទេ ហើយ​ម្ចាស់ផ្ទះ​មានទោស​ដែរ​ឬ​យ៉ាងណា ពួក​គាត់​កំពុង​រង់ចាំ​មើល​៕ ដោយ ៖ ច័ន្ទ រស្មី