ការ​ប្រើ​ថ្នាំ​គ្រុនចាញ់​កម្រិត​ខ្ពស់​ទៅ​លើ​អ្នកជំងឺ​កូ​វី​ដ​-១៩ អាច​បង្ក​ផលវិបាក​បេះ​ដូង​ធ្ងន់ធ្ងរ

ការ​ស្រាវជ្រាវ ៖ អ្នក​វិទ្យាសាស្ត្រ​ជា​ច្រើន​ក្នុង​ប្រទេស​ប្រេ​ហ្ស៊ី​ល​បាន​ឈប់​ធ្វើការ​សិក្សា ទៅ​លើ​ថ្នាំ​គ្រុនចាញ់ ក្រោយ​ពី​វា​បាន​បង្ក​ជា​បញ្ហា​ដល់​ចង្វាក់បេះដូង​អ្នកជំងឺ​រហូត​ដល់​មួយ​ភាគ​បួន នៃ​អ្នកជំងឺ​ដែល​គេ​សិក្សា​ស្រាវជ្រាវ​ក្នុង​ការ​ប្រើប្រាស់​កម្រិត​ខ្ពស់​រហូត​ដល់ ២​ដូ​ស​។ នេះ​បើ​តាម​ទីភ្នាក់ងារសារព័ត៌មាន AP និង​ការ​ផ្សាយ​របស់​សារព័ត៌មាន Daily Mail ។

Loading...

ថ្នាំ​ប្រភេទ Chloroquine និង​ថ្នាំ​ថ្មី​មួយទៀត​ស្រ​ដៀង​គ្នា​ដែរ​ឈ្មោះ​ថា Hydroxychloroquine ត្រូវ​បាន​ប្រធានាធិបតី​អា​មេ​រិ​ក លោក Donald Trump ណែនាំ​ឲ្យ​ប្រើប្រាស់​ក្រោយ ពី​ការ​ធ្វើតេស្ត​កាលពីមុន​ថា អាច​ទប់ស្កាត់​វីរុស​កុំ​ឲ្យ​ចូល​ទៅ​ក្នុង​កោសិកា​។ ប៉ុន្តែ​ថ្នាំ​នេះ​ត្រូវ​បាន​គេ​ល្បី​យូរហើយ​ថា មាន​ផល​រំខាន​ធ្ងន់ធ្ងរ​រួម​ទាំង​ផ្លាស់​ប្តូរ​ចង្វាក់បេះដូង ក្នុង​កម្រិត​មួយ ដែល​អាច​គ្រោះថ្នាក់​ដល់​ស្លាប់​។

ក្នុង​ការ​សិក្សា​ស្រាវជ្រាវ អ្នកជំងឺ​មួយ​ភាគ​បួន​នៃ​អ្នកជំងឺ​ទាំងអស់​ដែល​ប្រើប្រាស់​ថ្នាំ​នេះ ៦០០​មី​លី​ក្រាម​ចំនួន​ពីរ​ដង​ក្នុង​មួយ​ថ្ងៃ រយៈពេល​១០​ថ្ងៃ​កើត​មាន​បញ្ហា​ចង្វាក់បេះដូង​។ ដូច្នេះ​អ្នក​វិទ្យាសាស្ត្រ​ក៏​បាន​បញ្ឈប់​ការ​សិក្សា​នេះ​។ ចំណែកឯ​មួយ​ក្រុម​ទៀត​ត្រូវ​បាន​ឲ្យ​ប្រើ​ថ្នាំ​នេះ ៤៥០​មី​លី​ក្រាម ពីរ​ដង​ក្នុង​មួយ​ថ្ងៃ​ដំបូង បន្ទាប់​មក​ប្រើ​តែ​ម្តង​ក្នុង​មួយ​ថ្ងៃ​រយៈពេល​ច្រើន​ជាង​៤​ថ្ងៃ​។ ការ​សិក្សា​ស្រាវជ្រាវ​របស់​ប្រេ​ស៊ី​ល និយាយ​ថា គេ​មិន​ទាន់​អាច​សន្និដ្ឋាន​បាន​ថា តើ​ថ្នាំ​ទាំងនេះ​មាន​សុវត្ថិភាព ឬ​ក៏​មាន​ប្រសិទ្ធភាព​ប្រឆាំង​នឹង​កូ​វី​ដ​-១៩៕ ដោយ ៖ សហការី