ពី​មុន​អត់​ពាក់មួក​សុវត្ថិភាព​ផាក​១៥០០០​រៀល ឥឡូវ​ផាក​៦​ម៉ឺន​រៀល​ហើយ

រាជធានី​ភ្នំពេញ ៖ បញ្ហា​គ្រោះថ្នាក់​ចរាចរ​មានការ​ប្រឈម​ខ្ពស់ ដែល​នៅ​ក្នុង​១​ថ្ងៃ​មាន​អ្នក​ស្លាប់ គិត​ជា​មធ្យម​ប្រមាណ​៥​នាក់​។ នេះ​បើ​តាម​ការ​ឲ្យ​ដឹង​ពី​លោក​ឧត្តមសេនីយ៍ទោ ចេ​វ ហាក់ ស្នងការ​រង ទទួល​ផែន​ចរាចរណ៍​ផ្លូវគោក នៃ​ស្នងការ​នគរបាល​រាជធានី​ភ្នំពេញ នៅ​ក្នុង​សន្និសីទកាសែត​កាលពី​រសៀល​ថ្ងៃ​ទី​២៨ ខែមេសា ឆ្នាំ​២០២០​។ មុន​នឹង​ចាប់ផ្តើម អនុវត្ត​រឹត​បន្តឹង​ច្បាប់​ចរាចរ​ផ្លូវគោក​ថ្មី ដែល​នឹង​ចាប់ផ្តើម​នៅ​ថ្ងៃ​ទី​១ ខែឧសភា ឆ្នាំ ២០២០​ខាង​មុខ​។ លោក​ឧត្តមសេនីយ៍ទោ ចេ​វ ហាក់ បាន​ឲ្យ​ដឹង​ថា នៅ​ក្នុង​រយៈពេល​(​ត្រីមាស​ទី​១) ៣​ខែ ដើមឆ្នាំ​២០២០​នេះ នៅ​ទូ​ទាំង​ប្រទេស​មាន​អ្នក​ស្លាប់ ដោយ​គ្រោះថ្នាក់​ចរាចរ​ចំនួន​៤៩៣​នាក់​។

Loading...

នេះ​ជា​បញ្ហា​មួយ​ប្រឈម​ខ្ពស់​ដោយសារ តែ​គ្រោះថ្នាក់​ចរាចរ​។ បើ​ប្រៀ​ធៀប​ជំងឺ​កាច​សាហាវ​កូ​វី​ដ​វិញ នៅ​ប្រទេស​កម្ពុជា មិន​ទាន់​មាន​អ្នក​ស្លាប់​នោះ​ទេ​។ ចំណែក​គ្រោះថ្នាក់ មាន​អ្នក​ស្លាប់​៤៩៣​នាក់​។ ដោយឡែក​នៅ​ក្នុង​រាជធានី​ភ្នំពេញ​មាន​អ្នក​ស្លាប់​ចំនួន​៨៦​នាក់​។ ដោយឡែក​រយៈពេល តែ​២៧​ថ្ងៃនេះ​នៅ​ក្នុង​រាជធានី​ភ្នំពេញ​គ្រោះថ្នាក់​ចរាចរ​៥៩​ករណី មាន​អ្នក​ស្លាប់​ចំនួន ១៩​នាក់​។ នេះ​ជា​តួលេខ​មួយ​ដែល​គួរ​ឲ្យ​មានការ​ព្រួយបារម្ភ​ណាស់​។

ហេតុ​ដូចនេះ​ហើយ ទើប ថ្នាក់ដឹកនាំ​គ្រប់​លំដាប់ថ្នាក់​បាន​តាក់តែង​ធ្វើ​វិសោធនកម្ម កែសម្រួល​អនុក្រឹត្យ ដើម្បី​រឹត​បន្តឹង​ច្បាប់​ចរាចរ​ផ្លូវគោក​នៅ​ទូ​ទាំង​ប្រ​ទស ដែល​នឹង​ចាប់​អនុវត្ត​អនុក្រឹត្យ​ថ្មី លេខ ៣៩​អន​ក្រ​.​បក​ចុះ​ថ្ងៃ​ទី​១៧ ខែមីនា ឆ្នាំ​២០២០ ស្តី​ពី​ការ​កែសម្រួល​អនុក្រឹត្យ​លេខ​៤៤ អន​ក្រ​.​បក ចុះ​ថ្ងៃ​ទី​២១ ខែមីនា ឆ្នាំ​២០១៧ នឹង​ចាប់ផ្តើម​ចាប់ពី​ថ្ងៃ​ទី​០១ ខែឧសភា ឆ្នាំ​២០២០ នេះ​តទៅ​។ ផ្តើម​ចេញ​នៃ​ការ​អនុវត្ត​នេះ​មិនមែន​មាន​ន័យ​ថា យើង​ទើបតែ​រឹត​បន្តឹង​ច្បាប់​នោះ ទេ ដោយសារ​តែ​មានការ​រឹត​បន្តឹង​ច្បាប់​នៅ​ទូ​ទាំង​២៥​រាជធានី​ខេត្ត​ទូ​ទាំង​ប្រទេស ទើប​យើង​ទប់ស្កាត់​បាន​នូវ​គ្រោះថ្នាក់​ច្រើន​ហើយ​។

លោក​ឧត្តមសេនីយ៍​បាន​ឲ្យ​ដឹង​ទៀត​ថា នៅ​ក្នុង​ឆ្នាំ​២០២០ សម្តេច​ក្រឡាហោម ស ខេ​ង មាន​ប្រសាសន៍​ថា ជា​ឆ្នាំ​ដែល យើង​ធ្វើការ​រឹត​បន្តឹង​ការ​អនុវត្ត​ច្បាប់​ចរាចរ​ដោយ​មូលហេតុ គ្រោះថ្នាក់​ចរាចរ ដែល​ធ្វើ​ឲ្យ​ប្រជាពលរដ្ឋ​យើង ដែល​ជា​អ្នក​ប្រើប្រាស់​ផ្លូវ បាន និង​កំពុង​មាន​គ្រោះថ្នាក់​ច្រើន​គិត​ជា​មធ្យម​មាន​៥​នាក់​ស្លាប់​ដោយ​គ្រោះថ្នាក់​ចរាចរ យើង​មិន​ចង់​ឃើញ​មាន​ឈាម​ដាប​នៅ​លើ​ដងផ្លូវ​ទៀត​ទេ​។ ទន្ទឹម​ការ​អនុវត្ត​ពង្រឹង​ច្បាប់​នេះ លុះត្រា​មានការ​ចូលរួម​ពី​ប្រជាពលរដ្ឋ​គោរព​ច្បាប់​។

លោក​ឧត្តមសេនីយ៍ទោ ចេ​វ ហាក់ បាន​បញ្ជាក់​ថា ការ​អនុវត្ត​អនុក្រឹត្យ​ថ្មី​នេះ​ពី​មុន​ផាកពិន័យ​អ្នក​បើក​ម៉ូតូ​ចំនួន​តែ ១៥ ០០០​រៀល តែ​អនុក្រឹត្យ​ថ្មី ផាក​រហូត​ដល់​៦​ម៉ឺន​រៀល នេះ​មិន​ថ្លៃ​នោះ​ទេ បើ​បងប្អូន​ជួប​គ្រោះថ្នាក់​ប៉ះ​ក្បាល ៦​ម៉ឺន​នេះ​មិន​អាច​ព្យាបាល​ជា​ដែរ​។ ការ​ផាកពិន័យ មិន​តម្រូវ​ឲ្យ​ផាក​នៅ​កន្លែង​នោះ​ទេ គឺ​តម្រូវ សមត្ថកិច្ច​នាំ​យក​ទៅ​អធិការដ្ឋាន​ទុក​រយៈពេល​៣​ថ្ងៃ​រង់ចាំ​ការ​ផាកពិន័យ ពេល​ទៅ​យក​ម៉ូតូ ត្រូវ​យក​មួក​ទៅ​ជាមួយ​បើ​អត់​មាន​មួក​មិន​ឲ្យ​ម៉ូតូ​នោះ​ទេ​។ ការ​អនុវត្ត​ពង្រឹង​ការ​អនុវត្ត​ច្បាប់ ធ្វើ​ទាំងថ្ងៃទាំងយប់​៕ ដោយ ៖ ម៉េ​ង ធា