អាកាសធាតុ​ក្តៅ​ធ្វើ​ឲ្យ​មេរោគ​កូ​វី​ដ​-១៩ ពិបាក​វាយលុក​កម្ពុជា?

ស្រាវជ្រាវ ៖ ការ​សិក្សា​ស្រាវជ្រាវ​មួយ​ចំនួន​បង្ហាញ​ថា មេរោគ​កូ​រ៉ូ​ណា​វីរុស​ថ្មី ឬ​មេរោគ​កូ​វី​ដ​-១៩ ចាញ់​អាកាសធាតុ​ក្តៅ​។ ប៉ុន្តែ​អ្នកជំនាញ​បាន​ព្រមាន​ថា នេះ​មិន​មាន​ន័យ​ថា​ប្រទេស ដែល​មាន​អាកាសធាតុ​ក្តៅ​មាន​សុវត្ថិភាព​ពី​ការ​រាតត្បាត​នៃ​មេរោគ​កូ​វី​ដ​-១៩​ឡើយ​។ លោក អេ​រិ​ក យ៉ាប់ សាស្ត្រាចារ្យ​នៅ​សាកលវិទ្យាល័យ​វេជ្ជសាស្ត្រ នៅ​សាំង​ហ្គា​ពួរ​ត្រូវ បាន​ដកស្រង់​សម្តី​ដោយសារ​ព័ត៌មាន Nikkei Asian Review របស់​ជប៉ុន ដែល​និយាយ​ថា ជា​ទ្រឹស្តី កម្ដៅ​អាច​កាត់​បន្ថយ​ការ​ចម្លង​មេរោគ តាម​រយៈ​ការ​ប៉ះ​នឹង​វត្ថុ​ដែល​មាន​ផ្ទុកមេរោគ​។

Loading...

ប៉ុន្តែ​ការ​ចម្លង​មេរោគ​កូ​វី​ដ​-១៩ ភាគច្រើន​គឺ​ឆ្លង​ពី​មនុស្ស​ម្នាក់ ទៅ​មនុស្ស​ម្នាក់​ទៀត តាម​រយៈ តំណក់ទឹក​ដែល​អ្នកជំងឺ​ក្អក​ចេញ​មក​។ ដូច្នេះ​ហើយ​បានជា​ក្រសួងសុខាភិបាល​កម្ពុជា បាន​ប្រកាស​ហើយ​ប្រកាស​ទៀត​ថា ស្ថានភាព​នៅ​មាន​ភាព​ផុយ​ស្រួយ​នៅឡើយ ហើយ​តម្រូវ​ឲ្យ​មានការ​ប្រយ័ត្ន​ខ្ពស់​។ រដ្ឋមន្ត្រី​ក្រ​សូ​ង​សុខាភិបាល លោក ម៉​ម ប៊ុ​ន​ហេង ថែម​ទាំង​និយាយ​ថា ប្រជាជន​មិន​ត្រូវ​ទាល់តែ​ឃើញ​មឈូស​ទើប​ស្រក់​ទឹកភ្នែក​ទេ​។

នៅ​មិន​ឆ្ងាយ​ប៉ុន្មាន​កម្ពុជា​ដូច​ជា​នៅ​សិង្ហ​បូ​រី និង​ឥណ្ឌូ​នេ​ស៊ី​ជាដើម ជា​ឧទាហរណ៍​ដែល​បញ្ជាក់​យ៉ាង​ច្បាស់​ថា អាកាសធាតុ​ក្តៅ​មិនមែន​ជា​កត្តា​ដែល​អាច​ធ្វើ​ឲ្យ ប្រទេស​មួយ​រួច​ផុត​ពី​ការ​រាលដាល​នៃ​មេរោគ​កូ​វី​ដ​-១៩​នោះ​ឡើយ​។ នៅ​ប្រ​ទេ​សិង្ហ​បុរី​មាន អ្នកជំងឺ​កូ​វី​ដ​-១៩ រហូត​ដល់​ជាង​១៦០០០​នាក់ ខណៈ​ដែល​ឥណ្ឌូ​នេ​ស៊ី​មាន​ជាង មួយ​ម៉ឺន​នាក់​។ ដូច្នេះ​វា​នឹង​ក្លាយជា​ការ​យល់​ខុស បើសិនជា​គិត​ថា​កម្ពុជា​មិន​ងាយ​ឆ្លង​មេរោគ​កូ​វី​ដ​-១៩ ដោយសារ​តែ​អាកាសធាតុ​ក្តៅ​។

ជម្រើស​ដែល​ល្អ​គឺ​ប្រជាជន​ត្រូវ​រស់នៅ​ប្រកបដោយ​អនាម័យ លាង​សម្អាត​ដៃ​ឲ្យ​បាន​ញឹកញាប់ មិន​ធ្វើ​ដំណើរ​បើ​មិន​ចាំបាច់ មិន​ធ្វើការ​ជួបជុំ​មនុស្ស​ច្រើន និង រក្សា​គម្លាត​ប្រហែល​ពីរ​ម៉ែត្រ ជា​វិធានការ​អាច​ជួយ​ទប់ស្កាត់​ការ​ឆ្លង និង​ចម្លង​មេរោគ​កូ​វី​ដ​-១៩៕ ដោយ ៖ សហការី