ជ្រូក​រស់​ប្រមាណ​៦​ពាន់​ក្បាល នាំ​ចូល​កម្ពុជា​ក្នុង​រដូវ​កាល​កូ​វី​ដ​-១៩

រាជធានី​ភ្នំពេញ ៖ ស្ថិត​ក្នុង​កាលៈទេសៈ​នៃ​ការ​រីក​រាលដាល​នៃ​ជំងឺ​កូ​វី​ដ​-១៩ នៅ​លើ​ពិភពលោក ក៏​ដូច​ជា​ករណី​វិជ្ជមាន​វីរុស​ឆ្លង​មួយ​នេះ​នៅ​កម្ពុជា ការ​នាំ​ចូល​ជ្រូក​រស់​មក​ពី​ប្រទេស​ជិតខាង មក​ផ្គត់ផ្គង់​ក្នុងស្រុក​ត្រូវ​បាន​កាត់​បន្ថយ​ប្រមាណ​៧០% នាំ​ឲ្យ​មានការ​ខ្វះខាត​ជ្រូក ក្នុង​ទីផ្សារ កម្ពុជា​។ ទោះបីជា​យ៉ាងណា​ក៏​ដោយ​ថ្មី​ៗ​នេះ កម្ពុជា​បាន​អនុញ្ញាត​ឲ្យ​មានការ​នាំ​ចូល ៦០០០​ក្បាល ក្នុង​មួយ​ថ្ងៃ​សម្រាប់​បំពេញតម្រូវការ ខណៈ​បច្ចុប្បន្ន​កម្ពុជា​មាន​កសិដ្ឋាន ចិញ្ចឹម​ជ្រូក​ជាង​៥០០​កន្លែង និង​មាន​លទ្ធភាព​ផ្គត់ផ្គង់​សាច់​ជ្រូក​ក្នុងស្រុក​បាន​ជាង​៨០%​។

Loading...

លោក តាន់ ប៉ាន់​ណា​រ៉ា ប្រតិភូ​រាជរដ្ឋាភិបាល​កម្ពុជា​ទទួល​បន្ទុក​ជា​អគ្គនាយក នៃ​អគ្គនាយកដ្ឋាន​សុខភាព​សត្វ និង​ផលិតកម្ម​សត្វ នៃ​ក្រសួងកសិកម្ម​រុក្ខា​ប្រមាញ់ និង​នេសាទ មាន​ប្រសាសន៍​ឲ្យ​ដឹង​នៅ​ថ្ងៃនេះ​ថា មក​ដល់​រាល់​ថ្ងៃនេះ ការ​នាំ​ចូល​ជ្រូក​រស់ មក​ពី​ប្រទេស​ជិតខាង​យើង​បាន​កាត់​បន្ថយ​នាំ​ចូល​ប្រមាណ​៧០% ហើយ​អនុញ្ញាត​ឲ្យ​មាន​នាំ​ចូល​ប្រមាណ​៦​ពាន់​ក្បាល​ក្នុង​មួយ​ថ្ងៃ ហើយ​ប្រៀបធៀប​មុន​ពេល​កម្ពុជា​មិន​ទាន់​មាន​ជំងឺ​កូ​វី​ដ​-១៩ គឺ​មាន​ចំនួន​ច្រើន តែ​ជាក់ស្តែង​មាន​តែ​២​ពាន់ ឬ​៣​ពាន់​ក្បាល​។

បើ​តាម​អគ្គនាយកដ្ឋាន​សុខភាព​សត្វ និង​ផលិតកម្ម​សត្វ «​នា​ពេល​កន្លង​មក​ការ​នាំ​ចូល​ជ្រូក​រស់​កម្ពុជា​អនុញ្ញាត​ឲ្យ​ចូល​ជ្រូក​រស់ តែ​មក​ពី​ប្រទេស​ថៃ ហើយ​បើ​តាម​ស្ថិតិ​បច្ចុប្បន្ន​កម្ពុជា​មាន​កសិដ្ឋាន​ចិញ្ចឹម​ជ្រូក ប្រមាណ​៥៣០​កន្លែង និង​មាន​សត្វ​ជ្រូក​ប្រមាណ​៣​លាន​ក្បាល អាច​ផ្គត់ផ្គង់​តម្រូវការ ក្នុងស្រុក​បាន​ប្រមាណ​៨២%»​។ ពាក់ព័ន្ធ​នឹង​ការ​នាំ​ចូល​ជ្រូក​រស់​ពី​ប្រទេស​ជិតខាង ដើម្បី​ផ្គត់ផ្គង់​ក្នុងស្រុក​ថ្មី​ៗ​មានការ​លើក​ឡើង ឬ​ផ្សព្វផ្សាយ​ថា ក្រសួងកសិកម្ម​រុក្ខា​ប្រមាញ់ និង​នេសាទ បាន​ផ្តល់​សិទ្ធិ​ផ្តាច់មុខ​ដល់​ក្រុមហ៊ុន​មួយ​ធ្វើការ​នាំ​ចូល​ជ្រូក​រស់​ពី​ប្រទេស​ថៃ តែ​ការ​លើក​ឡើង​នេះ​ត្រូវ​បាន​ក្រសួង​ឆ្លើយ​តប​ថា ជា​ការ​ផ្សព្វផ្សាយ​ព័ត៌មាន​ខុស​ពី​ការ​ពិត​។

បើ​យោង​តាម​ក្រសួងកសិកម្ម រុក្ខា​ប្រមាញ់ និង​នេសាទ​ផ្សព្វផ្សាយ​នៅ​តាម​បណ្តាញ ទំនាក់ទំនង​សង្គម​របស់​ខ្លួន​ថ្មី​ៗ​នេះ​ថា ក្រសួងកសិកម្ម រុក្ខា​ប្រមាញ់ និង​នេសាទ បាន​ពិនិត្យ​ឃើញ​ថា មាន​សារព័ត៌មាន​មួយ​ចំនួន​បាន​លើក​ឡើង​ថា បច្ចុប្បន្ន​នេះ​សមាគម​ផ្គត់ផ្គង់​ជ្រូក​កម្ពុជា​បាន​ធ្វើការ​រាយការណ៍ និង​ផ្សព្វផ្សាយ​ព័ត៌មាន​បំផ្លើស​ខុស​ពី​ការ​ពិត ដោយ​បាន​ចោទប្រកាន់​មក​លើ​ក្រសួង​ថា បាន​ផ្តល់​សិទ្ធិ​ផ្តាច់មុខ​ដល់​ក្រុមហ៊ុន​មួយ​ធ្វើការ​នាំ​ចូល​ជ្រូក​រស់​ពី​ប្រទេស​ថៃ មក​ផ្គត់ផ្គង់​នៅ​ទីផ្សារ​ព្រះរាជាណាចក្រ​កម្ពុជា​៕ ដោយ​៖ ឡុ​ង សា​រ៉េ​ត