អាជ្ញាធរ​ក្រុង​ស្វាយ​រៀង​ចុះ​ដោះស្រាយ រឿង​ចាក់​ដី​លុប​អូរ​សាធារណៈ

ខេត្តស្វាយរៀង ៖ ប្រជាពលរដ្ឋ​២​ភូមិ​ផ្ទុះ​ការ​តវា​សុំ​ឲ្យ​លោក​អភិបាលក្រុង​ដោះស្រាយ​ករណី​ឈ្មោះ សំ សា​វឿ​ន ហៅ អ៊ុ​ក ណ​ន ភេទ​ប្រុស អាយុ​៥១​ឆ្នាំ មុខរបរ​ប្រធាន​ក្រុមហ៊ុន យក​គ្រឿងចក្រ​ជីកដី​កម្មសិទ្ធិ​របស់​ប្រជាពលរដ្ឋ យក​អាច​ម៌​ដី​ទៅ​លុប​អូរ​សាធារណៈ​បណ្តោយ​ជាង​២០០​ម៉ែត្រ ទទឹង​១២​ម៉ែត្រ និង​ចាក់​លុប​ចំណី​ព្រែក​ទន្លេ​វ៉ៃ​គោ ទទឹង​ប្រមាណ​២០​ម៉ែត្រ បណ្តោយ​១០០​ម៉ែត្រ ហើយ​បិទផ្លូវ​ទឹក​ធ្វើ​ឲ្យ​ប៉ះពាល់ ដល់​ប្រជាពលរដ្ឋ​ចំនួន​២​ភូមិ​គឺ ភូមិ​បាក់​រនាស់ និង​ភូមិ​ថ្មី សង្កាត់​សង្ឃ័រ ក្រុង​ស្វាយ​រៀង​។

Loading...

ទាក់ទិន​ករណី​នេះ នៅ​ថ្ងៃ​ទី​៧ ឧសភា ២០២០​នេះ (​មួយ​ថ្ងៃ​ពេញ​) លោក ណុ​ប ចំរើន អភិបាល​នៃ​គណៈ​អភិបាលក្រុង​ស្វាយ​រៀង បាន​ដឹកនាំ​លោក​អភិបាលរង​ក្រុង​ក្រុមប្រឹក្សា​សង្កាត់​សង្ឃ័រ មន្ត្រី​សុរិយោដី​ក្រុង មន្ត្រី​មន្ទីរ​ធនធានទឹក និង​ឧតុនិយម​ខេត្ត ពិនិត្យ​ដោះស្រាយ​។ លទ្ធផល​លោក ណុ​ប ចំរើន បាន​មាន​ប្រសាសន៍​ថា ជំហាន​ដំបូង​គឺ អនុវត្ត​តាម​កិច្ចព្រមព្រៀង​នៅ​ថ្ងៃ​ទី​៥ ឧសភា ២០២០ គឺ​ឲ្យ​ឈ្មោះ សំ សា​វឿ​ន ហៅ អ៊ុ​ក ណ​ន យក​គ្រឿងចក្រ កាយ​លុប​ពង្រាបដី​ឲ្យ​ប្រជាពលរដ្ឋ​រង​គ្រោះ​២​គ្រួសារ​ឲ្យ​បាន​រាបស្មើ​ដូច​ដើម​វិញ​។

ទី​២-​ត្រូវ​កាយ​យក​អាច​ម៌​ដី ចេញពី​អូរ​សាធារណៈ​ដែល​ឈ្មោះ សំ សា​វឿ​ន បាន​លុប (​ជីក​យក​អាច​ម៌​ដី​ចេញ​ទំហំ​ទទឹង​១២​ម៉ែត្រ បើកផ្លូវ​ទឹក ជូន​ប្រជាពលរដ្ឋ​វិញ​។ ចំពោះ​ការ​លុប​អូរ និង​ចំណី​ព្រែក​ទន្លេ​វ៉ៃ​គោ ដែល​លើក​ជា​ផ្លូវ និង​សង់​លំនៅ​ឋាន​គឺ ទុក​ដោះស្រាយ​ផ្នែក​ច្បាប់​ផ្សេង ហើយ​លោក​នឹង​ចេញ​លិខិត​ផ្អាក​ការ​សាងសង់​មួយ​រយៈ​សិន នៅ​ថ្ងៃ​ទី​៨ ឧសភា ២០២០ រង់ចាំ​ការ​ដោះស្រាយ​ដោយ​បង្កើត​ក្រុមការងារ​សហការ​ជាមួយ​មន្ទីរ ធនធានទឹក និង​ឧតុនិយម​ខេត្ត មន្ត្រី​សុរិយោដី​ចុះ​វាស់វែង​រក​ទំហំ​ប៉ះពាល់​តាម​ផែនទី​ភូមិសាស្ត្រ​(​ទំហំ​អូរ និង​ចំណី​ព្រែក​) ចុះ​ពិនិត្យ​នៅ​ថ្ងៃ​ច័ន្ទ ទី​១១ ឧសភា ២០២០​ខាង​មុខ​នេះ​។

លោក គឹ​ម សា​វុ​ធ ប្រធាន​មន្ទីរ​ធនធានទឹក និង​ឧតុនិយម​ខេត្តស្វាយរៀង បាន​មាន​ប្រសាសន៍​ថា ការ​លុប​អូរ​សាធារណៈ និង​ការ​ចាក់​ដី​រំលោភ​យក​ចំណី​ព្រែក ទៅ​ធ្វើ​ជា​កម្មសិទ្ធិ គឺ​ខុសច្បាប់​ធ្ងន់ធ្ងរ​ណាស់ ទោះបី​យ៉ាងណា​លោក​មាន​ប្រសាសន៍​ថា រង់ចាំ​បង្កើត​ក្រុមការងារ​ចុះ​ពិនិត្យ​ជាក់ស្តែង ឬ​សុំ​ឲ្យ​ចៅសង្កាត់​ដាក់​ពាក្យ​មក​មន្ទីរ​ជា​លាយលក្ខណ៍អក្សរ​ទើប​លោក​ឆ្លើយ​តប​ជា​លាយលក្ខណ៍អក្សរ​វិញ​បាន ឬ​សូម​ឲ្យ​លោក​អភិបាលក្រុង​ធ្វើ​របាយការណ៍​ជា​លាយលក្ខណ៍អក្សរ​ដើម្បី​ងាយស្រួល​ចុះ​ពិនិត្យ​ដោះស្រាយ​។

ចំណែក​ប្រជាពលរដ្ឋ​និយាយ​ថា កំណត់ហេតុ​ដែល​មន្ត្រី​សុរិយោដី​ក្រុង​ចុះ​វាស់វែង បោះបង្គោល​ដែល​ប្រជាពលរដ្ឋ យល់ព្រម គឺ​ជីក​កាយ​យក​អាច​ម៌​ដី​ចេញ​បើកផ្លូវ​ទឹក​តាម​អូរ​ចាស់​ដែល​មាន​ទំហំ​ទទឹង​១២​ម៉ែត្រ ក៏​ប៉ុន្តែ​ពេល​យក​គ្រឿងចក្រ ទៅ​ជីក​ធ្វើ​ផ្លូវទឹក​ជាក់ស្តែង​គឺ​ជីក​ទៅ​លើ​ភ្លឺ​ភ្លោះ និង​ជីក​លើ​ដី​កម្មសិទ្ធិ​អ្នក​ផ្សេង ១​គ្រួសារ​ទៀត ចេញ​មក​មក​ជំទាស់​តវ៉ា ដូច្នេះ​ប្រជាពលរដ្ឋ​សុំ​ឲ្យ​គោរព​តាម​កំណត់ហេតុ​របស់​មន្ត្រី​សុរិយោដី បាន​វាស់វែង និង​បោះបង្គោល​ទើប​ប្រជាពលរដ្ឋ​យល់ព្រម សូម​ឲ្យ​លោក​អភិបាលខេត្ត​មេត្តា​ចុះ​ពិនិត្យ និង​អន្តរាគមន៍​ព​ន្លឿ​ន​ការ​ដោះស្រាយ​ជូន​ប្រជាពលរដ្ឋ​ឲ្យ​បាន​ឆាប់​ផង​៕ ដោយ ៖ វ៉ា​ន់ ប៊ុ​ន​ធឿ​ន