ខេត្តកំពង់ស្ពឺ ៖ លោកគ្រូពេទ្យនៅស្រុកឧដ្ដុង្គមួយរូបដែលមកបំពេញការងារស្តារនៅមន្ទីរពេទ្យខេត្ត ផ្នែកវះកាត់ ត្រូវរថយន្តមួយគ្រឿងបុកបណ្ដាលឲ្យរងរបួសជាទម្ងន់ ក្រោយបង្កម្ចាស់រថយន្តបានបើក គេចទៅទិសខាងកើតបាត់ទៅ បន្សល់តែជនរងគ្រោះនៅនឹងកន្លែងកើតហេតុ ត្រូវបានមិត្តភក្តិហៅរថយន្ត ដឹកយកមកមន្ទីរពេទ្យខេត្ត ដើម្បីធ្វើការសង្គ្រោះតែដោយអាការៈធ្ងន់ធ្ងរពេក ខាងមន្ទីរពេទ្យខេត្ត ក៏សម្រេចបញ្ជូនបន្តទៅកាន់ពេទ្យកាល់ម៉ែត្ររាជធានីភ្នំពេញ។ ហេតុការណ៍គ្រោះថ្នាក់ចរាចរណ៍នេះ កើតឡើងកាលពីវេលាម៉ោង ៨ និង៣០នាទីយប់ ថ្ងៃទី១២ ខែឧសភា ឆ្នាំ២០២០ នៅចំណុចស្តុប សាធារណៈការ ស្ថិតនៅក្នុងសង្កាត់ច្បារមន ក្រុងច្បារមន ខេត្តកំពង់ស្ពឺ។
ជនរងគ្រោះត្រូវបានស្គាល់ ឈ្មោះ ឈឹម រិទ្ធី ភេទប្រុស អាយុ៣៤ឆ្នាំ មុខរបរជាគ្រូពេទ្យ ប្រចាំស្រុកឧដ្ដុង្គ មានប្រពន្ធទើបតែឆ្លងទន្លេ កូនខ្ចីបាន៨ ខែ តែថ្នាក់លើបានចាត់តាំងឲ្យមកសិក្សាជំនាញបន្ថែម ផ្នែកវះកាត់នៅមន្ទីរពេទ្យបង្អែក ខេត្តកំពង់ស្ពឺ។ បើតាមមិត្តភក្កិជនរងគ្រោះឈ្មោះ សីហា ដែលរួមដំណើរជាមួយបានបញ្ជាក់ប្រាប់ថា មុនពេលកើតហេតុរូបគាត់ និងជនរងគ្រោះជិះម៉ូតូសេ១២៥ឌុបគ្នា បានចេញពីកន្លែងធ្វើការ (ពេទ្យខេត្ត) នាំគ្នាទៅហូបអាហារពេលល្ងាចនៅចំណុចផ្សាររាត្រីខេត្តកំពង់ស្ពឺ លុះពេលហូបរួចហើយ គាត់ក៏បាន ដឹកជនរងគ្រោះក្នុងគោលបំណងត្រឡប់ទៅកន្លែងសម្រាកនៅមន្ទីពេទ្យវិញតែជាអកុសលពេលធ្វើដំណើរមកដល់ស្តុបសាធារណៈការ ស្រាប់តែមានរថយន្តមួយគ្រឿង ម៉ាកកាមរីបាឡែន មិនចាំស្លាកលេខ ធ្វើដំណើរមកពីទិសខាងលិចទិសដៅទិសខាងកើតបានមកបុកម៉ូតូរបស់គាត់ដែលកំពុងដឹកជនរងគ្រោះបណ្ដាលឲ្យដួលហើយពេលនោះជនរងគ្រោះបានបោកទៅថ្នល់រងរបួសជាទម្ងន់។
ក្រោយពេលបង្កតៃកុង រថយន្តមិនបានឈប់ទទួលខុសត្រូវចំពោះអំពើល្មើសរបស់ខ្លួននោះទេ បានបើករថយន្តបន្តទៅទិស ខាងកើតបាត់ទៅ។ ស្របពេលដែលឃើញជនរងគ្រោះមានអាការៈធ្ងន់ធ្ងរ រូបគាត់ក៏បានទាក់ទង ទៅខាងមន្ទីរពេទ្យដើម្បីមកដឹកជនរងគ្រោះយកទៅធ្វើការសង្គ្រោះ។ ដោយមើលឃើញពីអាការៈធ្ងន់ធ្ងរ ក្រុមគ្រូពេទ្យនៃមន្ទីរពេទ្យក៏សម្រេចបញ្ជូនជនរងគ្រោះទៅសង្គ្រោះបន្តនៅមន្ទីរពេទ្យកាល់ម៉ែតជាបន្តទៀតទាំងយប់។ បើតាមមិត្តភក្កិរបស់ជនរងគ្រោះបានរៀបរាប់ថា ជនរងគ្រោះគឺជាមនុស្សដែលមានអត្តចរិត ស្លូតបូត សុភាពរាបសា គួរជាទីស្រឡាញ់រាប់អានរបស់មិត្តភក្តិរួមអាជីពគ្រប់គ្នា ហើយអ្វីដែលធ្វើឱ្យ មិត្តភក្តិ កាន់តែអាណិតទៀតនោះគឺជនរងគ្រោះមានប្រពន្ធទើបតែឆ្លងទន្លេបានរយៈពេល ៨ទៅ ៩ខែ បើនិយាយពីលុយកាក់វិញថ្វីត្បិតតែគាត់ជាគ្រូពេទ្យតែក៏មិនសូវសម្បូរប៉ុន្មាននោះដែរ។
ក្នុងនាមជាមិត្តភក្កិ និងមិត្តរួមអាជីពសូមសំណូមពរដល់ថ្នាក់ដឹកនាំសូមមេត្តាជួយអន្តរាគមន៍ ដើម្បីឲ្យមានការយកចិត្តទុកដាក់ និងឆាប់ជាសះស្បើយបានត្រឡប់ចូលមកបម្រើការងារវិញ។
បើតាមប្រភពពីមន្ត្រីនគរបាលមួយរូបបានឲ្យដឹងថា ក្រោយបង្ករថយន្តរបស់ជនសង្ស័យដែលគេស្គាល់ថា ម៉ាកកាមរីបាឡែន ពាក់ស្លាកលេខ កំពង់ស្ពឺ 2A-2495 បានបើកទៅក្រឡាប់នៅជិតមន្ទីរ ធនធានទឹក ខេត្តកំពង់ស្ពឺ តែចំណែកអ្នកបើកបរបានរត់គេចខ្លួនបាត់រហូតមកដល់ពេលនេះ សមត្ថកិច្ចបានស្ទូចយក រថយន្តមករក្សាទុកនៅអធិការដ្ឋាននគរបាលស្រុកសំរោងទង ដើម្បីធ្វើការស្រាវជ្រាវរកម្ចាស់រថយន្ត ឲ្យចូលខ្លួនមកដោះស្រាយជាមួយភាគីជនរងគ្រោះតាមផ្លូវច្បាប់។
ដោយឡែកបើតាមប្រភពក្រៅផ្លូវការ មួយទៀតបានប្រាប់ថា តៃកុងរថយន្តបង្កគឺជាសមត្ថកិច្ចនគរបាលមួយរូប តែគេមិនដឹងថាបម្រើការ នៅអង្គភាពណានោះទេ ទោះជាយ៉ាងណា នេះគ្រាន់តែជាព័ត៌មានដែលមិនទាន់យកជាការ បានតែប៉ុណ្ណោះ រឿងរ៉ាវពិតម្ចាស់រថយន្តជានរណានោះត្រូវតែសមត្ថកិច្ចធ្វើការស្រាវជ្រាវ រកឲ្យឃើញសិនទើបដឹងការពិត។ ទោះជាយ៉ាងណាមិត្តភក្កិដែលជាគ្រូពេទ្យជាច្រើនរបស់ជនរងគ្រោះ បានសំណូមពរទៅភាគីបង្កសូមមេត្តាចូលខ្លួនមកដោះស្រាយជាមួយក្រុមគ្រួសាររបស់ជនរងគ្រោះដោយសន្តិវិធី ព្រោះឮថាជាអ្នកធ្វើការនៅខេត្តជាមួយគ្នាគ្រាន់តែអង្គភាពខុសគ្នាប៉ុណ្ណោះ៕ ដោយ ៖ វង្ស សន
