អ្នកជំងឺ​ជា​អស់រលីង​មិន​មាន​ន័យ​ថា កូ​វី​ដ​អស់ពី​កម្ពុជា​រហូត​ទេ

បទ​អត្ថាធិប្បាយ ៖ ដំបូង​យើង​ត្រូវ​ទះដៃ​អបអរសាទរ​ដែល​កម្ពុជា​បាន​ព្យាបាល​អ្នកជំងឺ​កូ​វី​ដ​-១៩ អស់រលីង ទាំង​១២២​នាក់​។ មាន​ន័យ​ថា គ្មាន​នរណា​ម្នាក់​ស្ថិត​នៅ​ក្នុង​មន្ទីរពេទ្យ ដើម្បី​ព្យាបាល ជំងឺ​កូ​វី​ដ​-១៩​ទេ​។ ប្រជាជន​កម្ពុជា​ទាំងអស់​បាន​ត្រេកអរ​ចំពោះ​ជោគជ័យ​នេះ ដែល​កើត​ចេញពី កិច្ច​ប្រឹងប្រែង​របស់​រាជរដ្ឋាភិបាល ពី​កិច្ច​ប្រឹងប្រែង​របស់​គ្រូពេទ្យ និង​អ្នក​ពាក់ព័ន្ធ ព្រមទាំង​ការ ចូលរួម​របស់​ប្រជាជន​កម្ពុជា​គ្រប់​រូប​។

Loading...

ប៉ុន្តែ​អ្វី​ដែល​ប្រជាជន​កម្ពុជា​ត្រូវ​ចង​ចាំ​នោះ​គឺ ពិតមែន តែ​អ្នកជំងឺ​កូ​វី​ដ​-១៩ ដែល​បាន​រក​ឃើញ​ទាំង​១២២​នាក់ បានជា​សះស្បើយ​មែន នេះ​មិនមែន មាន​ន័យ​ថា កម្ពុជា​លែង​ត្រូវ​បាន​គំរាមកំហែង​ដោយ​មេរោគ​កូ​វី​ដ​-១៩ នោះ​ឡើយ​។ ដំណឹង​ដែល​អាក្រក់​នោះ​គឺ មេរោគ​នេះ​បាន​កំពុង​តែ​រាលដាល​នៅ​អឺរ៉ុប និង​នៅ​អា​មេ​រិ​ក ហើយ​បង្ក​ការ​គំរាមកំហែង​កាន់តែ​ធ្ងន់ធ្ងរ​ចំពោះ​ពិភពលោក​។ ខណៈ​ដែល​ប្រទេស​អឺរ៉ុប មួយ​ចំនួន​រៀង​ធូរស្បើយ​នោះ ប្រទេស​រុ​ស្ស៊ី​បាន​មាន​កំណើន​អ្នក​ផ្ទុកមេរោគ​កូ​វី​ដ​-១៩ គួរ​ឲ្យ​ភ័យ​ខ្លាច​។

ពិភពលោក​ទាំងមូល​មាន​អ្នកជំងឺ​កូ​វី​ដ​-១៩ ចំនួន ជាង ៤,៧ លាន​នាក់ និង អ្នក​ស្លាប់​ដោយសារ​ជំងឺ​នេះ​មាន​ចំនួន​ជាង ៣១​ម៉ឺន​នាក់ គិត​ត្រឹម​ថ្ងៃអាទិត្យ​ទី​១៧ ខែឧសភា​។ ចំណែក​រុ​ស្ស៊ី​មាន​អ្នក​ផ្ទុកមេរោគ​កូ​វី​ដ​-១៩ ឡើង​ដល់​ជាង​២៧​ម៉ឺន​នាក់ ខណៈ​ដែល​អា​មេ​រិ​ក មាន​ស្លាប់​ជិត​៩​ម៉ឺន​នាក់ និង​មាន​អ្នកជំងឺ​ជាង​១,៥​លាន​នាក់​។ ស្ថានភាព​កូ​វី​ដ​-១៩ បង្ខំ​ឲ្យ​អង្គការ​សុខភាព​ពិភពលោក​ប្រកាស​ជំរុញ​ឲ្យ​រដ្ឋាភិបាល​ជុំវិញ​ពិភពលោក​រួម​គ្នា​ទប់ស្កាត់​មេរោគ​នេះ​។ នៅ​ចំពោះ​ស្ថានភាព​ដ៏​អាក្រក់​បែប​នេះ ប្រឆាំង​នឹង​មេរោគ​ដ៏​សាហាវ​នេះ​។ រដ្ឋាភិបាល​កម្ពុជា​បន្ត​ធ្វើការ​ទប់ស្កាត់​ការ​ចម្លង​ទាំង​ពី​ខាងក្រៅ និង​ខាងក្នុង​។ ការ​ទប់​ការ​ចម្លង ពី​ក្រៅប្រទេស​គឺជា​ខ្សែត្រៀម​ទី​មួយ​ដែល​កម្ពុជា​ត្រូវ​តែ​រឹត​រឹត​បន្តឹង​ឲ្យ​ខ្លាំង និង​ជាប់​ជា​និច្ច​។

ចំពោះ នៅ​ក្នុង​ប្រទេស​កម្ពុជា​វិញ ទាំង​រដ្ឋាភិបាល​ពិសេស​ក្រ​សូ​ង​សុខាភិបាល អ្នក​ពាក់ព័ន្ធ ក៏​ដូច​ជា​ប្រជាជន​កម្ពុជា គ្រប់​រូប​ត្រូវ​រួម​គ្នា​ជា​ធ្លុង​មួយ​ដើម្បី​ទប់ស្កាត់​មេរោគ​កូ​វីត​-១៩​នេះ ដើម្បី​បញ្ចៀស​ឲ្យ​បាន ស្ថានការណ៍​មួយ​ដែល​មានការ​រាលដាល​ឆ្លង​មេរោគ​កូ​វី​ដ​-១៩​នេះ ហួស​ពី​សមត្ថភាព​គ្រប់គ្រង​។ ក្នុង​ន័យ​នេះ ប្រជាជន​មិន​ត្រូវ​សប្បាយ​ភ្លេចខ្លួន ឡើយ ហើយ​ត្រូវ​តែ​មានការ​ប្រុង​ប្រយ័ត្ន​ជាប់​ជា​និច្ច​។ ខណៈ​ដែល​សកម្មភាព​សេដ្ឋកិច្ច និង​ការ​ធ្វើ​ដំណើរ ហាក់ដូចជា​ចាប់ផ្តើម​កើត​មាន​ដូច​ធម្មតា​នោះ វា​ទាមទារ​ឲ្យ​មានការ​បង្កើន​វិធានការ​បង្ការ គ្រប់យ៉ាង​។ ផ្សារ​លក់ទំនិញ ភោជនីយដ្ឋាន និង​អ្នក​លក់ដូរ ទាំងអស់​ត្រូវ​មាន​វិធានការ ចាំបាច់​គ្រប់យ៉ាង​ដើម្បី​ចូលរួម បញ្ចៀស​ការ​ចម្លង​មេរោគ​កូ​វី​ដ​-១៩​ដោយ​មិនដឹង​ខ្លួន​។

អ្នកលក់​ដូរ​ដែល​ប្រាស្រ័យ​ទាក់ទង​ជាមួយ​មនុស្ស​ច្រើន ចុងភៅ​ធ្វើ​ម្ហូបអាហារ អ្នកបម្រើ​ការ​តាម ភោជនីយដ្ឋាន ត្រូវ​ពាក់​ម៉ាស​ឲ្យ​បាន​គ្រប់ពេលវេលា​ដើម្បី​បញ្ចៀស​ការ​ចម្លង​មេរោគ​។ ទន្ទឹម​នោះ ការ​ធ្វើ​អនាម័យ​ឲ្យ​បាន​ល្អ​តាម​កន្លែង​ទាំង​អស់នេះ​ក៏​មាន​ភាព​ចាំបាច់​ផង​ដែរ​។ ការ​ទទួលភ្ញៀវ ការ​រៀបចំ​តុ​អាហារ ត្រូវ​គោរព​គោលការណ៍​រក្សា​គម្លាត​។ ដើម្បី​ទ​ប​ស្កាត់​ការ​ឆ្លង​មេរោគ​នេះ ប្រជាជន​កម្ពុជា​ម្នាក់​ៗ ត្រូវ​លាង​សម្អាត​ដ​ឲ្យ​ស្អាត មិន​នៅ​ជិត​អ្នកមាន​រោគ​សញ្ញា ឬ​មាន​ផ្ទុក មេរោគ កូ​វី​ដ​-១៩ ចៀសវាង​កន្លែង​ដែល​មានការ​ជួបជុំ​មនុស្ស​ច្រើន មិន​ធ្វើ​ដំណើរ​មិន​ចាំបាច់ ទៅ​កាន់​ប្រទេស ដែល​មានការ​រាលដាល​មេរោគ​នេះនោះ​ជាដើម​។ ការ​បង្ការ ផ្ទាល់ខ្លួន​គឺ​មាន​សារៈសំខាន់​ខ្លាំង​ណាស់​ដើម្បី​ទប់ស្កាត់​ការ​រា​ដាល​មេរោគ​នេះ​។ កន្លង​មក​ថ្មី​ៗ​នេះ នៅ​ពេល​ដែល​សភាពការណ៍​កូ​វី​ដ​-១៩​បាន​ល្អ​ប្រសើរ​នោះ ប្រជាជន​ជា​ច្រើន​បាន នាំ​គ្នា​ធ្វើ​ដំណើរ​កម្សាន្ត ហើយ​ជា​ការ​កត់សម្គាល់ អ្នក​ធ្វើ​ដំណើរ​ទាំងនោះ​ហាក់ដូចជា មិន​បាន​គិតដល់ ការ​រក្សា​គម្លាត​យ៉ាងតិច​ពីរ​ម៉ែត្រ​ឡើយ​។

ពេល​ខ្លះ គេ​បាន​ថែម​ទាំង​ប្រជ្រៀត គ្នា​ទិញ​ម្ហូបអាហារ ដូច​ជា​នៅ​ផ្សារ​ក្តាម​ខេត្ត​កែប​ជាដើម​។ ប្រការ​នេះ​ជា​ហានិភ័យ​មួយ​នៃ​ការ​ឆ្លង និង​ចម្លង​មេរោគ​កូ​វី​ដ​-១៩​។ គេ​ត្រូវ​តែ​ប្រយ័ត្ន​ហើយ មិន​ត្រូវ​ប្រមូលផ្តុំ​មនុស្ស​ច្រើន​ពេក​បែប​នេះ​ទេ​។ ប្រជាជន​កម្ពុជា​ម្នាក់​ៗ​ក៏​អាច​ជួយ​ទប់ស្កាត់​ការ​ចម្លង​ក្នុង​គ្រួសារ តាម​កន្លែងធ្វើការ និង​សហគមន៍ ផង​ដែរ​។ មនុស្ស​ម្នាក់​ៗ និង​គ្រួសារ​នីមួយ​ៗ​អាច​ចូលរួម​ទប់ស្កាត់​ការ​ចម្លង​មេរោគ បាន​តាម​រយៈ ការ​មាន​ផែនការ​ដ៏​ច្បាស់លាស់​មួយ​នៅ​ក្នុង​គ្រួសារ​សម្រាប់​បង្ការ​ការ​ឆ្លង និង​ការ​ចម្លង​មេរោគ កូ​វី​ដ​-១៩​។

បើ​ក្នុង​ករណី​ដ៏​អាក្រក់​មាន​នរណា​ម្នាក់​អាច​មាន​រោគ​សញ្ញា​មេរោគ ឬ​ក៏​មាន​ផ្ទុក មេរោគ កូ​វី​ដ​-១៩ គ្រួសារ​នីមួយ​ៗ​អាច​យល់​ដឹង​អំពី​ភាព​ចាំបាច់​នៃ​ការ​ដាក់​នៅ​ដោយឡែក អ្នក​ដែល​មាន រោគ​សញ្ញា​ក្តៅខ្លួន ក្អក និង​មាន​ប្រវត្តិ ទៅ​កាន់​កន្លែង​ដែល​មាន​ឆ្លង​រាលដាល​មេរោគ​នេះ ឬ​ក៏​ធ្លាប់​នៅ​ជិត​អ្នកមាន​មេរោគ​។ ជន​នោះ​ត្រូវ នៅ​ម្នាក់ឯង​ក្នុង​បន្ទប់​ដោយឡែក​មួយ ហើយ​ទទួលទាន​អាហារ​ដាច់​ពី​គេ​រយៈពេល​១៤​ថ្ងៃ ដើម្បី​តាមដាន​សុខភាព និង​រក​ជំនួយ​ពី គ្រូពេទ្យ​តាម​រយៈ​ទូរស័ព្ទ​ទៅ​កាន់​១១៥​។ គ្រួសារ​នីមួយ​ៗ​ត្រូវ​មានចំណេះ​ដឹង​គ្រប់គ្រាន់ អំពី​ការ​ចម្លង និង​ការ​ឆ្លង​មេរោគ​កូ​វី​ដ​-១៩ សារសំខាន់​នៃ​ការ​លាងដៃ​ដើម្បី​ទប់ស្កាត់​ការ​ឆ្លង​មេរោគ និង​សារសំខាន់​នៃ​ការ​ពាក់​ម៉ាស​មុខ ឬ​ប្រើ​ក្រមា ដើម្បី​ទប់ស្កាត់​ការ​ចម្លង​មេរោគ​ទៅ​អ្នក​នៅ​ជិត​ខ្លួន ព្រមទាំង​សារសំខាន់​នៃ​ការ​ធ្វើ​អនាម័យ ផ្ទះសម្បែង ដើម្បី​ឲ្យ​បាន​ស្អាត​។

សំខាន់​ដូច​គ្នា​នេះ ការ​មាន​ផែនការ​ច្បាស់លាស់​ដើម្បី​ទប់ស្កាត់​ការ​ឆ្លង និង​ការ​ចម្លង មេរោគ​នៅ​កន្លែង ធ្វើការ​ក៏​មាន​សារសំខាន់​ខ្លាំង​ដូច​គ្នា​ដែរ​។ បុគ្គលិក​ដែល​មាន​រោគ​ស​ញ្គា​ក្តៅខ្លួន ក្អក ឬ​ក៏​ពិបាក​ដកដង្ហើម គួរតែ​ត្រូវ​បាន​ឲ្យ​ច្បាប់​អនុញ្ញាត​ឈប់​សម្រាក​ដើម្បី​ចៀសវាង ការ​ចម្លង​ណាមួយ​ដល់​អ្នក​ផ្សេង​នៅ​កន្លែងធ្វើការ​។ មេរោគ​នេះ​សាហាវ​ណាស់​។ វា​មិន​ស្គាល់​អ្នកតូច អ្នកធំ អ្នកក្រ អ្នកមាន ស្បែក ស​ឬ ស្បែក​ខ្មៅ​ទេ​។ វា​នឹង​ចូល​ដល់​មនុស្ស​គ្រប់​គ្នា​ឲ្យ​តែ​វា​មានឱកាស​។ មាន​តែ​ការ​រួម​គ្នា​ជា​កម្លាំង​តែ​មួយ​ប៉ុណ្ណោះ ទើប​កម្ពុជា​អាច​ទប់ស្កាត់​ការ​រាលដាល​មេរោគ​កូ​វី​ដ​-១៩ ដែល​កំពុង​បង្ក​បង្ហាញ​យ៉ាងធ្ងន់ធ្ងរ ដល់​ប្រទេស​ជា​ច្រើន​នៅ​ក្នុង​ពិភពលោក​។ ជា​សរុប​នោះ យើង​មាន​ហេតុផល​គ្រប់គ្រាន់ និង​សប្បាយចិត្ត​ដែល​ឃើញ​អ្នក ជំងឺ​ទាំងអស់​បានជា​សះស្បើយ​។ ប៉ុន្តែ​យើង​មិន​ត្រូវ​ភ្លេចខ្លួន​ឡើយ ចំពោះ​ការ​ទប់ស្កាត់​ការ​ឆ្លង និង​ការ​ចម្លង​មេរោគ​ដ៏​សា​ហវា​នេះ​។ នៅ​ពេល​ដែល​យើង​ប្រុង​ប្រយ័ត្ន​ទាំងអស់​គ្នា មេរោគ​នេះ​នឹង​ពិបាក​ក្នុង​ការ​រាលដាល​នៅ​កម្ពុជា​។ កម្ពុជា​នឹង​រួច​ទុក្ខ​ភ័យ​ជា​រៀង​រហូត​ពី​ឃាតក​គ្មាន​រូប​នេះ​៕ ដោយ ៖ ប្រេ​វី​ន