បើករថយន្ត​ច្រឡំ​ផ្លូវ​បើក​ថយក្រោយ ប៉ះ​របង​វត្ត​សំពោង​ផល​អណ្ដែត

175

រាជធានី​ភ្នំពេញ ៖ រថយន្ត​ត្រេ​អ៊ី​យី​ឌុ​ប​ដឹក​ទំនិញ​មួយ​គ្រឿង ខណៈ​អ្នកបើកបរ​វ័យក្មេង​ម្នាក់​បើក​ច្រឡំ​ផ្លូវ ហើយ​បើក​ថយក្រោយ​វិញ ក៏​ជ្រុល​ទៅ​បុក​នឹង​ទ្វារ​ដែក​របង​វត្ត បណ្ដាល​ឲ្យ​រង​ការ​ខូចខាត តែ​មិន​បង្ក​ឲ្យ​គ្រោះថ្នាក់​ដល់​មនុស្ស​នោះ​ទេ​។ ហេតុការណ៍​នេះ​បាន​កើតឡើង​នៅ​វេលា​ម៉ោង​១០ និង​៣០​យប់ ថ្ងៃ​ទី​១៨ ខែឧសភា ឆ្នាំ​២០២០ ទុល​មុខ​ខ្លោងទ្វារវត្ត​សំពោង​ផល​អណ្ដែត ផ្លូវ​បេតុង ស្ថិត​នៅ​ភូមិ​ឫស្សី​ស្រស់ សង្កាត់​និរោធ ខណ្ឌ​ច្បារ​អំពៅ​។

Loading...

រថយន្ត​ពណ៌​ត្រេ​អ៊ី ពាក់​ស្លាក​លេខ ខេមរៈភូមិន្ទ 02 3.0669 របស់​កងពលតូច ង​៧០ បើកបរ​ដោយ​ឈ្មោះ រាំង សំ​និ​ត ភេទ​ប្រុស អាយុ ២៣​ឆ្នាំ មុខរបរ​បើកបរ​រថយន្ត មានស្រុក​កំណើត ភូមិ​រាម​បណ្តៅ ស្រុក​គី​រី​វង្ស ខេត្តតាកែវ​។ តាម​ប្រភព​ព័ត៌មាន​បាន​ឲ្យ​ដឹង​ថា មុន​ពេល​កើតហេតុ គេ​បានឃើញ​បុរស​វ័យក្មេង​២​នាក់ រួម​ទាំង​អ្នកបើកបរ​បាន​បើករថយន្ត​យី​ឌុ​ប​ដឹក​ទំនិញ ពណ៌​ត្រេ​អ៊ី​មួយ​គ្រឿង បាន​ធ្វើ​ដំណើរ​តាម​ផ្លូវ បេតុង ក្នុង​ទិស​ដៅ​ពី​ត្បូង​ទៅ​ជើង លុះ​មក​ដល់​ចំណុច​កើតហេតុ ដោយសារ​តែ​អ្នកបើកបរ​ច្រឡំ​ផ្លូវ ក៏​បាន​ថយ​រថយន្ត​បត់​ត្រឡប់​ក្រោយ​វិញ​។

ដោយសារ​តែ​អ្នកបើកបរ ខ្វះ​ការ​ប្រុង​ប្រយ័ត្ន បណ្ដាល​ឲ្យ​រថយន្ត​ជ្រុល​ទៅ​ប៉ះ​នឹង​ជ្រី​របង​វត្ត ហើយ​ថយ​ម្តងទៀត​ក៏​ជ្រុល​ទៅ​ប៉ះ​នឹង​របង​ទ្វារ​ដែក​វត្ត ដែល​ទើបនឹង​កសាង​ហើយ​បណ្ដាល​ឲ្យ​វៀច​ទ្រង់ទ្រាយ​ដើម​អស់​បន្តិចបន្តួច តែ​មិន​មាន​គ្រោះថ្នាក់ ដល់​មនុស្ស​នោះ​ទេ​។ ភ្លាម​ៗ​នោះ​ដែរ អ្នកបើកបរ​បាន​ទំនាក់ទំនង​ទៅ​ខាង​តំណាង​រថយន្ដ ឲ្យ​មក​ជួយ​ដោះស្រាយ​ជាមួយ​ចៅអធិការ​វត្ត​ផង​ដែរ​។ ក្រោយ​ពេល​កើតហេតុ ឃើញ​មាន​តំណាង ខាង​រថយន្ត​បាន​ចេញ​មុខ​មក​សម្របសម្រួល​ជាមួយនឹង​ចៅអធិការ​វត្ត ដោយ​ជួយ​ចេញថ្លៃ ការ​ជួសជុល​ចំនួន​១​ពាន់​ដុល្លារ ដល់​ចៅអធិការ​វត្ត​ដើម្បី​បញ្ចប់រឿង​៕ ដោយ ៖ យឹ​ម ឈឿ​ន