ភ្លៀង និង​ខ្យល់​ក​ន្ទ្រា​ក់​បោកបក់ បាន​រលើង​ដើម​ក្ងោក​មួយ​ដើម​សង្កត់​រថយន្ត​១​គ្រឿង

រាជធានី​ភ្នំពេញ ៖ ដើម​ក្ងោក​មួយ​ដើម​បាន​ដួល​រលំរលើង​ទាំង​ឫស​សង្កត់​រថយន្ត​១​គ្រឿង ខណៈ​ពេល​ដែល ភ្លៀង​បាន​បង្អុរ​ធ្លាក់ និង​ខ្យល់​ក​ន្ទ្រា​ក់ បោកបក់​យ៉ាង​ខ្លាំង​នៅ​កណ្តាល​រាជធានី​ភ្នំពេញ​។ ហេតុការណ៍ នេះ​បង្ក​ឲ្យ​មានការ​កកស្ទះ​ចរាចរណ៍ កាលពី​វេលា​ម៉ោង​៥ និង​៣០​នាទី​ល្ងាច ថ្ងៃ​ទី​១៩ ខែឧសភា ឆ្នាំ​២០២០ ចំណុច​ស្តុ​ប​សន្ធរ​ម៉ុ​ក ស្ថិត​នៅ​តាម​បណ្ដោយ មហាវិថី​ម្ពុ​ជា​ក្រោម ក្នុង​សង្កាត់​ផ្សារ​ដេប៉ូ​ទី​៣ ខណ្ឌទួលគោក រាជធានី​ភ្នំពេញ​។

Loading...

ទោះបីជា​យ៉ាងណា គ្រោះថ្នាក់​នេះ​ពុំ​បណ្តាល​ឲ្យ​មនុស្ស​រងរ​បូស​ឡើយ​។ រថយន្ត​ដែល ត្រូវ​ដើមឈើ​រលំ​សង្កត់ពីលើ​នេះ ម៉ាក​Mazda ស៊េរី​ទំនើប​មួយ​គ្រឿង ពណ៌​ស ពាក់​លេខ​ភ្នំពេញ 2AC-5776 បើកបរ ដោយ​បុរស​ម្នាក់​មិន​ស្គាល់​អត្តសញ្ញាណ​ឡើយ​។ តាម​ព័ត៌មាន​ឲ្យ​ដឹង​ថា នៅ​មុន​ពេល​កើតហេតុ​គេ​ឃើញ​រថយន្ត មួយ​គ្រឿង​ខាងលើ​ធ្វើ​ដំណើរ​នៅ​តាម​ដងផ្លូវ កម្ពុជា​ក្រោម​ក្នុង​ទិស​ដៅ​ពី​កើត​ទៅ​លិច ខណៈ​ពេល​ដែល​ភ្លៀង​កំពុង​តែ បង្អុរ​ធ្លាក់ និង​លាយឡំ​ជាមួយ​ខ្យល់​ក​ន្ទ្រា​ក់​។

នៅ​ពេល​ធ្វើ​ដំណើរ​សុខ​ៗ​ស្រាប់តែ​ដើម​ក្ងោក​មួយ​ដើម​ប៉ុន​ខ្លួន​មនុស្ស ក៏​បាន​រលើង​ទាំង​ឫស​ដួល​រំលំ​សង្កត់ពីលើ​ចំ​ផ្នែក​ខាងក្រោយ​រថយន្ត​តែ​ម្តង​។ នៅ​ក្នុង​គ្រោះថ្នាក់​នេះ​ពុំ​បណ្តាល​ឲ្យ អ្នកបើកបរ​រង​របួស​ឡើយ គឺ​គ្រាន់តែ​បណ្តាល​ឲ្យ​រថយន្ត​បាន​រង​ការ​ខូចខាត​តែ​ប៉ុណ្ណោះ​។ បន្ទាប់​ពី​មាន​គ្រោះថ្នាក់ គេ​ឃើញ​នគរបាល​ព្រមទាំង​អាជ្ញាធរ សង្កាត់ និង​ខណ្ឌទួលគោក​ក៏​បាន​ចុះ​ទៅ​ធ្វើ​ចរាចរណ៍ ហើយ ក៏​បាន​កាត់​ដើមឈើ​យក​ចេញ​ដើម្បី​សម្រួល​ចរាចរណ៍​ឡើង​វិញ​។ ជុំវិញ​គ្រោះថ្នាក់​នេះ គេ​ពុំ​ដឹង​ថា​ខាង​ណា ជា​អ្នក​ទទួលខុសត្រូវ​ឡើយ​។

គួរ​បញ្ជាក់​នៅ​វេលា​ម៉ោង​ប្រមាណ​៥​រសៀល ភ្លៀង​បាន​បង្អុរ​ធ្លាក់​យ៉ាង​ខ្លាំង ចំ​កណ្តាល​រាជធានី​ភ្នំពេញ​រួម​ទាំង​មាន​ខ្យល់​បោកបក់​យ៉ាង​ខ្លាំង​។ ដោយសារ​តែ ដើម​ក្ងោក​មួយ​ដើម​នោះ ពុក​ផុយ ឫស​បណ្តាល​រលើង​ទាំង​ជំហរ​តែ​ម្តង​។ នៅ​ល្ងាច​នោះ នៅ​តាម​ដងផ្លូវ​នានា​ក៏​ត្រូវ​ភ្លៀង​ជន់​លិច​ផង​ដែរ​។ ដោយឡែក​ដងផ្លូវ​នានា​នៅ​ផ្សារ​ព្រៃ​ទា និង​ផ្សារ​ឯករាជ្យ​២ ក៏​ត្រូវ​ទឹក​ជន់​លិច​ជា​ច្រើន​ម៉ោង​ផង​ដែរ​៕ ដោយ ៖ ម៉េ​ង ធា