រយៈពេល​៣​ថ្ងៃ​ឃាត់ខ្លួន​ជនសង្ស័យ​២០​នាក់ ពាក់ព័ន្ធ​គ្រឿងញៀន

120

ខេត្តកំពង់ឆ្នាំង ៖ ជនសង្ស័យ​ចំនួន​២០​នាក់ ត្រូវ​បាន​សមត្ថកិច្ច​នគរបាល​ស្រុក និង​ខេត្ត​សហការ​គ្នា ធ្វើការ​ចាប់ខ្លួន​ជា​បន្តបន្ទាប់ ក្នុង​រយៈពេល​៣​ថ្ងៃ គឺ​ពី​ថ្ងៃ​ទី​២០​ដល់​ថ្ងៃ​ទី​២២ ខែឧសភា ឆ្នាំ​២០២០ ដោយ​ចោទប្រកាន់​ពី​បទ​ប្រើប្រាស់ រក្សា​ទុក និង​ចែកចាយ​ថ្នាំ​ញៀន ដែល​បាន​ប្រព្រឹត្ត​ឡើង ក្នុងស្រុក​សាមគ្គី​មាន​ជ័យ​។ លោក សេង ចាន់​ណា អធិការ​នគរបាល​ស្រុក​សាមគ្គី​មាន​ជ័យ​បាន​ឲ្យ​ដឹង​ថា មុន​ពេល​មានការ​ចាប់ខ្លួន​ជនសង្ស័យ​ចំនួន​ច្រើន​បែប​នេះ ពី​ដំបូង​ឡើង​គឺ​ចាប់​តាម​ដីកា​របស់​តុលាការ ដែល​ឲ្យ​មន្ត្រី​នគរបាល​ធ្វើការ​ចាប់ខ្លួន​មនុស្ស​ចំនួន​២​នាក់ គឺ​ទី​១​ឈ្មោះ អ៊ី​ត និង​ទី​២​ឈ្មោះ ទួន ភេ​ន​។

Loading...

ប៉ុន្តែ​ក្រោយ​ការ​ចាប់​ឃាត់ខ្លួន សមត្ថកិច្ច​បាន​ឆែក​ឃើញ​មាន​គ្រឿន​ញៀន ទើប​បន្ត​នីតិវិធី ឈាន​ដល់​ការ​ចាប់ខ្លួន​ជនសង្ស័យ​រហូត​ដល់​ទៅ​២០​នាក់​បែប​នេះ​។ ជនសង្ស័យ​ទាំង​២០​នាក់ បាន​ពាក់ព័ន្ធ​ដល់​ការ​ចែកចាយ រក្សា​ទុក និង​ប្រើប្រាស់​សា​ធាតុ​ញៀន​។ ចំពោះ​វត្ថុ​តាង​ដែល​ដកហូត​បាន​មាន ថ្នាំ​ញៀន​ចំនួន​៣​កញ្ចប់​ធំ ម៉ូតូ​១៣​គ្រឿង ទូរ​សព្ទ័​ដៃ និង​សម្ភារ​មួយ​ចំនួន​ទៀត​។

លោក​អធិការ​នគរបាល ស្រុក​សាមគ្គី​មាន​ជ័យ បាន​បន្ថែម​ថា ជុំវិញ​ការ​ចាប់ខ្លួន​ជនសង្ស័យ​ទាំង​២០​នាក់ គឺ​ដោយ​មានការ​សម្របសម្រួល​ពី​លោក អ៊ិ​ត សុធា ព្រះរាជអាជ្ញា​អម​សាលាដំបូង​ខេត្ត​ផង​ដែរ​។ ចំណែក​ជនសង្ស័យ និង​វត្ថុ​តាង សមត្ថកិច្ច​នគរបាល​ស្រុក​កំពុង​រៀបចំ​កសាង​សំណុំរឿង​បញ្ជូន ទៅ​ស្នងការដ្ឋាន​នគរបាល​ខេត្ត ដើម្បី​បន្ត​និ​តិ​វិធី​បន្ត​ទៀត​៕ ដោយ ៖ ពៅ សុខ​ហ៊ាន