ប្រជាពលរដ្ឋ​ចំនួន​៤៣​គ្រួសារ ទទួល​អំណោយ​ពី​សាខា​កាកបាទក្រហមកម្ពុជា​ខេត្ត

116

ខេត្តសៀមរាប ៖ បងប្អូន​ប្រជាពលរដ្ឋ​រង​គ្រោះ​ដោយ​ខ្យល់​កន្ត្រាក់ កាលពី​ថ្ងៃ​ទី​២២ ឧសភា ចំនួន​៤៣​គ្រួសារ មក​ពី​៣​ភូមិ ក្នុង​សង្កាត់​ជ្រាវ ក្រុង​/​ខេត្តសៀមរាប បាន​ទទួល​អំណោយ​សង្គ្រោះ បន្ទាន់ ពី​សាខា​កាកបាទក្រហមកម្ពុជា​ខេត្ត នា​រសៀល​ថ្ងៃ​ទី​២៦ ខែឧសភា ឆ្នាំ​២០២០ ដឹកនាំ​ដោយ​លោក​ជំទាវ ទាង អេ​ង ទៀ សីហា អនុប្រធាន​គណៈកម្មាធិការ​សាខា​កាកបាទក្រហម ខេត្តសៀមរាប រួម​ទាំង​សហការី និង​អស់លោក លោកស្រី ជា​មន្ត្រី​អនុ​សាខា អាជ្ញាធរ​ក្រុង ចៅសង្កាត់ មេ​ភូមិ ចូលរួម​នៅ​ក្នុង​បរិវេណ​សាលា បុណ្យ ភូមិ​ជ្រាវ សង្កាត់​ជ្រាវ ក្រុង​/​ខេត្តសៀមរាប ដោយ​រលំ​ផ្ទះ ០៨​ខ្នង របើក​ដំបូល​ធ្ងន់ធ្ងរ​៣៥​ខ្នង​ផ្ទះ​។

Loading...

លោក​ជំទាវ ទាង អេ​ង ទៀ សីហា អនុប្រធាន​គណៈកម្មាធិការ សាខា​កាកបាទក្រហម​ខេត្តសៀមរាប បាន​ពាំនាំ​នូវ​ការ​ផ្ដាំផ្ញើ​សួរសុខទុក្ខ​ពី សម្ដេច​កិត្តិ​ព្រឹទ្ធ​បណ្ឌិត ប៊ុ​ន រ៉ា​នី ហ៊ុន​សែន ប្រធាន​កាកបាទក្រហមកម្ពុជា ក៏​ដូច​ជា​លោក ទៀ សីហា ប្រធាន​គណៈកម្មាធិការ​សាខា ដែល​តែងតែ​យកចិត្តទុកដាក់​គិតគូរ ចំពោះ​សុខទុក្ខ​ប្រជាពលរដ្ឋ គ្រប់​រូប​មិន​ប្រកាន់វណ្ណៈ ពណ៌​សម្បុរ ជំនឿ​សាសនា ឬ​និន្នាការ​នយោបាយ​ណាមួយ​ឡើយ​។

លោក​ជំទាវ​ក៏​បាន​សម្ដែ​ដែង​នូវ​ការ​សោកស្ដាយ​ចំពោះ​ការ​ខូចខាត​ផ្ទះសម្បែង ទ្រព្យ សម្បត្តិ តែ​នេះ​ជា​គ្រោះ​មហន្តរាយ​គ្មាន​នរណា​ម្នាក់​ចង់​ជួប​ប្រទះ​ឡើយ ហើយ​លោក​ជំទាវ​ក៏​បាន​បន្ត​ថា ថ្វី​ត្បិត​តែ​អំណោយ​មនុស្សធម៌​ដែល​បាន​នាំ​យក​មក​ចែក​ជូន​បងប្អូន​នា​ពេល​នេះ មាន​ចំនួន​តិចតួច​ក្ដី មិន​សម​ល្មម​នឹង​ការ​ខាតបង់​របស់​បងប្អូន តែ​ក៏​អាច​ជួយ​សម្រាលទុក្ខ​បាក​របស់​បងប្អូន​បាន​មួយ​កម្រិត ហើយ​ក៏​ជា​ការ​បង្ហាញ​នូវ​ការ​យកចិត្តទុកដាក់​ចំពោះ​ប្រជាពលរដ្ឋ​គ្រប់​រូប ពី​សំណាក់​ថ្នាក់ដឹកនាំ សំខាន់​គឺ​កាកបាទក្រហមកម្ពុជា ដែល​មាន​សម្ដេច​កិត្តិ​ព្រឹទ្ធ​បណ្ឌិត ប៊ុ​ន រ៉ា​នី ហ៊ុន​សែន ជា​ប្រធាន ដូចដែល​បាន​លើក​ឡើង​ថា «​កាកបាទក្រហមកម្ពុជា​មាន​គ្រប់​ទីកន្លែង សម្រាប់​គ្រប់​ៗ​គ្នា មិន​ទុក​នរណា​ម្នាក់​ចោល​» ខ្ញុំ​ស្រឡាញ់​កាកបាទក្រហមកម្ពុជា​។

ក្នុង​នោះ​លោក​ជំទាវ ក៏​បាន​ធ្វើការ​ណែនាំ​មួយ​ចំនួន ដើម្បី​ជា​មូលដ្ឋាន​ក្នុង​ការ​ប្រយុទ្ធ​ប្រឆាំង និង​បង្ការ​ការពារ ទប់ ស្កាត់​នូវ​រលក​ទី​២ នៃ​ជំ​ឆ្លង​កូ​វី​ដ​-១៩ ទោះបី​មាន​ភាព​ធូរស្រាល​ពី​ជម្ងឺ​កូ​វី​ដ​-១៩ នៅ​កម្ពុជា​ក៏​ពិតមែន តែ​ភាព​ក្តៅ​គគុក​នៅ​លើ​ពិភពលោក​នៅ​តែ​បន្ត​រីក​រាលដាល ហើយ​ក្នុង​ពេល​ថ្មី​ៗ​នេះ​ដែរ កម្ពុជា​ក៏​មាន​អ្នក​នាំ​ចូល​នូវ​ជំងឺ​កូ​វី​ដ​-១៩ ចំនួន​២​ករណី​ទៀត​ផង​។

ទោះបី​នៅ​កម្ពុជា​យើង​ពុំ មាន​អ្នក​ស្លាប់​ដោយ​ជំងឺឆ្លង​កូ​វី​ដ​-១៩ ក៏​ដោយ យើង​ទាំងអស់​គ្នា​រួម​សហការ​គ្នា​ប្រយុទ្ធ​ប្រឆាំង​បង្ការ ទប់ស្កាត់​នូវ​ជំងឺឆ្លង​កូ​វី​ដ​-១៩ តាម​ការ​ណែនាំ​របស់​រាជរដ្ឋាភិបាល ក្រសួងសុខាភិបាល ដោយ​មិន​បាន​បន្ធូ​បន្ថយ​នោះ​ឡើយ គឺ​បង្កើន​នូវ​ការ​ប្រុង​ប្រយ័ត្ន​ខ្ពស់ ចំពោះ​រលក​ទី​២​នៃ​ជំងឺ​កូ​វី​ដ​-១៩ កុំ​ឲ្យ​មានការ​រីក​រាលដាល់​នៅ​ក្នុង​សហគមន៍​។

លោក​ជំទាវ​ក៏​បាន​ធ្វើការ​ផ្តាំផ្ញើ​ឲ្យ​បងប្អូន​ត្រូវ​ចេះ​ធ្វើ អនាម័យ​ឲ្យ​បានជា​ប្រចាំ​នៅ​ក្នុង​ក្រុម​គ្រួសារ ព្រមទាំង​កាត់​បន្ថយ​នូវ​ការ​ជួបជុំ ប្រមូលផ្តុំ​គ្នា​។ លោក​ជំទាវ​ក៏​បាន​ធ្វើការ​ក្រើនរំលឹក​ដល់​បងប្អូន​ត្រូវ​ត្រៀមលក្ខណៈ​សម្ភារ​កសិកម្ម ដើម្បី​បង្កបង្កើន​ផល ឲ្យ​បាន​ទាន់​រដូវ​ធ្វើស្រែ ចម្ការ​។

ម្យ៉ាងទៀត​ក៏​ត្រូវ​មានការ​ប្រុង​ប្រយ័ត្ន នៅ​ពេល​ភ្លៀង ខ្យល់ ផ្គរ​រន្ទះ កុំ​ប្រើប្រាស់​នូវ​គ្រឿង​អេ​ឡិច​ត្រូ​និ​ច (​ទូរស័ព្ទ​) ដែល​ជា​ចរន្ត​ចម្លង ដែល​បង្ក​ឲ្យ​គ្រោះថ្នាក់​ដល់​ជីវិត និង​ត្រូវ​ចេះ​ថែរក្សា​សុខភាព សំខាន់​ចំពោះ​កុមារ​តូច​ៗ និង​ចាស់ជរា ដែល​ជា​មុខសញ្ញា​ក្នុង​ការ​ឆ្លង​នៃ ជំងឺ​កូ​វី​ដ​-១៩ ហើយ​បើ​មាន​កើត​នូវ​រោគ​សញ្ញា​ណាមួយ ក៏​ត្រូវ​ប្រញាប់​ទៅ​កាន់​មណ្ឌល​សុខភាព ដែល​នៅ​ជិត​ខ្លួន​។

ក្នុង​ការ​ផ្តល់​អំណោយ​មនុស្សធម៌​នោះ ដោយ​មួយ​គ្រួសារ​ទទួល​បាន អង្ករ​៣០​គ​ក្រ , មី​១​កេស​,​ត្រីខ​១​យួរ​, កន្ទេល​១, ឃី​ត​១​កញ្ចប់​, អាវយឺត​២, ហើយ​បន្ថែម​លើ​នោះ​អ្នក​ផ្ទះ​រលំ ទទួល​បាន​ស័ង្កសី ១៦​សន្លឹក ថវិកា​២០​ម៉ឺន​រៀល និង​គ្រួសារ​ផ្ទះ​របើក​ដំបូល​បន្ថែម​នូវ​ស័ង្កសី ១០​សន្លឹក និង​ថវិកា​១០​ម៉ឺន​រៀល​ផង​ដែរ​៕ ដោយ ៖ ច័ន្ទ រស្មី