ខេត្ត​ក្រចេះប្រមូល​ផល​ស្រូវ​​វ​ស្សា​​លើ​​ផ្ទៃ​ដី២៨​.៣២៣​ហិ​កតា

ខេត្ត​ក្រចេះ​ ៖ ប្រជា​កសិករ​កំពុង​ប្រមូល​ផល​ស្រូវ​វស្សា ដែល​មាន​ទិន្នផល​មិន​ដូច​គ្នា​ទេ ដោយនៅ​តំបន់​ខ្លះ​បាន​ផល​ច្រើន តំបន់​ខ្លះ​ទៀត​បាន​ផល​តិច​ជាង​រាល់​ឆ្នាំ​។ នៅ​ក្នុង​ឆ្នាំ​២០២០​នេះ ការ​ធ្វើស្រែ​ចម្ការ​របស់​ប្រជាពលរដ្ឋ​នៅ​ទូ​ទាំង​ខេត្តក្រចេះ ជួប​គ្រោះ​រាំង​ស្ងួត​ផង ទឹកជំនន់​ផង ដែល​បណ្តាល​ឱ្យ រង​ការ​ខូចខាត​មួយ​ចំនួន តែ​ចំពោះ​ភោគ ផល​ស្រូវ ដែល​ប្រមូល​បាន ​ក៏​នៅ​ទទួល​បាន​ផល​ល្អ​ផង​ដែរ​។

Loading...

លោក ទ្រី សុភ​ក្ត្រ័ ប្រធាន​មន្ទីរ​កសិកម្ម រុក្ខា​ប្រមាញ់ និង​នេសាទ​ខេត្តក្រចេះ បាន​បញ្ជាក់​ប្រាប់​​ថា គិត​ត្រឹម​ព្រឹក​ថ្ងៃ​ទី​២៣ វិច្ឆិកា ​នេះ កសិករ​ក្នុង​ខេត្តក្រចេះ ប្រមូល​ផល​ស្រូវ​វស្សា​បាន​ចំនួន៨៣.៨៣៦​តោន លើ​ផ្ទៃដី ២៨.៣២៣​ហិ​កតា​ ។

លោក​​បន្ត​ថា លទ្ធផល​ការងារ​បង្កបង្កើន​ផលដំណាំ​គ្រប់​ប្រភេទ​ ក្នុង​ឆ្នាំ​២០២០ គិត​ត្រឹម​ថ្ងៃ​ទី​២០ ​វិច្ឆិកា រូ​ម​មាន​៖ ១-ការងារ​បង្កបង្កើន​ផល សម្រេច​បានការ​ដាំ​ដុះ​ដំណាំ ស្រូវ ចំនួន ៤៨,៨៣៥​ហ​.​ត ស្មើនឹង ១០៣,៩០% នៃ​ផែនការ ៤៧,០០០​ហ​.​ត ​។ សម្រេច​បានការ​ដាំ​ដុះ​ដំណាំ​រួម​ផ្សំ​ដូច​ជា បន្លែ​គ្រប់​ប្រភេទ ពោតស ដំឡូងជ្វា ដំឡូង​គរ និង​ប៉ិក​គក់ ចំនួន ៤,៧១៧​ហ​.​ត ស្មើនឹង ៥២,៤១% នៃ​ផែនការ ៩,០០០​ហ​.​ត ​។ សម្រេច​បាន​ការ​ដាំ​ដុះ​ដំណាំ​ឧស្សាហកម្ម​រយះ​ពេល​ខ្លី​ដូច​ជា ពោតក្រហម អំពៅ សណ្តែកបាយ សណ្តែកដី សណ្តែកសៀង ល្ង ថ្នាំជក់ និង​ដំឡូង​មី​ចំនួន ៨៨,៥៩០​ហ​.​ត ស្មើនឹង ១០៧,៦១% នៃ​ផែនការ ៨២,២០០​ហ​.​ត​។

លោក ទ្រី សុភ​ក្ត្រ័ ក៏​បាន​បញ្ជាក់​បន្ថែម​ថា ការងារ​ប្រមូល​ផល សម្រេច​បានការ ប្រមូល​ផលដំណាំ​ស្រូវ (​ស្រូវ​វស្សា​) ចំនួន ២៨,៣២៣​ហ​.​ត ស្មើនឹង ៥៧,៩៧% នៃ​ផែ្ទ​ដី​ដាំ​ដុះ ៤៨,៨៣៥​ហ​.​ត​។

ដោយឡែក អំពី​លទ្ធផល​ផ្ទៃដី​បាន​ស្តារ​ដំណាំ​ស្រូវ​ឡើង​វិញ​នៅ​ខេត្តក្រចេះ កាលពី​ថ្ងៃ​ទី​១១ ខែវិច្ឆិកា ឆ្នាំ​២០២០ កសិករ​ចំនួន ២, ៣៧២​គ្រួសារ បាន​ទទួល​គ្រាប់ ពូជស្រូវ​ចំនួន ២៣៧,២០០​គីឡូក្រាម ក្រោម​អធិបតីភាព​ឯកឧត្តម ហ៊ុន ម៉ា​ណែ​ត តំណាង​ដ៏​ខ្ពង់ខ្ពស់ សម្តេច​អគ្គមហាសេនាបតី​តេ​ជោ ហ៊ុន សែន ប្រមុខ​នៃ​រាជរដ្ឋាភិបាល កម្ពុជា​។

ដោយ​គិត​ត្រឹម​ថ្ងៃ​ទី​២០ ខែវិច្ឆិកា ឆ្នាំ​២០២០ ស្តារ​បាន​ចំនួន​ជាង ១,១៤៨​ហ​.​ត ស្មើនឹង ៦៧,៣៥% ស្មើនឹង ១,៦៤៦​គ្រួសារ និង​ផ្ទៃដី​មិន​ទាន់​បាន​ស្តារ មាន​ចំនួន​ជាង ៥៥៦​ហ​.​ត ដោយសារ​ទឹក​ស្រក​មិន​ទាន់​ផុត​ស្រែ​៕​ អត្ថបទ​ដោយ៖ ប៊ុន លីនណា